Karl-Kristian Kruse avaleraasartoortassiinermi sunniiniarsimanngilaq

2015-imi avaleraasartuut pisassiissutigineqarnerinut ingerlatsinermik kukkunersiuilluni misissuinerup ilaani atuarneqarsinnaavoq pitsaasumik, assuarnaatsumik ingerlatsisimasoqarnersoq, tamatumani suliamut attuumassuteqannginnissamut maleruagassanik unioqqutitsisoqarsimannginnersoq – avaleraasartuunik pisassiisoqarmat.

Nalunaarusiortut inerniliipput Aalisarnermut, Piniarnermut Nunalerinermullu Naalakkersuisoq avaleraasartuunik  ingerlatseqatigiiffimmut pisassiisoqartussanngormat,  ingerlatseqatigiiffimmut  iluatsitaarititsiniarsimaneranik aamma tamatumunnga sunniiniarsimaneranik takussutissaqanngitsoq.

Aalisarnermut, Piniarnermut Nunalerinermullu Naalakkersuisup suliamut attuumassuteqarnerata misissuiffigineqarnerani paasineqarmat Karl-Kristian Kruse suliamut attuumassuteqartoq,  Naalakkersuisoqarfik tamatumunnga iluuseqapallappoq.

Deloitte nalunaarusiamini allappoq piaarnerusumik iluuseqartoqarsimasinnaasoq, pisassiinermut suliarineqartut siusinnerusukkut aallartinneqarsimasuuppata. Taamaattumik suliamut attuumassuteqarsinnaaneq piaarnerusumik iliuuseqarfigineqarsimasinnaagaluarpoq.

Karl-Kristian Kruse Aalisarnermut, Piniarnermut Nunalerinermullu  decembarimi 2014-imi Naalakkersuisunngorami ingerlatseqatigiiffiup KNT ApS-ip siulersuisuinit ilaasortaajunnaarpoq. Ilaasortaajunnaarami piginneqataassutini tuniniaraluarpai. Piginneqataassutini tunisinnaannginnamigit qaniginerpaasami ilaannut tunniuppai.

Karl-Kristian Kruse taama iliorami isumaqarpoq pissusissamisut, pisariaqartutut iliuuseqareerluni, suliamut attuumassuteqannginnissamut qulakkeerinnilluni. Naalakkersuisunili ilaasortap taama iliornini naammanngitsoq ilisimanngilaa,  suliamut isumaginninnermi inatsimmi suliamut attuumassuteqarnermut maleruagassat naapertorneqarnersut, (allatut oqaatigalugu, Karl-Kristian Kruse ajunngitsussaq pillugu iliuuseqarpoq).

Kingusinnerpaamik qinnuteqarfissap ulluata qaangersimatsiaraa, maajip arfernanni 2015-imi, Aalisarnermut, Piniarnermut Nunalerinermullu Naalakkersuisoqarfik maajip arfineq aappaanni nalunaarpoq Aalisarnermut, Piniarnermut Nunalerinermullu Naalakkersuisoq suliamut attuumassuteqartoq.

Ingerlatseqatigiiffiit,  qinnuteqartut ilaat, Naalakkersuisuni ilaasortap, Naalakkersuisunut ilaasortanngunnginnermini piginneqataaffigisimasaa siulersuisunilu aamma ilaasortaaffigisimasaa, qanigisaatalu ilaat suli piginneqataaneranut tamatumunnga pissutaavoq. 

Taamaalilluni Aalisarnermut, Piniarnermut Nunalerinermullu Naalakkersuisup akisussaaffia Naalakkersuisut siulitaasuannit maajip arfineq pingajuanni 2015-imi oqartussaaffigineqalerpoq.

Karl-Kristian Kruse pisortatigut suliamut maajip 14-ianni attuumassuteqalerpoq, Naalakkersuisut 2015-imut avaleraasartoortassat pillugit isummernissaannut tunngavissiami inassutigineqartoq  oqaluuserimmassuk.

Deloittep nalunaarutaani allassimavoq Aalisarnermut, Piniarnermut Nunalerinermullu Naalakkersuisoq suliamut attuumassuteqarnerarluni nalunaartoq Naalakkersuisoqarfimmit avaleraasartoortassat  politikikkut oqaluuserisassanngorlugit suli innersuussutigineqanngitsut. Aalisarnermut, Piniarnermut, Nunalerinermullu Naalakkersuisup  aamma Naalakkersuisoqarfiup, Naalakkersuisunngorami taama pisoqarsinnaanera siumut ilisimareersimassagaluarpaat – Naalakkersuisup piginneqataanini pissutigalugu taama pisoqarsinnaanera, (Qanigisaata aamma piffissami tamatumani suli piginneqataanera pissutigalugu) ingerlatseqatigiiffimmut  suli Naalakkersuisunngortinnani.

Tamatumani Naalakkersuisoqarfik aalajangersimasunik najoqqutassiorsimasariaqaraluarpoq, Naalakkersuisoqarfiup ingerlatsiviit arlaat pineqartillugu eqqumaffigisassaminik, Naalakkersuisup attuumassuteqarsinnaaneranut tunngatillugu – najoqqutaqarsimasuuppat Naalakkersuisup attuumassuteqarnera piaarnerusumik paasineqarsimassagaluarpoq. 

Erseqqissaatigineqassaarli Aalisarnermut, Piniarnermut Nunalerinermullu Naalakkersuisoq avaleraasartuunik  ingerlatseqatigiiffimmut pisassiisoqartussanngormat,  ingerlatseqatigiiffimmut  iluatsitaarititsiniarsimaneranik aamma tamatumunnga sunniiniarsimaneranik takussutissaqanngimmat.

Naalakkersuisuni ilaasortaq oqarpoq: “Soorunalimi nuannaarutigaara nalunaarusiap inernerani piginneqatigiiffimmut attuumassuteqarsimanera pillugu, namminerlu naliliinera eqqorsorinninneralu naapertorlugu issuarneqarmat.  Nalunaaruteqarpunga piffissami pineqartumi suliamut attuumassuteqarlunga. Uanga naalakkersuisoqarfillu KNT ApS qinnuteqartut ilagigaat paasigatsigu”.

 

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi pisortaq, Jørgen Isak Olsen. Mail: jio@nanoq.gl