Naalakkersuisut Reykjavikimi Arctic Circle Assembly-mi peqataasut

Naalakkersuisut siulittaasuat Kim Kielsen aamma Inuussutissarsiornermut, Suliffeqarnermut, Niuernermut Nunanut Allanullu Naalakkersuisoq Vittus Qujaukitsoq Arctic Circle Assemblymi  ulluni 15. – 18. oktobarimi Reykjavíkimi peqataassapput. Tassani ataatsimeeqataassapput naalagaaffiit siuttui naalakkersuisullu sinniisaat, atorfilittat, immikkut ilisimasallit ilisimatuullu nunarsuarmit tamaneersut, tassanilu Issittoq Issittumilu siunissami nunat tamat ukkatarinninnerisa nukittorsarnissaat oqaluuserissavaat.

Arctic Circle Assembly, ukioq manna pingajussaannik ingerlanneqartussaq, ukiumoortumik ataatsimiinneruvoq Issittumi pissutsinik oqalliffeqarnissaannik qulakkeerinnittussatut siunertalik.  Issittup soqutigineqarnerujussuata ersersippaa nuna soorlu Kina, Korea Kujalleq, USA, Frankrig, Rusland aamma Tyskland peqataammata, EU-mit, FN-imit, Nunat Avannarlernit, Issittumi Siunnersuisoqatigiinnit il.il. peqataanerisa saniatigut.

Naalakkersuisut siulittaasuat Kim Kielsen oqaaseqarpoq:

”Nuannaarutigaara peqataanikkut takutissinnaagakku. Issittumi suleqatigiinneq pillugu pingaartitsinerput Issittumut tunngasunik tassanilu suleqatigiinnermut tunngasunik isumasioqatigiinnermi nunat tamat peqataaffigisaanni Arctic Circlemi peqataanikkut. Naalakkersuisunut pingaarpoq nunat allat Kalaallit Nunaannut Issittumullu soqutiginninnerat Kalaallit Nunaannut Kalaallillu Nunaanni inuussutissarsiortunut aningaasaqarnikkut periarfissiinissamik sapinngisamik annerpaamik iluaqusiissasoq. Aamma pingaarpoq silap allanngornerata kingunerisaanik Issittumi inuiaqatigiit, avatangiisit pinngortitallu unammilligassaasa sapinngisamik annerpaamik malugitinniarnissaat. Oqaloqatigiinnermi taama ittumi peqataanikkut inuiaqatitsinnut iluaqutaasussamik pitsaasumik malunnartitseqataavugut.”

Arctic Circlemi peqataanerup saniatigut Kim Kielsenip Islandimi statsministeri Sigmundur Davið Gunnlaugsson aamma aalisarnermut ministeri Sigurður Ingi Jóhannsson ataatsimeeqatigissavai kiisalu Islandimi upalungaarsimanermut annaassiniartarnermullu sullissivik pulaassallugu.

Taamaalilluni aammattaaq Kim Kielsenip meeqqat Uummannami meeqqat angerlarsimaffianneersut Arctic Circle Assemblymi peqataanerat tapersersorpaa.

Meeqqat tusarnaartitsissutissaata ilaminernga tusarnaartitsissutigiartornissaanut Kim Kielsen Vittus Qujaukitsullu aalisarnermut ministeri Jóhannsson ataatsimeeqatigilermassuk qaaqqusaasimapput. 

Ataatsimiinnermi ”The Future of Greenland”-imik taasami Inuussutissarsiornermut, Suliffeqarnermut, Niuernermut Nunanut Allanullu Naalakkersuisup Vittus Qujaukitsup Naalakkersuisut Kalaallit Nunaata ineriartornermi politikkiat anguniagaallu peqataasunut 1500-it missaanniittunut saqqummiuppaa.

Naalakkersuisoq Vittus Qujaukitsoq Arctic Circlemiinnermi tamarmi peqataassaaq, aamma tassunga atatillugu suleqatini arlallit oqaloqatigissallugit suleqatigiissutinut suliassanullu ataatsimoorullugit soqutigisanut tunngasut pillugit.

Vittus Qujaukitsup taamaalilluni Islandip Nunanut allanut ministeria Gunnar Bragi Sveinsson ullumi naapeqatigissavaa. Aammattaaq aqagu arfininngorpat Nunanut Allanut Naalakkersuisup U.S. Senator naalagaaffimmit Mainemeersoq, Angus King ataatsimeeqatigissavaa USA-mik suleqatiginninnerup nukittorsarnissaa, ilaatigut niuerneq, ilinniartitaaneq kiisalu Issittumi Siunnersuisoqatigiit, maanna USA-p siulittaasuuffigisaa, pillugit oqaluuserissallugit.

Inuussutissarsiornermut, Suliffeqarnermut, Niuernermut Nunanut Allanullu Naalakkersuisoq, Vittus Qujaukitsoq isumasioqatigiinnermi saqqummeereerami ima oqaaseqarpoq:

"Issittoq pingaaruteqartutut isigineqalernikuuvoq nunarsuarmillu tamarmit eqqumaffigineqalerluni, tamatuma nassataanik nunarsuarmi nunat aquttui periusissanik ineriartortitsisarput suleqatitaartorlutillu Issittumut tunngatillugu aalajangiiffiusartunik. Taamaammat oqallittarfinni Arctic Circletut ittuni peqataasarnissarput pingaaruteqarpoq. Nunatta ineriartorfigisinnaasaanut periarfissaanullu tunngatillugit oqaloqatigiittarnermut peqataalluarnitsigut nunat tamat Kalaallit Nunaannik ukkataqarnerat paasinnittariaaseqarnerallu aamma siunissami ineriartornissarput pitsanngorsaaffigisinnaavarput. Inuiaqatitta ineriartornerat imminut napatissinnaasoq siunertaralugu Naalakkersuisut anguniarpaat nunanut qanitatsinnut pitsaasumik attaveqarnissatta qulakkeernissaa.”

Inuussutissarsiornermut, Sulisoqarnermut, Niuernermut Nunanullu Allanut Naalakkersuisup Vittus Qujaukitsup isumasioqatigiinnermi saqqummiussaa tuluttooq uani atuarneqarsinnaavoq.

Assip siulliup oqaasertaa:
Naalakkersuisut Siulittaasuat Kim Kielsen aamma Islandip statsministeria Sigmundur Davið Gunnlaugsson.

Assip tulliata oqaasertaa:

Inuussutissarsiornermut, Sulisoqarnermut, Niuernermut Nunanullu Allanut Naalakkersuisup Vittus Qujaukitsoq Arctic Circle Assembly-eqarnerani saqqummiisoq.

 

Annertunerusumik paasisaqarusukkuit attavigisinnaavat Nunanut Allanut Pisortaqarfimmi AC-fuldmægtigi Rebecca Lynge, oqarasuaatikkut +299 345156-ikkut imaluunniit e-mail rejl@nanoq.gl.

Naalakkersuisut Siulittaasuata pilersaarutai pillugit paasisaqarnerorusukkuit attavigisinnaavat pisortaq Mininnguaq Kleist, mobil: +299 541587.