Ingerlatsinermik kukkunersiuineq, avaleraasartuunik 2015-imi pisassiissutit

- Naalakkersuisoqarfiup ingerlatsinermik kukkunersiuinerup inerniliussaa naammagisimaarpaa, takussutissaqarmat Naalakkersuisoqarfik sinaakkutissatut agguaassinermi pisortat oqartussaaffiisa najoqqutassiissutaat naapertorlugit qinnuteqaatit suliarisimammagit,  Aalisarnermut, Piniarnermut, Nunalerinermullu Naalakkersuisoqarfimmi pisortaq, Jørgen Isak Olsen, Deloittep ingerlatsinermik kukkunersiuilluni avaleraasartuunut 2015-imi pisassiissutit pillugit misissuilluni nalunaarusiaanut erseqqissaalluni oqarpoq.

Naalakkersuisoqarfiup pisortaata aamma  naqissuserpaa misissuinermi inassutigineqartut avaleraasartoorniarnermi aalisakkanillu ikerinnarsiortunik allanik aalisarnermi ingerlatsinermut siunissamilu sulinissamut tunngavigineqartassasut. Pisassiilluni aalajangiinissamut najoqqutarineqartut erseqqinnerusarnissaat aamma Naalakkersuisoqarfiup immikkut suliarissallugu pingaartippaa, kikkullu aamma  aalisarnermi peqataatinneqartarnissaat erseqqinnerusariaqassalluni.

Pingaaruteqarpoq pisassiinermi aalajangiinissamut erseqqissunik najoqqutaqarnissaq

Deloittep misissuinermini erseqqissarpaa pisassiilluni aalajangiinissamut najoqqutarineqartut naammaginartumik erseqqissagaanngitsut, taamaalilluni naalakkersuisoqarfik pisassiilluni aalajangiinissamut najoqqutarineqartut pisassiilluni aalajangiinissat ilai nammineerluni najoqqutassarsiuuttarsimagai, pisassiillunilu aalajangiinissamut najoqqutarineqartut nammineerluni paasinninni naapertorlugu najoqqutassiortarsimalluni.

Naalakkersuisoqarfiup Naalakkersuisut isummernissaannut siunissami tunngaviliisarnissaannut suliaqaraangami nalilersugassaasa  tamanna ilagissavaat.

Jørgen  Isak Olsenili erseqqissaavoq qinnuteqartut pisassinneqarsimammata allaffissornikkut nalilersuineq tunngavigalugu, suliassanik isumaginninnermut inatsit naapertorneqarluni.

- Qinnuteqaatit suliarineqarmata naalakkersuisoqarfimmit qinnuteqaatit tamaasa ataatsimut nalilersorneqarput, tamaasalu immikkut pisassiinermi aalajangiinissamut najoqqutarineqartunut naapertuunnersut  pingaarnersiorneqarput. Qinnuteqartut tamarmik immersugassiamut immikkoortiterneqarput, pisassiinermi aalajangiinissamut najoqqutarineqartunut, akuerineqartunut immikkoortinneqarlutik.   Taanna tunngavigalugu qinnuteqartut piukkunnarnerpaat pisassinneqarnissaannut innersuunneqarput, naalakkersuisoqarfimmi pisortaq oqarpoq.

Jørgen Isak Olsenip Deloittep pisassiinermi aalajangiinissamut najoqqutarineqartut naammaginartumik erseqqissagaannginnerarlugit uparuaaneranut isumaqataanngilaq.

- Naalakkersuisoqarfik isumaqarpoq pisassiinermi aalajangiinissamut najoqqutarineqartut erseqqissumik nassuiaasersorneqareerneqarsinnaanngitsut. Taamaattumik pingaaruteqarpoq qinnuteqartut akornanni qinnuteqaatiginnerpaat kinaassusersiunngitsumik tunngaveqarluni pisassinneqassammata, naalakkersuisoqarfimmi pisortaq oqarpoq. 

Aalisarneq nutaaq

Avaleraasartuunik aalisarneq immikkoortunut marlunnut inissisimasutut  oqaatigineqarsinnaavoq, Kalaallit Nunaanni avaleraasartuunik aalisarneq nutaarluinnaasoq pineqarluni aappaattut taakku aalisarneqarnissaat  soqutigineqartorujussuulluni. Tamanna Naalakkersuisoqarfiup aalisarnermut immikkoortortaqarfiata sulisuinut misilittagaagimmat pissanganarlunilu unammillernartuuvoq.

