Arctic Circle Assembly sapaammi 18. Oktobari naammassivoq

Ataatsimiinnermi qulequtaqartumi ”The Future of Greenland”, Inuussutissarsiornermut, Suliffeqarnermut, Niuernermut Nunanullu Allanut Naalakkersuisup Vittus Qujaukitsup tallimanngornermi 16. oktober Naalakkersuisut Kalaallit Nunaata ineriartortinneqarnissaanut politikkiat aamma takorluugaat, nunani tamalaani issittumi suleqatigiinnermut ataatsimeersuarnerit annersaannut, Arctic Circle Assembly-mut, Reykjavík-imi Island-imi ingerlanneqartumut, peqataasunut 1500-it missaanniittunut, saqqummiuppaa.

Ulluni 15. – 18. oktober nunarsuaq tamakkerlugu naalagaaffinni siuttuusut allallu naalakkersuisunit aallartitat, atorfilittat, immikkut ilisimasallit aamma ilisimatusarnermik suliaqartut, Issittup oqallisigineqarnissaa aamma Issittup nunani tamalaani siunissami sammineqarnerata pitsanngorsarneqarnissaa siunertaralugit, Reykjavik-imi Arctic Circle Assembly-mut katersuupput.

Kalaallit Nunaata aningaasaqarnikkut imminut napatissinnaalernissaata anguniarneqarnerata sulissutigineqarnerani, Kalaallit Nunaanni pisuussutit uumassusillit aamma uumaatsut isumannaarneqarnissaasa pingaaruteqarnera Vittus Qujaukitsup oqalugiaataani erseqqissarneqarpoq. Aningaasaqarnikkut periarfissat Kalaallit Nunaanniittut oqaluttuarai, aammalu nunami pisuussutit pingaaruteqartut tassaasut inuit isumalluutigineqartut, taamaattumillu ilinniarneq sungiusarnerlu Kalaallit Nunaata siunissami ineriartortinneqarneranut tunngavissaassasut, erseqqissarlugu.

Vittus Qujaukitsup aamma mittarfinnik allilerilluni imaluunniit nutaanik sanaartorluni kiisalu umiarsualivinni attaveqarnerup nutarterivigineqarneratigut, attaveqarnerup annertusarneqarnissaanut pilersaarutit oqaluttuarai.

Kiisalu oqalugiaammi nalunaarutigineqarpoq Naalakkersuisut Arctic Circle peqatigalugu Arctic Circle Forum-imi Kalaallit Nunaanni ataatsimiinneq ingerlattussaagaat, taanna ulluni 18.-19. maj 2016 Nuummi ingerlanneqartussaalluni. Arctic Circle Forum-imi maajimi ataatsimiinnermi, Issittumi nunat akimorlugit, Canadamit aamma Alaskamit peqataaffigineqartumik, nunap inoqqaavinik akuutitsinissaq aallartitaqarnissarlu pingaartumik sammineqassaaq. Ataatsimiinnermi issittumi innuttaasunut aningaasaqarnikkut ineriartortitsinissap, aammalu Issittup nunarsuarmit soqutigineqarnerujussua, Issittumi nunap inoqqaavinut iluaqutaasumik qanoq iliornikkut pitsaanerusumik aningaasaqarnikkut ineriartortitsinissamut piviusumik periarfissaqarnernut atorluarneqarsinnaanersoq, oqallisigineqassasoq pilersaarutigineqarpoq.

Vittus Qujaukitsup Arctic Circle-mi pisussanut pilersaarut tamaat peqataaffigaa aammalu ullut ataatsimiiffiusut pingasut taakkua ingerlaneranni aalajangersimasunik ataatsimeeqateqarnissamut periarfissamik atorluaalluni. Tassani pingaartumik pineqarput Islandip nunanut allanut ministerianik Gunnar Bragi Sveinsson-imik, kiisalu Premier Philippe Couillard-imik Quebec-imeersumik aamma Senator Angus King-imik naalagaaffimmit Maine-meersumik ataatsimeeqateqarnerit. Ataatsimiinnernut taakkununnga siunertaavoq pingaartumik suliassaqarfiit inuussutissarsiornermut, niuernermut, ilinniartitaanermut tunngassuteqartut iluanni aamma Issittumut Siunnersuisooqatigiinni suleqatigiinnerup annertusarneqarnissaa.

Paasissutissanik annertunerusunik piniarnermi attaveqarfissaq Nunanut Allanut Pisortaqarfimmi AC-fuldmægtigi Rebecca Lynge, oqarasuaammi +299 345156 imaluunniit rejl@nanoq.gl