Ilinniagaqartut akornanni ikiaroornartumik atornerluineq eqqumaffigisariaqarpoq

Naalakkersuisup Nivi Olsen-ip nuannaarutigaa Imarsiornermik Ilinniarfimmiit nalunaarut, Ilinniarfiup eqqumaffiginiarmagu isumannaarniarlugulu ilinniagaqartut suliffeqarnermut ikaarsaartassanngitsut aangajaarniutinik atuinermik ajornartorsiuteqarlutik.

”Uanga isumaqarpunga pingaaruteqartoq ajornartorsiut atuuttoq nassuerutigissallugu, oqallisigilissallugulu. Taamaattumik uanga Imarsiornermik Ilinniarfiup pisortaanut Jeppe Carstensen-imut oqaatigereerpara suliniut aallartinneqartoq tapersersorakku, tamannalu oqaluuserereerparput. Minnerunngitsumik nuannaarutigaara ataatsimoorullugu suliniuteqarneq uani pineqarmat, Imarsiornermik Ilinniarfiup aamma imarsiornermi inuussutissarsiummik ingerlatsisut Imarsiornermik Ilinniarfiup siulersuisuini ilaasortaasut akornanni. Taamaaliornikkut ilinniarfiup suliniutai inuussutissarsiortullu imarsiornermut ilinniarsimasunik atornerluisuunngitsunillu umiarsuarni sulisussanik pisariaqartitsinerat ataatsimut siunnerfilersorneqassammat.”

Tamatuma saniatigut Nivi Olsen-ip pilersaarutigaa suliassaqarfimmi uani suliniutit pioreersut nukittorsarnissaat.

”Naalakkersuisoqarfimma maanna siunnersuusiorpaa qanoq aaqqissuussinitsigut atornerluinermut sammisumik suliniutit nukittorsarsinnaanerigut, atornerluineq ikiaroornartumut hash-imut, imigassamut allamulluunniit sammisuunersoq apeqqutaatinnagu. Tamanna inatsisitigut iliuusissanik aalajangersagaqarnersoq eqqarsaatigalugu, ilinniarfiit pitsaanerusunik killiliussaqarsinnaanerat atornerluinerup paasinissaanut iliuuseqarfiginissaanullu eqqarsaatigalugu, kisiannili aamma pineqartut ataasiakkaarlutik atornerluinerminnik qaangiiniarnissaminnut ikiorserneqarsinnaanerat eqqarsaatigalugu. Pingaaruteqarpoq uagut ilinniartitaanermik ingerlatsinermi inissisimasugut atornerluinermut tunngatillugu aalajangersimasumik ersarissumillu politikkeqarnissarput, kisiannili aamma pingaaruteqarpoq naalakkersuinikkut akisussaaffigut akimorlugit ataatsimoorluta iliuuseqarnissarput, ajornartorsiuteqarnerminnik nassueruteqarsimasut qaangeerusuttullu ikiorsinnaajumallugit.”

 

Annertunerusumik oqaaseqartoqarnissaa kissaatigigaanni Naalakkersuisup allattaa Jens Frederik Nielsen, oqarasuaat tlf. 34 57 02 aqqutigalugu attavigineqarsinnaavoq.