Hallo Nordenip nunatsinni immikkortua atulerpoq

Peqqissutsimut Nunanillu Avannarlernik Suleqateqarnermut Naalakkersuisoq Doris Jakobsen, Hallo Nordenip nunatsinni immikoortortaqarfia atoqqartinneqarmat tikilluaqqusilluni oqalugiarpoq 21. oktobari 2015. Hallo Norden tassaavoq Nunani Avannarlerni Ministerit Siunnersuisoqatigiit paasissutissiisarfiat, nunani avannarlermiut nunani avannarlerni akornuteqanngitsumik nuttarsinnaanissaannik pisariillisaanissamik suliaqarfiusoq. Hallo Norden, Nunat Avannarliit Institutiani Kulturikkut illorsuup Katuap ilaani allaffeqassaaq. Hallo Nordenip nunatsinnut iluaqutissaipillugit Doris Jakobsen ima oqaaseqarpoq:

Nipaa tusaruk.

Doris Jakobsenip ammaanersiornermi oqalugiaataa.

Ammaanersiornermit assilisat.

Hallo Nordenip nittartagaa

 

Hallo Norden nunatsinnut sunik iluaqutsiissava? apeqqut tamanna nunatsinni hallo Nordenip pisortaanut Kitte Wittingimut apeqqutigaarput, akivorlu:

Kitte Witting:- Hallo Norden nunani avannarlerni tamani suliniutaavoq. Kalaallit Nunaanneersunut nunat avannarliit arlaannut nuunniartunut kiisalu nunani avannarlerneersunut allanut Kalaallit Nunaannut nuunniartunut attaveqaataanissaq siunnersuisartuunissarlu uanga suliassarisussaavakka. Nuunniarnermi inatsisit pisortanit aalajangersagaasut nunat akornanni assigiinngisitaartarnerat ajornartorsiortitsilersinnaasarpoq. Assersuutigalugu Norgemiu imaluunniit Sverigemeersoq maannga nuulernermini akileraartarnermut tunngasutigut ajornartorsiulersinnaavoq, nuunniarneranut akimmisaarutaasunik. Taama akimmisaartitaasut nuunniarnerisa ajornannginnerulernissaat pillugu uanga aqqutissiuussisutut sullittussaavakka.

Hallo Nordenip Kalaallit Nunaanni immikkoortortaata siunnersuisarneq aqqutissiuussisarnerlu ingerlatissavai, sullissinersili pisortat sullissinerattut ingerlassanngilaq?

Kitte Witting:- Tassa ilumoorpoq, pisortatut sullissisussaanngilagut nakkutiginnittussaanatalu. Paasissutissiisarneq qaammarsaanerlu suliasaraagut. Paasissutissanik nittartakkatsinnut ikkussuisassaagut, nittartagarlu Kalaallit Nunaannut tunngasunik naak imaqarluareeraluartoq suli amerlanernik immersortuarneqartussaassaaq. Kisianni tassa, soorlu nuunnermi immersugassat assigiinngitsut aaneqariaannanngorlugit nittartakkatsinniilissapput aammalu soorlu immersuereeraanni qanoq iliortoqarnissaanik ilitsersuutit ikkunneqassapput. Paasissutissat allat soorlu akileraartarnermut tungasut, ineqarnermut, nuunnermi nassatarineqarsinnaasunut allanullu tunngasut aamma ikkunneqarumaarput. Paasissutissanik ikkussuinermi pisortat inatsisitigut maleruagassatigut allatigullu maleruaqqusat pillugit soorunami tusarniarluaqqaarneqartassapput eqqortunik paasissutissiisartussaagatta. Paasissutissanut tunngatillugu pisortat qujanartumik assut suleqatiginnikusupput; paasissutissat nittartakkatsinnut ikkussagut tamaasa atorsinnaasutut akuereqqaartartussaagamikkit.

Nunani avannarlerni killeqarfiit ajornartorsiortitsisarnerat eqqarsaatigissagaanni Hallo Norden qanoq allatigut suliniassamaarpa?

Kitte Witting:- Suliassat marluupput, siullermik Nunani Avannarlerni Ministerit Siunnersuisoqatigiiffiata manna paasissutissiisarnermik qaammarsaanermillu sullissiveqarfigimmagu siunnersuisarneq qaammarsaanerlu suliassaraagut aappaattullu nunani avannarlerni killeqarfiit pissutigalugit ajornatorsiutaalersartut suunerat paasiniartussaassavarput. Nuunnermi akileraartarnikkut allatigullu aporfissat ilanngullugit. Ajornartorsiutit paasisagut killeqarfiit ajornartorsiortitsisarnerat pillugu siunnersuisoqatigiinnut ingerlateqqittassavagut. Takkua suliassaq Nunani Avannarlerni Ministerit Siunnersuisoqatigiivinut ingerlateqqittassavaat taavalu nunani avannarlerni suleqatigiinermut ministerit qanoq aaqqiissuteqartoqarsinnaanera pillugu nunaminni inatsisitigut pissutsinik misissuisassapput, nunani avannarlerni akornuteqanngitsumik nuuttarsinnaanissaq pillugu isumaqatigiissuteqarmat nunat suleqatigiissut eqquutsinniagassaannik.