Ilinniartut sungiusarfissaannik amigaateqartoqarpoq

Sanaartornermi suliffeqarfinnik ilinniartut sungiusarfissaannik maannakkut amigaateqartoqarpoq

Kalaallit Nunaanni inuussutissarsiutit immikkoortuanni sanaartornermi maannakkut annertuumik siuariartoqarpoq. Ajoraluartumik ilinniartut sungiusarfissaat taamatut amerlerianngillat.

Kalaallit Nunaanni sanaartukkat nutaat amerliartorput, soorlu isertitsivik nutaaq Nuummilu umiarsualiviup allilernera, Aasianni ilinniarnertuunngorniarfiup allanngortiternera Ilulissanilu Atuarfik Mathias Storch nutaaq. Tassunga peqatigitillugu inuussutissarsiutit immikkoortuanni tassanerpiaq suliffeqarfimmik ilinniarfissamik qinnuteqaateqartut piukkunnartut 100-nit amerlanerupput.

Tamanna iliuuseqarfigineqartariaqarpoq, Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq, Nivi Olsen, Ineqarnermut Attaveqarnermullu Naalakkersuisoq, Knud Kristiansen, aamma Sulisitsisut Siulittaasuat, Henrik Leth, taamatut isumaqarput.

Qinnuteqartut suliffeqarfimmik sungiusarfissamik neqeroorfigineqartut 2009-mit 69-init 26-nut ikileriarnerat 2013-imi 2014-imilu sanaartortoqarpallaannginneranik pissuteqarpoq. Taamaalilluni sungiusarfissat affaat sinnerlugit ikileriarnikuupput. Sanaartornerilli nutaarpassuit ilinniarnermi sungiusarfissat amerleriaqqinnerannik kinguneqartariaqaraluarput.

”Soorunami ilinniartut suliassaqartinneqanngippata ilinniartoqartariaqanngilaq. Taamaattoqarpat ilinniarnermi sungiusarnissaq siunertaarutissaaq. Sanaartornerilli maannakkut amerleriaqqimmata pisortat namminersortullu suliffeqarfiisa ilinniartoqaqqilernissaat piffissanngorpoq”, Henrik Leth oqarpoq, tassungalu peqatigitillugu erseqqissarlugu pisortat sanaartornissamik pilersaarusiornerisa allanngorannginnissaa pingaaruteqartoq, suliffeqarfiit taamaalillutik sanaartukkat amerlassusaasa allanngorarpallaannginnissaannut piareersimaniassammata.

”Piginnaasalinnik taamatut qinnuteqartoqarnera iluarusunnartorujussuuvoq, tassungali peqatigitillugu taakku sungiusarfissaqannginnerat pissutigalugu maangaannartinneqartarnerat nikallornarpoq. Inuusuttut ilinniarnissaat tamatta soqutigisaraarput, taamaalillutik inuiaqatigiit ineriartornerannut peqataaniassammata”, Nivi Olsen Oqarpoq” Nivi Olsen oqarpoq, nangillunilu Kalaallit Nunaanni sanaartornerni tamani ilinniartoqarnissarput suli suliniutigissallugu.

”Amerlanerpaanik ilinniartoqalernissatsinnut tunngatillugu malittarisassat ullumikkut eqqortumik kajumilersitsisarnersut misissortariaqarparput,” Knud Kristiansen ilassuteqarpoq.

Siumut isigalugu suliniut taaneqarsinnaavoq internetimi sulisussarsiortarfik nutaaq takoqqusaarnissamut pitsaanerusumik periarfissaqalersitsisinnaasoq. Tamassuma saniatigut ilinniartut inissaqartinneqarnissaat Namminersorlutik Oqartussat isumagissavaat, aamma illoqarfinni Nuuk Sisimiullu assigalugit immikkut ilinniartunut inissaqarfiunngitsuni sanaartornernut atatillugu.

Annertunerusumik paasisaqarasukkuit, attaveqarfigiuk naalakkersuisumut allatsi Jens Frederik Nielsen jfni@nanoq.gl tlf. 345702