Video atorlugu apersuisarneq

Video atorlugu apersuisarneq meeqqanik inuusuttunillu illersuinermik pitsaanerulersitsivoq

”Kalaallit Nunaanni Eqqartuussissuserisut video atorlugu apersuisarnermut inatsisissatut siunnersuummut, Inatsisartut ataatsimiinneranni matumani suliarineqartumut isornartorsiuineranni isumaqatiginngilakka. Video atorlugu apersuisarnermi ukiunut killigititaasut qaffanneqarpata, inatsisitigut isumannaassuseq ulorianartorsiortinneqarnavianngitsoq isumaqarpunga. Taamaassorinngilluinnarpara. Meeqqat inuusuttullu video atorlugu apersuisartunit, meeqqanik oqaloqatiginninnissamut sungiusarsimasunit apersoqqissaarneqartarnerisigut tamanna qulakkeerneqarpoq. Meeqqat eqqarsartarnerat eqqaamasaqartarnerallu inersimasunit allaaneruvoq. Meeqqat inuusuttullu pilertornerpaamik video atorlugu apersorneqartarnerisigut, misigisaminnik eqqaamannilluarnerunissaat qulakkeerneqartarpoq. Tamanna aamma inatsisitigut isumannaassutsimut iluaqutaavoq, tamatumalu saniatigut meeqqat inuusuttullu eqqarsaatigineqartarput. Aamma pilertortumik apersuisarnikkut meeqqat inuusuttullu misigisaminnik suliaqarsinnaanerisa aallartinneqarsinnaanera qulakkeerneqartarpoq. Taamaattumik siunnersuut meeqqat inuusuttullu inatsisitigut isumannaassusaannut annertuumik pitsannguissasoq isumaqarpunga”, Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko oqarpoq.

Sermitsiami sapaatit akunneranni matumani saqqummersumi Kalaallit Nunaanni Eqqartuussissuserisunit Finn Meinel oqarpoq, video atorlugu apersuisarnerup unnerluutigisaasut inatsisitigut isumannaassusaat ulorianartorsiortissinnaagaa. Imatut oqarpoq: ”Inuit eqqartuussivimmi toqqaannartumik nassuiaasinnaasuuppata tamanna pitsaanerusussaavoq. Kisiannili ukiunut killissarititaasut 12-iniit 15-inut allanngortinneqarneranni aamma ilisimannittut amerlanerusut illersuisunit apersorneqarsinnaajunnaartussaapput. Taamaalillunilu illersuineq unnerluutigisaasullu naapertuuttumik eqqartuunneqarnissaannut periarfissat ajorseriartinneqassapput.”

Naalakkersuisoq Mala Høy Kúko erseqqissaavoq, video atorlugu apersuinermi illersuisoq inimit allamiit malinnaasinnaasoq. Illersuisoq video atorlugu apersuisoq aqqutigalugu meeqqamut inuusuttumullu apeqquteqarnissamut periarfissaqarpoq. Taamaalilluni illersuisup pinerlineqartumut ilisimannittunullu apeqquteqarsinnaanissaa qulakkeerneqassaaq – soorlumi eqqartuussinermi nalinginnaasumi taamatut pisoqartartoq. Taamaattumik unnerluutigisaasup inatsisitigut isumannaassusaa ulorianartorsiortinneqarnavianngitsoq Naalakkersuisoq isumaqarpoq.

Meerartavut pingaarnerpaatut pigisaraavut
Naalakkersuisoq isumaqarpoq, uagut inuiaqatigiittut meeqqatsinnik paarsilluarnissamut immikkut pisussaaffeqartugut. Meeqqat inuusuttullu pinerluffigineqarsimatillugit isumaginissaannut immikkut akisussaaffeqarpugut. Minnerunngitsumik sakkortuumik pinerluffigineqarsimappata, soorlu persuttarneqarsimappata kinguaassiutitigullu atornerlunneqarsimappata isumaginissaat pisussaaffigaarput. Video atorlugu apersuisarnerup annertusineqarneratigut meeqqat inuusuttullu eqqugaasimasut immikkut eqqarsaatigineqarnissaat anguneqarsinnaalissaaq. Meeqqat inuusuttullu taamatut illersorneqartariaqartut Naalakkersuisut isumaqarput. Taamaattumik siunnersuuteqartoqarnera, aammalu siunnersuutip siullermeerneqarnerani Inatsisartunit taperserneqarnera Naalakkersuisunit nuannaarutigineqarpoq.

Tamanit tapersiilluartoqarpoq
Aamma inatsisissatut siunnersuut kalaallinut soqutigisaqartunut tusarniaassutigineqarmat, tusarniaaffigineqartut tamangajammik siunnersuummut tapersiipput.

MIO inatsisissatut siunnersuutip tusarniaassutigineqarnerani ilaatigut allappoq: ”Inatsisissatut siunnersuummi inuit video atorlugu apersorneqartut isumaqatiginninniarnerni pingaarnerni nassuiaanissaat aalajangiinissamut pingaaruteqanngippat, ilisimannittutut nassuiaanissamut pisussaaffilerneqannginnerat takullugu iluarisimaarnarpoq (…) Ullumikkut pineqaatissiinissamut suliani meeqqat ilisimannittutut nassuiaanerminni artorsartartut ilisimavarput. Eqqartuussinissap utaqqineqartarnera aammalu pinerluuteqartup naapinnissaanik ersineq meeqqat annilaanganartutut misigisartagaasa ilagiinnarpaat”.

Meeqqap eqqarsaatigineqarnissaa aammalu unnerluutigisaasup eqqarsaatigineqarnissaa Naalakkersuisunit eqqumaffigineqarpoq. Naalakkersuisut isumaat malillugu inatsisissatut siunnersuummi eqqarsaatigisassat marluusut taakku naammassineqarput.

Siunnersuutip tapersersorneqarnerata ingerlaannarnissaa
Siunnersuutip tapersersorneqaannarnissaa Naalakkersuisut neriuutigaat, meeqqat inuusuttullu, sakkortuumik pinerluffigineqartut pitsaanerusumik illersorneqarnissaannik isumaqartussaammat.

Annertunerusumik paasisaqarusunnermi Naalakkersuisup allattaa Elise Uupi Kuitse, oqarasuaat 345414-imut imaluunniit Immikkoortortaqarfimmi Pisortaagallartoq Karen Anne Arleth, oqarasuaat 345465-imut attaveqarfigineqassapput.