Naqqiissut - Kangerlussuaq

Ippassaq 8. oktober 2015 radioaviisimit apersorneqarlunga kukkuluttornikkut ersernerluttuliortoorpunga, taamaalillungalu tassunga atatillugu Kangerlussuarmi mittarfiup qanoq issusia pillugu paatsuungassutaasinnaasumik oqaaseqarlunga.

Aallarniutigalugu erseqqissumik oqaatigissavara, Kangerlussuup mittarfiata qanoq issusia pillugu aammalu tamatuma malitsigisaanik sillimaniarnermut tunngatillugu apeqqutit pilersinneqartut pingaaruteqarluinnartutut isigigakkit, taamaattumillu suliaq pillugu atorfilittakka uannut ilisimatitsisassasut piumaffiginikuugakkit, taamaaliornikkut mittarfiup qanoq issusia pillugu erseqqissumik ilisimasaqarnissarput qulakkeerneqarsinnaaqqullugu. Suliaq ataavartumik ingerlanneqarpoq, taamaammallu paasissutissat ingerlaartinneqartut annertuujullutik, aammalu mittarfiup qanoq issusianut tunngatillugu paasissutissat teknikkimut tunngasortai qaffasissorujussuullutik.

Atorfilittakka ataatsimiinnermi 7. oktober 2015 Mittarfeqarfiit og Grontmij A/S peqatigalugit ingerlanneqartumi kingullermik ilisimatinneqarput, tamanna pivoq Kangerlussuarmi, Ilulissani aammalu Nuummi mittarfiit qanoq issusiinik isiinnarnik takuneqarsinnaasunik nalilersuereernerup kingorna paasissutissanik kingullerpaanik tunineqarlutik. Paasissutissallu ataatsimiinnermi tassani tunniunneqartut tunngavigalugit, ajuusaarutigisannik paasissutissanik ingerlatitseqqinnera paatsuungalersitsisinnaavoq. Tamatumali allanngortinngilaa, Kangerlussuarmi nutarterinissamik pisariaqartitsineq annertoorujussuummat, taamatuttaaq aalajangiisuummat, ukiut qaninnerit ingerlanerini pitsanngorsaanerit annertuut ingerlanneqartariaqarmata, Kangerlussuup mittarfittaata ingerlaannarnissaa qulakkeerneqassappat.

Taamaattorli Kangerlussuup mittarfittaata qanoq issusia pillugu paatsuunganerit pilersinnaasut pinngitsoortikkumallugit, matumuuna oqaaserisimasakka naqqiissuteqarfigissavakka, ilisimatitsissutigalugulu Kangerlussuarmi mittarfiup takissusaa tamarmiusoq tassalu 2810 meter x 60 meter-iusoq tassungalu ilanngullugu sillimanissaq pillugu takinerussutaa tamarmi ullumikkut atorneqarsinnaammat.

Apersorneqarninni oqaatigisara 300 meter-inut tunngasoq tassaavoq mittarfiup takissusaanut tamakkiisumut ilaasoq, aallaaviatigullu miffigineqarsinnaasut aammalu qangattalernermi atorneqarsinnaasoq - aamma ullumikkut.

Taamaattorli mittarfiup qanoq issusiata kingunerisaanik mittarfiup kivissinnaasaanut tunngatillugu oqimaassutsimut tunngasut killilersuutit atuutsinneqarput. Tamanna isumaqarpoq, oqimaassutsimut killilersuutit atuuttut, mittarfiup nalunaarsuiffiatigut (AIP) ilisimatitsissutigineqartut tunngavigalugit, Air Greenland-ip timmisartorsua Airbus aasaanerani taamaallaat kitaaniit kangumut missinnaavoq taamatuttaaq aallalernermini taamaallaat kangianiit kimmut qangattarsinnaalluni.

Siuliani allassimasunut tunngatillugu apeqqutinik itisiliisitsisoqarusussaguni, tamanna pillugu uannut Naalakkersuisoqarfinnullu saaffiginnissuteqarsinnaavusi.

Inussiarnersumik inuulluaqqusillunga


Knud Kristiansen