Atasinnaasumik isumalluutinik atuineq pillugu issittumi workshopperneq

Qanoq ililluta aatsitassaatitsinnik atuinissaq qulakkeersinnaavarput – aappaatigullu inuiaqatigiinni atasinnaaneq aammalu issittumi avatangiisit qajannartut atajuarnissaat qulakkeerinnissinnaavarput?

Tamanna Nuummi Hotel Hans Egedemi oktobarip 7-ianit 9-at ilanngullugu worksoppertitsisoqarmat, apeqquterpassuit akissutissarsiniakkat ilagaat. Immikkut ilisimasallit, atorfilittat politikerillu nunani issittuni allaneersut soorlu USA-meersut, Canadameersut Islandimeersullu workshoppimi ilaapput, issittumi nunani aatsitassarsiorfiusuni unammilligassat, taakkununngalu aaqqiissutaasinnaasunik oqaasertaliipput.

Aaqqissuussami anguniakkat ilagaat inuiaqatigiinni tamarmi - illoqarfimmiunit namminersortut suliassaqarfiiniittunit, inuiaqatigiinni inuinnarnit pisortallu suliaqarfianiittunit misilittakkanik katersillunilu pingaarnersiuinissaq. Nunat aatsitassarsiorfinngorsimasut malillugit, aatsitassarsiornikkut atajuartumik pilersitsissagaanni tamanna aqqutissaasoq paasineqarsimammat.

”Nunap immikkoortuani aatsitassarsiorfiusumi eqqaamiut inuiaqatigiillu qanittumiittut innimigalugit qanoq atasinnaasumik aatsitassarsiorsinnaanissatsinnut, ilanngussanik naleqarluartunik pivugut, taamaattumillu aaqqissuussaq una iluaqutaalluinnarpoq”, Anda Uldum, Aningaasaqarnermut Aatsitassanullu Naalakkersuisoq naammagisimaarluni taama oqarpoq, nangillunilu:

"Ingammik nuannaarutigaara kalaallit nunanilu allamiut saqqummiinerisa katiterneqarnerat. Nunani allani aatsitassarsiornermik suliniutinik iluatsilluartunik isumassarsitinneqarpugut, aammali uagut kalaallit aaqqiinissamut najoqqutassiavut avammut isumassarsiassatut saqqummiunnissaannut periarfissinneqarpugut."

Vittus Qujaukitsoq, Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq oqarpoq: ”Kalaallit Nunaanni aatsitassaatitta iluaqusiinissaannut, suliffiit nutaat tungaatigut ineriartornerullu tungaatigut, qulakkeerinnittarnerput issittumi nunat allat naligingivut tusarakku nuannaarutigingaarpara. Allaallu pissutsit ilaanni siuarsimanerulluta. Matumani minnerunngitsumik eqqarsaatigivara suliffinnik amerliartortitsinissamut inatsisigut periarfissaqartitsimmata aammalu Kalaallit Nunaanni aatsitassanik suliarinninnermut tunngatillugu piumasaqaateqarsinnaagatta. ”

”Misilittakkatigut ikioqatigiinnissaq aammalu issittumi avatangiisitsinnik sunnertiasunik pitsaanerpaamik illersuinissatta qulakkeernissaa pingaaruteqartuaannarpoq. Kalaallit avatangiisinut maleruagassiaat nunani tamalaani maleruagassianut tamakkiisumik nallersuunneqarsinnaapput, tamannalu tulluusimaarutigisinnaavarput”, Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko oqarpoq.

Ulluni pingasuni workshoppertitsineq Aatsitassanut Ikummatissanullu Naalakkersuisoqarfiup, Inuussutissarsiornermut, Suliffeqarnermut, Niuernermut Nunanullu Allanut Naalakkersuisoqarfiup, kiisalu Pinngortitamut, Avatangiisinut Inatsisinullu Atuutsitsinermut Naalakkersuisoqarfiup Amerikamiut nunanut allanut ministereqarfiat suleqatigalugu aaqqissuuppaat.


Inussiarnersumik inuulluaqqusillunga
Med venlig hilsen



Anda Uldum, Aningaasaqarnermut Aatsitassanullu Naalakkersuisoq

Vittus Qujaukitsoq, Inuussutissarsiornermut, Suliffeqarnermut, Niuernermut Nunanullu allanut Naalakkersuisoq

Mala Høy Kúko, Pinngortitamut, Avatangiisinut Inatsisinillu Atuutsitsinermut Naalakkersuisoq


Paasissutissat annertunerusut:

Aningaasaqarnermut Naalakkersuisoqarfik: Attavigiuk, tusagassiinermi ataqatigiissaarisoq Martin Christiansen, mobil: 221533

Inuussutissarsiornermut, Suliffeqarnermut, Niuernermullu Naalakkersuisoqarfik: Attavigiuk, Naalakkersuisoqarfimmi pisortaq Jørn Skov Nielsen, e-mail jsn@nanoq.gl imaluunniit oq.: 55 61 88