Kitsissunnguit pillugit paasissutissat pitsaanerusut

Namminersorlutik Oqartussat paasissutissiissutinik nutaanik, qeqertat Kitsissunnguit ilisimaneqarnerulernissaannut qulakkeerisunik saqqummersitsipput.

Kitsissunnguit (Grønne Ejland) qeqertaapput asseqanngitsut kusanartullu, imaannaanngilluinnartunik timmiaqartut. Qeqertat Kalaallit Nunaanniinnanngitsoq, aammali nunarsuarmi imeqqutaalaqarfiit annersaapput. Qeqertani imeqqutaallat saniatigut timmissat piaqqiortut assigiinngitsorpassuupput. Soorlu Imarpiup avannaani appat assigiinngitsut sisamat taakkunani piaqqiorput. Taamaalilluni qeqertat immikkooruteqarluinnarput, tamannalu pissutigalugu Kitsissunnguit ilaat timmissanik illersuivittut toqqarneqarsimapput.

”Kitsissunnguit Kalaallit Nunaanni timmiaqarfiit pingaarnerusut ilagaat, aammalu pinngortitap assigiinngissitaarnerujussua, masarsoqarfiit timmiarpassuillu peqqutaallutik pinngortitami sumiiffiuvoq asseqanngitsoq. Nunatsinnimi sumiiffinni allani timmissanik piaqqiortunik taamak amerlatigisunik soqanngilaq. Taamaattumik aamma sumiiffimmik ilisarisimanninnissarput aammalu sukkut angalasarnissatsinnik ilisimanninnissarput pingaaruteqarluinnarpoq. Paasissutissat pitsaasut atorlugit pitsaasumik illersuinissaq aammalu sumiiffimmik pitsaasumik atuinissaq anguneqarsinnaavoq”, Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko oqarpoq.

Qeqertat 2008-mili eqqissisimatitaasimapput. Aamma qeqertat Kalaallit Nunaanni sumiiffiit Ramsar-imut isumaqatigiissutip ataaniittutut toqqagaasimasut 12-uusut ilagaat. Rasar-imut isumaqatigiissut nunat tamalaat masarsoqarfinnik, timmissanut immikkut pingaaruteqartunik illersuinissamut isumaqatigiissutigaat.

Paasiuminartumik paasititsiniaaneq
Qeqertani pinngortitap asseqanngitsup maleruagassallu sumiiffimmut atuuttut ilisimaneqalernissaat qulakkeerniarlugu Namminersorlutik Oqartussat takornarianut naqitamik, kiisalu sumiiffimmik atuisunut naqitamik annikinnerusumik suliaqarput. Naqitat takornariartitsisarfinnut, katersugaasivinnut, atuakkanik atorniartarfinnut aamma Qaasuitsup Kommunianut nassiunneqassaaq.

Takornarianut naqitaq oqaatsit pingasut – kalaallisut, danskisut tuluttullu – atorlugit suliarineqarpoq. Takornariat qeqertani pinngortitap kulturillu nalinginik, taamaalillunilu sumiiffiup taassuma asseqanngitsutut eqqissisimatinneqarneranik paasisaqarnerorusuttut siunnerfiupput.

Naqitami minnerusumi maleruagassat atuuttut, najukkami suliaqartunut, soorlu aalisartunut piniartunullu, ukiup ingerlanerani piffissani assigiinngitsuni atisuusunut iluaqutissatut saqqummiunneqarput.

Qeqertat aamma namminneerlutik nittartagaqarput: (www.kitsi.gl). Nittartakkami pinngortitaq qeqertanilu timmissat ilaat pillugit annertunerusumik atuagaqartoqarsinnaavoq.

Annertunerusumik paasisaqarusunnermi Naalakkersuisup allattaa Elise Uupi Kuitse, Toqq: +299 34 54 14, e-mail: eukl@nanoq.gl imaluunniit allaffimmi pisortaagallartoq Karen Anne Arleth, Toqq: +299 34 54 65, e-mail: knar@nanoq.gl attaveqarfigineqassapput.