Pinngitsaaliilluni kalaallit ilinniarfiini misiligutissamik quisitsisoqartassanngilaq

KNR-ip sapaatip akunnerani kingullermi oqaluttuaraa ikiaroornartumik hash-imik ilinniarfinni atuisoqartarnerata annertussusianik misissuinissamut periarfissaqartoq. Allaaserisaq taanna tamatuma kingorna Ilinniagaqartut peqatigiiffiannit Ili Ili-mit sammineqarpoq, tamatumunngalu atatillugu Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq Nivi Olsen isumaqarpoq allaaserisamut naqqiuteqartoqartariaqartoq.

”Ajuusaarnarpoq KNR-imi uanga apersorneqarnera nipeqartinniarneqarmat uanga inuussutissarsiutinut ilinniarfitsinni tamani ilinniartuusut misissuiffigineqartalernissaat pisussaaffinngortinniariga. Taamaattoqanngilarmi. Aamma siunertaanngilaq quumik misissuinermi qooq akoqanngitsoq ilinniagaqalernissamut tunngaviussasoq, qoorlu akulik itigartinneqarnissamut anisinneqarnissamulluunniit tunngaviussasoq. “Pineqartoq tassaavoq atornerluinermik ajornartorsiuteqartut ingerlaqqikkusuttullu ikiorserneqartassasut,” Nivi Olsen nassuiaavoq.

Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfik taamaattumik maanna inatsisiliornissamut piareersaataasumik suliamik aallartitsivoq, atornerluinermik ajornartorsiuteqartoqarnera pasitsaanneqarsimappat misiligutissamik iliniartoq ilinniartulluunniit tigusiffigineqartalersinnaanerat pillugu. Taamaalillutami pissutsit atuuttut qanorpiaq innerat takulluarsinnaanerulissavarput, aalajangiinissanullu tunngavissagut pitsaanerusut pigilissallugit, ilinniagaqartut atornerluinermik ajornartorsiuteqartut ikiorsertarnissaannik ineriartortitsinissatsinni.

”Soorunami uanga soqutigisarinngilara kinaluunniit nataamik aallarteqqinniartoq, pereersunik qaangiilluni ingerlaqqikkusussappat akornusissallugu. Ilinniartullu peqatigiiffiat isumaqatigaara oqarmat, inunnut amerlasuunut ilinniagaqalernissaq alloriarnerusinnaammat siulleq, atornerluinermik qaangiiniarnermi. Kisianni aamma amerlapput ikiorsertariaqartut, alloriarnerit aappaannik aammalu pingajuannik tigusiniarneranni, naggataagut atornerluisuusimaneq qaangerlugu ingerlaqqissinnaajumalluni. Taakkua ikiussavagut, tamannali pissaaq aaqqissuussaasumik paaseqatigiinnerlu tunngavigalugu,” Nivi Olsen oqarpoq.

Annertunerusunik paasisaqarniaraanni, Naalakkersuisup allattaa Jens Frederik Nielsen attavigneqarsinnaavoq, jfni@nanoq.gl oqa.: +299 345702