Peqqinnissaq pillugu ilisimatusarnikkut ingerlatanut tapiissutit

Peqqissutsimut Naalakkersuisup Doris Jakobsenip 164.000 kr. tapiissutinit agguaateqqammerpai, tapiissutit peqqinnissaq pillugu ilisimatusarnermut Peqqissutsimut Naalakkersuisoqarfiup ataaniipput.

- ”Nuannerpoq peqqinnissaq pillugu ilisimatusarneq nukittorsarniarlugu ilaliisinnaaneq. Aamma assorsuaq nuannerpoq pilersaarutit amerlasuut pitsaasullu peqqinnissap immikkoortuini pilersaarutit qinnuteqarmata. Ajuusaarnaraluarpoq qinnuteqartut tamaasa tapiiffigisinnaannginnatsigit, qinnuteqartorpassuugaluarput tapiissutissalli killeqarnerat aporfiusimavoq. Taamaattorli neriuutigaara peqqinnissaq pillugu ilisimatusarnerup nukittorsarneqarneranik soqutiginninneq minnerulissanngitsoq” oqaaseqarpoq Peqqissutsimut Naalakkersuisoq, Doris Jakobsen.

Kalaallit Nunaanni Peqqinnissaq pillugu Ilisimatusarnikkut Ingerlatat pillugit Siunnersuisoqatigiit Peqqissutsimut Naalakkersuisumut innersuussisarput kikkut tapiissutinik tunineqassanersut.Ilisimatusartut pilersaarutillu taperneqartut tassaapput:

Kræfti pillugu pilersaarutit marluk. Iviangikkut kræfteqarnermut misissuisarneq aammalu inalukkakkut kræfteqartarneq pillugu misissuineq:

”Kalaallit Nunaanni inuiaqatigiit aningaasaqarnerannik innuttaasunik mammografi atorlugu misissuisarnerup eqqunneqarneratigut naliliineq Maria Klitgaard Christensen-imit.

”Kikkut inalukkakkut Kalaallit Nunaanni kræftimik eqqugaasarpat? Malunnaatinik ersittoqarpa, piaartumik qulaajaanissamut innersuussisunik aamma imaluunniit paasititsisunik toqunissamut annertunerusumik ulorianartorsiortunik?” Maria Vandborg Sneftrup-imit.

Taakkua saniatigut nerisartakkatta mingutsitsisullu ataqatigiinneranik paasititsissut taperneqarpoq. Taanna ateqarpoq: ”The influence of traditional Inuit diet, vitamin D and Persistent Organic Pollutants on markers of inflammation” suliarineqarsimavoq PhD ilisimatusartumit Louise Kærholm Schæbel-imit.

Aamma Inuuteq Fleischerip suliaa siffissakkut kalaallit napisinnaasarnerat: ”Greenland Hip-in-Inuit Project (Green-HIP)” taperneqarnissamut piukkunneqarpoq.

Kingulleq misissuineq taperneqartoq, medicinerit eqimattat misissorusutaat aalisakkanik suliffissuarni sulilluni ajoqusertarneq, suliaq ateqarpoq: ”Kalaallit Nunaanni aalisarnermi aalisakkanillu suliffissuarni sulilluni ajoqusertarneq - annertussusaa qanorlu pisarnersoq qulaajarlugu ajutoornerit pinaveersaartinniarlugit sulisullu ataannarnissaat aalajangersarniarlugu”.

Tapiissutinik qinnuteqarfissap tulliup killingaa 1. marts 2016. Peqqinneq pillugu tapiissutit aammalu Kalaallit Nunaanni Peqqinnissaq pillugu Ilisimatusarnikkut Ingerlatat pillugit Siunnersuisoqatigiit pillugit takusaqarsinnaavutit uani www.peqqik.gl

Annertunerusumik paasisaqarusukkuit attavigisinnaavat nakorsatut siunnersuisoq Birgit Niclasen bivn@nanoq.gl imaluunniit oqarasuaat +299 52 38 32.