Tunumi saarullinniarsinnaanermut akuersissutit 30-t

Tunumi umiatsiaararsorlutik aalisartut 30-nit ikinnerunngitsut saarullinniarsinnaanermut akuersissutinik qinnuteqartut Aalisarnermut, Piniarnermut Nunalerinermullu piffissami kingullermi akuerineqarput.

Naalakkersuisoqarfimmit Tasiilap eqqaani umiatsiaararsorlutik aalisartunit aatsaat taama amerlatigisunik qinnuteqarneq maluginiarneqarpoq.

Tunumi ukioq manna misileraalluni aalisartoqarpoq. Misileraalluni aalisarnermut atatillugu aalisariutinut misileraasunut piumasarineqarpoq Tunumi umiatsiaararsortunit aamma tunitsivigineqartassasut.

Umiatsiaararsorlutik aalisartut umiarsuarmut tunitsiviusumut Christian Høymut tunisinissaminnut aamma periarfissaqartinneqarput.

Umiarsuaq tunitsiviusoq sinerissap qanittuani misileraalluni aalisarsinnaanissaminut akuersissuteqartoq,
Tasiilap eqqaani aalisartunit tunitsivigineqarsinnaasunngorlugu aamma akuerisaavoq.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi allaffimmi pisortaq, Jóhanna Lava Køtlum. Mail: jool@nanoq.gl