Aalisakkanik ikerinnarsiortunik aalisarneq pillugu allaffissornermi sulisut amerlanerusut pisariaqartinneqaraluartut taamaattoq sulisut amerlineqarsimanngillat.

Naalakkersuisoqarfiulli allaffissorneq ataqatigiissaarniartuarpaa aalisarniartunut immersugassanik ilaatigut immersueqqusisarluni aamma uppernarsaatinik piumasaqartarluni.

Naalakkersuisoqarfimmi sulissutigineqarpoq pisassiinermi aalajangiinissamut najoqqutarineqartut qinnuteqartunut piaartumik nassiunneqartassasut, taamaalilluni qinnuteqaatit piffissaqarnerulluni suliarineqartalissapput.

Aalisakkat ikerinnarsiortut pillugit pilersaarusiorneq

Naalakkersuisoqarfiup KNAPK aamma Sulisitsisut suleqatigiillutik nunatsinni  aalisakkat ikerinnarsiortut pillugit pilersaarusioqatigissallugit septembarimi 2015-imi suleqatigilerpai.

Ukiunut aggersunut tallimanut-qulinut anguniagartalimmik pilersaarusiortoqassaaq, kalaallit aalisartuisa aalisakkanik ikerinnarsiortunik aalisarnerat nalilersuiffigineqassalluni aamma tamatuma  ineriartortinneqarnissaa pilersaarusiorfigineqassalluni.

Pilersaarutip suliarineqarnerata siunertarissavaa Kalaallit Nunaanni aalisakkanik ikerinnarsiortunik aalisarneq  pitsaanerusumik periarfissiuunneqarluni pilersaarusiuunneqarnissaa, aamma aalisakkat pineqartut qanoq  atorluarsinnaaneri pillugit pilersaarusiortoqassalluni, aamma inuiaqatigiinnut aningaasanik amerlanerpaanik qanoq ililluni sunniuteqarsinnaanissaat pilersaarusiorfigineqassaaq, aamma suliffissanik pilersitsinissaat pilersaarusiorneqassalluni.

Aalisakkat ikerinnarsiortut pillugit anguniagartalimmik pilersaarusiugaq qularutissaanngitsumik tamanut soqutiginaateqassaaq. Aalisakkat ikerinnarsiortut pillugit pilersaarut tunngavigalugu  pisassiinermi aalajangiinissamut najoqqutarineqartut tamanit takujuminarninngussaaq. 

Suliamut attuumassuteqarneq

Naalakkersuisoqarfik iliuuseqarpallappoq  paasinarsimmat Karl-Kristian Kruse suliamut attuumassuteqartoq, tamanna Aalisarnermut, Piniarnermut Nunalerinermullu Naalakkersuisup suliamut attuumassuteqarsimaneranut misissorneqarnerata takutippaa.

Deloitte nalunaarusiamini allappoq piaarnerusumik iluuseqartoqarsimasinnaasoq, pisassiinermut suliarineqartut siusinnerusukkut aallartinneqarsimasuuppata. Taamaattumik suliamut attuumassuteqarsinnaaneq piaarnerusumik iliuuseqarfigineqarsimasinnaagaluarpoq.

Naalakkersuisoqarfik nutaamik suleriaaseqalissalluni pilersaaruteqarpoq, sulianut attuumassuteqartunik suliaqarnermut ingalassimaarutigineqartussamik, suliamut attuumassuteqartut piaarnerusumik paasilertornerujumallugit.

Erseqqissarneqassaaq Naalakkersuisuni ilaasortaq suliamut attuumassuteqannginnissaa pillugu decembarip 14-ianni 2014-imi, Naalakkersuisunngoriitsiartoq, ilisimatinneqarmat.

Naalakkersuisoqarfiup Deloittep nalunaarutaani inassutigineqartut tusaatissatut perusuppai siunissamilu sulinermini tunngavissatut atorusullugit.

"Ingerlatsinermik kukkunersiuilluni misissuineq 2015-imi avaleraasartuunit pisassiissutit" pillugit nalunaarusiaq uani atuaruk.

 

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi pisortaq, Jørgen Isak Olsen. Mail: jio@nanoq.gl