Imminut toquttarneq pillugu pinaveersaartitsinermi suleriaaseq

Imminut toquttarneq pillugu pinaveersaartitsineq pineqartillugu kikkulluunniit iliuuseqaqataasinnaapput. Tamanna ulluni 11.- 13. oktober Nuummi Peqqissutsimut Naalakkersuisoqarfiup ASIST malillugu misiligutaasumik pikkorissaanissamini aalaavigissavaa.

ASIST (Applied Suicide Intervention Skills Training) tassaavoq pikkorissaanermi missingiutitut atorneqartoq Canada-mi LivingWorks-imit ineriartortinneqarsimasoq imminullu toquttarnermik pinaveersaartitsinerup iluani nunarsuarmi ilinniakkat siuarsimanerpaat ilaattut naatsorsuutigineqartoq.

-”Imminut toquttarneq pillugu akuliunnissatsinnut tamavitta periarfissaqarpugut. Inummik ajornartorsiuteqartumik naapitsinitsinni isaassinissatsinnut aperisinnaanissatsinnullu sapissuseqartariaqarnerput matumani pineqarpoq. ASIST malillugu pikkorissaaneq nuna tamakkerlugu siaruartinneqarpat imminut toquttarnerup pinaveersaartinniarnerani peqataanissaannut sakkussaannik aalajangersimasunik innuttaasut neqeroorfigisinnaalissavavut. Neriuppunga neqeroorummut tassunga amerlasuut ilassinnilluarumaartut" Peqqissutsimut Naalakkersuisoq Doris Jakobsen oqarpoq.

ASIST tassaavoq imminut toquttarnerup pinaveersaartinnissaanut piginnaaneqalersitsisumik sungiusaanissamik siunertaqartoq. Imminut toquttoqartinnagu ikiuunnissamut sakkussat sunniuteqarluarsinnaasut pikkorissarnermi pissarsiarineqassapput aammalu pikkorissaaneq imminut toquttarnerup pinaveersaartinniarnera eqqarsaatigalugu najukkami attaveqaatinik pilersitsinissamut iluaqutaasussaalluni. ASIST 16-inik ukioqalereersimasunut qanorluunniit ittunik tunuliaqutaqarlutillu misilittagaqartunut imminut toqunnissamik sioorasaarisunut ikiueqqaarnissamut piumassuseqartunut nukissaqartunullu tamanut naleqquppoq.

- ”ASIST-ip Kalaallit Nunaanni misilittagaqarfigilernissaa anguniarlugu inunnik pingaarnerusumik inissisimasunik toqqakkanik nunatsinni piffinnit assigiinngitsunit aggersunik "misiligummik pikkorissaaqqaarallassaagut" Inunnik pingaarutilinnik inissisimasunik misiliguteqaqqaarnissami siunertaavoq ASIST-ip sapinngisamik pitsaanerpaamik nunatsinnut naleqqussarneqarnissaata qularnaarneqarnissaa,” taama oqarpoq peqqissutsimik suliaqarnermi siunnersorti Tina Evaldsen.

ASIST-ip 2016-imi Kalaallit Nunaannut tamarmut siaruartinnissaa pilersaarutaavoq. Tamanna pissaaq najukkami ASIST-ip atornissaanut sungiusaasussanik najukkanilu pikkorissaasinnaasunik ilinniartitsinikkut taamaalilluni assersuutigalugu Nuummit ilinniartitsiartortunik utaqqisariaqarani. ASIST-ip atornissaanut pikkorissaanerit siulliit tuluttut ingerlanneqassapput kingornali ASIST-imit atortussat tamarmik kalaallisuunngortinneqassapput.

Imminut toquttarnerup pinaveersaartinnissaanut suliniut ”Kalaallit Nunaanni Imminut Toquttarnerup Pitsaaliornissaanut Nuna Tamakkerlugu Periusissaq 2013-2019”-imi allaaserineqarsimavoq”. ASIST-ip atornissaanut pikkorissaanerit imminut toquttarnermut pinaveersaartitsissutaasut suliniutit najukkanut pituttornissaannut sammisut periusissami pingaarnertut suliniutigineqartussaapput.

Annertunerusumik paasisaqarusukkaanni peqqussutsimik suliaqarnermi siunnersorti Tina Evaldsen oqarasuaatikkut +299 34 66 35 imaluunniit e-mail tiew@nanoq.gl-ikkut attavigineqarsinnaavoq.