Kangerlussuarmi mittarfiup siunissaa pillugu oqaloqatigiinnerit pitsaasut

Qeqqata Kommuniani Borgmesteri, Hermann Berthelsen aammalu Ineqarnermut, Sanaartornermut Attaveqaqatigiinnermullu Naalakkersuisoq, Knud Kristiansen pingasunngornermi 7. oktober 2015 pitsaasumik siunnerfeqarluartumillu Kangerlussuarmi mittarfik pillugu ataatsimeeqatigiipput.

Kangerlussuarmi mittarfiup qanoq issusia suli misissorneqarpoq, taamaattorli misissuinerit killiffiisa inernerigallagaat tunngavigalugu, aammalu misissuinerit inaarutaasumik naammassineqarneranni pissutsit allanngorsinnaanerat mianeralugu, Naalakkersuisunut Ilaasortaq Borgmesterimut paasissutissat ullumikkut pigineqartut aallaavigalugit ilisimatitsivoq mittarfiup qanoq issusia aallaqqaammut ilimatsaassamit pitsaanerusoq, taamaammallu mittarfiup takissusaata 1800 meterit missaannut (2800 meteriusumiit) annikillineqarneratigut mittarfik ingerlatiinnarneqarsinnaasoq, taamaattorli aamma mittarfiup immikkoortua ammatiinnarneqarsinnasoq taanna iluarsaattariaalluni.

Tamatuma eqqumaffigisassaanera innersuussutigalugu Borgmesteri aammalu Naalakkersuisunut ilaasortaq peqatigiillutik sulissutiginiarpaat pissutsit nutaat atuutilerumaartussat aallaavigalugit periarfissaasinnaasut qulaajartissallugit. Naalakkersuisunut Ilaasortap naqissuserlugu erseqqissaatigaa pissutsinut naapertuunnerusumik, umiarsuarnut takornariartaatinut ilaasut nikittarfissaannik umiarsualivimmik pilersitsisoqarnissaanik kissaateqarneq Naalakkesuisut tungaannit allanngortinneqanngimmat, kissaat taanna umiarsualivinnik suliassaqarfiup pilersaarusiorneqarnerani, Naalakkersuisunit ukioq naatinnagu akuerineqarumaartutut naatsorsuutigineqartumi ingerlatiinnarneqassaaq.

  • Inissisimaffik ullumikkut killiffigisarput aallaavigalugu pitsaanerpaamik angusaqarniartariaqarpugut. Siunissamut tunngatillugu qanittumik oqaloqatigiinneq aammalu suleqatigiinneq aqqutigalugit aningaasaliinissamik pisariaqartitsineq qulaajarteqqissaarniarparput, taamaaliornikkut Kangerlussuup mittarfianut aammalu atortulersuutinut mittarfimmut attuumassuteqartunut tunngatillugu aaqqiissummik siunissaq ilanngullugu attanneqarsinnaasumik ilusilersuisinnaajumalluta, borgmesteri aammalu Naalakkersuisunut ilaasortaq isumaqatigiillutik oqarput.

Sukumiinerusumik paasisaqarusukkaanni saaffigineqarsinnaasut:
Borgmesteri allatseqarfiani v/ Helga Olsen Lennert +299 867306
Naalakkersuisup allattaa Jensine Berthelsen +299 345450/+299 562303