Ukioq manna kapisilinniarneq tallimanngorpat unissaaq

Ukioq manna kapisilinniarneq tulaassuinerlu tallimanngorpat oktobarip 23-anni 2015-imi unitsinneqassaaq.

Naalakkersuisut KNAPK isumasioqatigereerlugu aalajangerput, ukioq manna kapisilinniarneq tallimanngornermi oktobarip 23-anni 2015-imi unitsinneqassasoq. Piffissap pineqartup kingorna kapisilinnik aalisarneq, tulaassineq tunisinerluunniit inerteqqutaavoq. Taamaattumik qassutit tamarmik oktobarip 23-anni 2015-imi qaqereerneqarsimassapput, taama Kalaallit Nunaanni Aalisarsinnaanermut Akuersissutinik Nakkutilliisoqarfik ilisimatitsivoq.

Sunngiffimmi aamma inuussutissarsiutigalugu aalisarnermi kapisillit pisarineqartut tamarmik kapisilinniarneq pillugu Namminersorlutik Oqartussat nalunaarutaat naapertorlugu Kalaallit Nunaanni Aalisarsinnaanermut Akuersissutinik Nakkutilliisoqarfimmut nalunaarutigineqassapput.

Sunngiffimmi aamma inuussutissarsiutigalugu aalisartut kapisilittatik ullut tamaasa nalunaarutigisussaavaat. Nalunaarsuinermi immersuiffissaq kommunimi imaluunniit uani pissarsiarineqarsinnaavoq.

Attavigineqarsinnaavoq: Kalaallit Nunaanni Aalisarsinnaanermut Akuersissutinik Nakkutilliisoqarfimmi pisortap tullia Niels J. Laursen. Mail: nijl@nanoq.gl