Pimoorussilluni suliniuteqartoqartariaqarpoq

Najukkami pimoorussaasumik suliniuteqarroqartariaqarpoq najukkami oqartussaaqataanerup nukittorsarneqarnissaani

Nalaakkersuinikkut Ataqatigiissaarisoqatigiit, Naalakkersuisunut ilaasortanit tamanit borgmesterinit sisamaasunit kiisalu KANUKOKA-mi siulittaasumit inuttaqartoq, ulloq 12. oktober 2015 ataatsimiipput ilaatigut pisortat ingerlatsinerisa aaqqissuunneqarsimanerat sammillugu.

Ukiup kingulliup ingerlaneri Aaqqissuussaanikkut aaqqissuusseqqinnerup sunniutai nalilersorneqar-simapput. Nalilersuinerit takutippaat, aningaasaqarnermut aamma inatsisitigut isumannaatsuunermut tunngatillugu aaqqissuussaanikkut aaqqissuusseqqinnerup sunniutai pitsaasuusut maluginiarneqarsimasut, paarlattuanilli qanimut oqartussaaqataaneq kommunit kattussuunneqarnerinik aamma kommunini arlalinni nunagisap ungasissumiinnerinit unammillerneqarsimasoq. 

Ataatsimiinnermi sukumiinerusumik misissueqqissaarinerit oqallisigineqarput, matumani suliarine-qarsimasut Qaasuitsup Kommuniata aamma Kommuneqarfik Sermersuup avinneqarsinnaanerini kingunerisassat pillugit. Misissueqqissaarinerit takutippaat, kommunit pineqartut annertuunik aningaasartuuteqarnerulernernik nalaanneqassasut aammalu aaqqissuussaanikkut unammillerneqassasut - piffissami ikaarsaariarfiusumi tamatumalu kingorna ingerlatsinikkut. 

Kommuni ataaseq arlallilluunniit mikinerusut pingaarutilimmik sunniuteqalerluarsinnaassapput kommunit siunissami suliassanik isumaginnittarsinnaanissaannut. Aalajangiusimagaanni kommunit aamma namminersorlutik oqartussat akornanni assigiiaartumik nammatassat suliassallu agguaanneqarsimanissaat kommunip mikinerpaap naammassisaqarsinnaanera kommuninut tamanut aalajangiisunngorsinnaavoq. Taamaattumik nunamut tamarmut apeqqut tunngavoq, kommunimut imaluunniit illoqarfimmut ataasiinnarmuunngitsoq. 

Ataatsimiinnermi isumaqatigiissutigineqarpoq kommuninut suliassanik nuussissamaarnerit piareersarneqassasut ilaatigut sanaartornerup tungaatigut. Tassunga atatillugu qularnaarneqassaaq, kommunit piviusumik piareersimasinnaassanersut suliassat nutaat aggersut kivisinnaanissaannut.

Maannakkut aaqqissuussaanikkut aaqqissuussisimanermilu qanimut oqartussaassuseqarneq anner-tuumik unammillerneqarpoq. Apeqqutaatinnagu, kommunimit ataatsimik arlalinnilluunniit avitsisoqarnera, borgmesterit Naalakkersuisullu kissaatigaat suleqatigiinnissaq najukkami annertunerusumik suliniuteqartoqarnissaa pilersinniarlugu aamma innuttaasunik akuulersitsineq annertusarniarlugu, najukkami oqartussaaqataaneq nukittorsarumallugu. 

Naalakkersuisut siulittaasuat Kim Kielsen oqaaseqarpoq:

”Naalakkersuisut kommunit peqatigalugit kissaatigaat najukkami oqartussaaqataanerup nukittorsarneqarnissaa. Inuiaqatigiinni oqartussaasut attuumassuteqartut tamarmik suliniuteqartariaqarput innuttaasunik akuulersitsinerup annertusisinneqarnissaa qulakkeerniarlugu, apeqqutaatinnagu uagut kommunimi politikeriunersugut, Naalakkersuisunut aamma Inatsisartunut ilaasortaanersut imaluunniit kattuffiunersugut. 

Peqatigitillugu qularnaassavarput, pisortat ingerlatsinerata pissusissamisoortumik aaqqissuunneqarsimanissaa. Akissaqanngilagut pisariaqanngitsumik aningaasarpassuarnik allaffissornermut atuinissamut pisortat aningaasaataasa tatineqaraluttuinnarnerini, sulissaagulli innuttaasunut qaninnerusumik pimoorussaanerusumillu pisortat ingerlatsinissaat. Tamanna pisortat ingerlatsinerisa aaqqissuunneqarnerani sulinermut ersarissumik naleraassaaq. 

Naalakkersuisut soorunami Qaasuitsup Kommuniata avinneqarnissaanik kissaatigisaq maluginiarsimavaat. Pingaaruteqarpoq kommunip avinneqarnerani kingunerisinnaasat ilisimaneqarnissaat. Taamaattumik tamanna pillugu misissueqqissaarisoqarnikuuvoq Inatsisartunut ingerlateqqinneqartussamik, Kommuneqarfik Sermersuup avinneqarnissaa pillugu assingusumik misissueqqissaarineq ilanngullugu. Naggataatigummi Inatsisartut kommuninik aaqqissuussaaneq isummerfigisussaavaat. Kommunit kommuninut marlunnut arlalinnulluunniit avinneqarnissamik ujartuisut, Naalakkersuisut naliliinerat naapertorlugu taamatut avitsineq namminneq aningaasalersortariaqarpaat. Tamakkununnga aningaasartuutit nunap sinneranut aningaasanut inatsit aqqutigalugu tutsinneqartariaqanngillat." 

KANUKOKA-mi siulittaasoq Palle Jeremiassen oqaaseqarpoq:

”Kommunit Naalakkersuisullu kommuninut suliassanik nuussiniarnermi sulineq sakkortusartariaqarpaat. Tassunga atatillugu kommunit Naalakkersuisunut isumaqataapput, tassalu sanaartornerup tungaatigut nuussinissamik akisussaaneq pingaarnerpaatinneqartariaqartoq. Peqatigitillugu kommunit Naalakkersuisullu sulissutiginiarpaat, najukkami oqartussaaqataanerup nukittorsarneqarnissaa. Tamatumanimi pingaartorujussuuvoq innuttaasut - apeqqutaatinnagu sumi najugaqarnerlutik - pisariitsumik toqqaannartumillu peqataasinnaanissaat namminnerlu ulluinnarminnut tunngasunut pissutsinut sunniuteqarsinnaanerat." 

Nalilersuinerit pillugit nalunaarusiat Inatsisartunut ilisimatitsissutitut nassiunneqassapput. Pisortat ingerlatsineranni ineriartorneq pillugu ataatsimeersuarsimanermit eqikkaaneq Naalakkersuisut aam-ma KANUKOKA-p nittartagaannut ivertinneqassaaq.

 

Paasissutissanik allanik piniarnissamut attavigiuk: 

Naalakkersuisut Siulittaasuat Kim Kielsen, oqarasuaat. 34 50 00 imalluunniit KANUKOKA-p siu-littaasua, Palle Jeremiassen, oqarasuaat 36 21 00.