Qaleralinnik suliarineqanngitsunik akitsuut

Qaleralinnut akitsuummut nutaamut isornartorsiuinerit assigiinngitsut saqqummiunneqartarput.

Partiit 2016-imut aningaasanut inatsimmut akitsuutit pillugit ilaannakortumik isumaqatigeeqqammerput, nukissiuuteqarnermut kiisalu neqinut eqqussanut akitsuutip siunnersuutigineqarnera utertinniarlugu, sipaarutaasinnaasumik qaleralinnut annikitsumik suliarineqarsimasunut imaluunniit suliarineqanngitsunut akitsuut atuutsilerniarlugu isumaqatigiipput. Aningaasanut inatsimmi oqimaaqatigiittoqarnissaa akitsuusiinerup tapersissavaa.

Aalisakkanik isumalluutigineqartunik aalisarnerup ernianik akitsuusiinissamut, inuiaqatigiinnut aalisarnermik inuussutissarsiuteqartunut pitsaasumik aningaasaqarnikkut iluaqutigineqarsinnaappat isumaqatigiilluartoqarpoq. Isumalluutigineqartoq aalisarnikkut isertitsissutigineqarsinnaanerata saniatigut pitsanngorsaanikkut suliffissanik amerlanerusunik pilersitsissaaq kiisalu atugarissaarnissamut aaqqissuussanut aningaasalersuisinnaasunik pisortat isertitaqarnerulersillugit.

Politikkikkut isumaqatigiittoqarneratigut Naalakkersuisut suliarinninnissamut akitsuummut aalisakkanik tunisassiorfimmi qaleralinnik annikitsumik suliarineqarsimasunut suliarineqanngitsunillu akitsuusiinissamut siunnersuummik isumaqatigiittoqarnissaa piareersarneqalerpoq. siunnersuutaasoq nunami pitsanngorsaaniarnernut kiisalu landskarsimut iluanaarutigineqarnissaanut ilalertuutaassaaq.

Siunnersuutaasoq suliffeqarfinnut inunnullu, qaleralinnik suliareqqiineqanngitsunik suliarineqarnikunillu avammut tunineqartartunik, taamaasilluni niaqua paperualu atatiinnarneqarlutik suliaqartartunut akitsuusiinissamik pisussaaffiliineruvoq. Inatsimmut siunnersuut ukiaanerani ataatsimiinnermut ilanngunneqarnissaa kissaatigineqarpoq.
Siunertaavoq avammut tunisisarnerup akitsuutilersorneqarneratigut kalaallit suliffeqarfiisa amerleriarnissaat kiisalu taamaasilluni akileraartarnikkut isertitsissutigineqartarnissaa, akitsuusiineq avammut tunisaqartartunut maani nunami qalerallip suliarineqartarnissaanik kajumissaarutaassaaq.

Naalakkersuisut akitsuutip atuutilerneqarnissaanik isumaqatigiissutaasup isornartorsiorneqarnera pisortatigoortumik assigiinngitsutigut saqqummiunneqartumut, saqqummiunneqarneranut eqqummaariffigaat. Akitsuusiinissaq qularnaatsumik sunniuteqarnissaa arlalitsigut nalornissutaavoq. Naalakkersuisulli naliliipput, qalerallip suliareqqinneqarneratigut qaffaanissaq imaluunniit suliareqqinneqarani avammut tunisassiarineqarnerata akitsuuserneqarnissaa. Tamanna eqqussappat, suliassaqartitsinissaq ilimanaateqarluarsinnaavoq tamannalu isertitsissutaassaaq. Inuussutissarsiornikkut ilisimaneqarpoq, suliarineqarnissaanut sulisussanik pissarsiniartarneq ajornartorsiutaasarmat, qaleralik suleriaqqinneqarani qeritiinnarneqartartoq. Ajornartorsiummut tamatumunnga qaangiiniarluta ataatsimoortumik suliniuteqarnissarput suliffeqarfiit pisortallu soqutigisariaqarpaat. Suliffeqarfiit pisortallu piffissami suliffissaarusimaffiusumi ajornartorsiutaasut qaangerniarlugit iliuuseqartariaqaraluarput aamma iliuuseqarsinnaapput.

Inuussutissarsiornikkut nalunaarutigineqarpoq, qalerallit mikisut qerititat pisiariumaneqarluartuusut. Nioqqutissat tamakkua akigissaarput, taamaammat aalisakkat mikisut aggorlugit tunisassiorneq akilersinnaanngilaq. Taamaattumik avaqqunneqarsinnaanngilaq tunisassiortut, naak akitsuusiisoqaraluarpat, qalerallip suliareqqinneqarani anninnissaa ingerlaannassasoq. Akitsuusiinerlu matumani landskarsimut isertitsissutaanissaanik taarsiineruvoq. Qaleralinnik avammut tunisinermi akit qaffasipput, inuussutissarsiornermilu naatsorsuutit takutippaat akilersinnaanera qaffasittoq. Taamaasilluni qaleralinniarnermut isertitsissutaasussatut politikkikkut anguniakkat piviusunngortinneqarsinnaapput.

Avaqqunneqarsinnaanngilaq suliffeqarfiit akileraarutip ilaanik sinerissami aalisartunut tunisinermi akinik appaaniartoqassasoq. Qaleralinnik tunisinermi akiusoq ukioq 2010-p kingorna marloriaatinngorpoq. Naalakkersuisut naatsorsuutigaat, naak tunisinermi akit appariaateqarsinnaagaluartut, sinerissami qaleralinniarnerup akilersinnaanera ingerlaannassasoq. Taamaattumik partiit ilaannakortumik isumaqatigiissummi peqataasut akitsuummik annikinnerusumik landskarsimut iluanaaruteqarnissaq ajoriffissaqartinngilaat. Partiit isumaqatigiissutigaat isumalluutaasumik aalisarnermi akileraarusiineq inatsisiliinerlu qanimut 2016-imi misissorneqassasoq.

Inussiarnersumik inuulluaqqusillunga

Andreas Uldum

Paasissutissat annertunerusut, attavigiuk: Naalakkersuisut allattaa Aviâja Szomlaiski Olsen 34 52 12 / 58 61 16