Sulisut aarleqqutissaqanngillat

KNR-imi imatut qulequtsikkamik saqqummiussisoqarpoq: ”Sipaaruteqartoqarnissamut atorfillit ernumapput”.

Aallarniutigalugu Namminersorlutik Oqartussani sulisut pikkorissut tamaasa soraarsitsiortortoqassannginneranik isumaalukkunnaarsarusuppakka.

2016-imi Aningaasanut Inatsimmi ingerlatsinernut tapiissuteqarnermullu aningaasaliissutini tamani katillugit 1 procentit sipaarutaassapput. Allatut oqaatigalugu qullersaqarfimmi allaffeqarfiusoq kisimi sipaaruteqartussaanngilaq. Sipaaruteqarnissarmi Namminersorlutik Oqartussanut atasutut sullissivinnut, aammalu Namminersorlutik Oqartussani tapiissuterpassuarnut aamma tunngasuuvoq.

Tassunga atatillugu sipaaruteqarnissamit peqqinnissamik suliassaqarfik aamma kommuninut tapiissutit attorneqannginneri sianigeqquneqassapput. Ilinniagaqarnermullu immikkoortoqarfik affaannaanik sipaassaaq, tassalu procentip affaanik.

2017-imi suli procentimik ataatsimik ilasisoqassaaq, taamaalillutik 2015-imut naleqqiullugit 2017-imi sipaarutit tamakkiisut 2 procentiussallutik.

”Sunniuteqarluarnikkut iluanaarummik pissarsilluni suliat allatut iliorsinnaannginneri takuniarlugit ukiut tamaasa missingersuusiat misissoqqissaartarnerat tassaajuarpoq sungiusaat peqqinnartoq. Sulisorisallu attugaatinnagit naalakkersuisoqarfiit sipaarutissamik nassaarniarnerisa iluatsinnissaat aamma qularutiginngilara”, Aningaasaqarnermut Naalakkersuisoq Anda Uldum oqarpoq, itisiliivorlu:

”Namminersorlutik Oqartussat ingerlatsinerminnik pitsanngorsaajuartuupput, taamaalilluni sulisorisat atugarissaarnerannik imaluunniit kiffartuussinerannik ajortisaanngitsumik sunut allanut aningaasanik atugassiisoqartarluni. Pisiortortarnigut pitsanngorsarsimagigut oqaatigilara, taamaalilllutami pisiortoraangatta pitsaasunik sipaarutissanik pissarsisarpugut”.

Inussiarnersumik inuulluaqqusillunga

Med venlig hilsen

Anda Uldum, Aningaasaqarnermut Aatsitassanullu Naalakkersuisoq

 

 

Attavissaq: Peter Hansen, Aningaasaqarnermut Naalakkersuisoqarfimmi siunnersortaaneq, tlf: 346402, email: peter@nanoq.gl