Utoqqalinersiat pillugit aaqqissuusseqqinneq

Utoqqalinersiat pillugit aaqqissuusseqqinnerup utoqqaat aningaasatigut inissisimanerat annertuumik pitsanngortissavaa

Utoqqalinersiat pillugit KNR-imi ilanngussami ukiut soraarninngorfissat 64-iniit 66-imut qaffanneqarnissaat sammineqarpoq.

Utoqqalinersiallit atugaat pitsanngortinneqarnissaat Naalakkersuisut kissaatigaat, taamaattumillu aningaasatigut inissisimanerat annertuumik pitsanngortinniarlugu aaqqissuusseqqinnissamik saqqummiussillutik.

Utoqqalinersiallit sivisuumik sulereerlutik utoqqalinersiuteqalernissaminnut ileqqaagaqarsimasut utoqqalinersiaqalerunik aaqqissuusseqqinneq aqqutigalugu aningaasanik annertunerusunik atugassaqalissapput.

Aaqqissuusseqqinnermi utoqqalinersiat annertusineqassapput, taamaasillutik utoqqaat aningaasanik amerlanerusunik atugassaqalissallutik. Aappariit utoqqalinersiallit nalinginnaasut utoqqalinersiaat ukiumut 10.000 kr.-ingajannik qaffaavigineqassapput.

Ilutigalugu utoqqaat namminneq angerlarsimaffimminniiginnarnissaminnik kissaateqartut akeqanngitsumik angerlarsimaffimmi ikiorteqarnissaat eqqunneqassaaq.

Ukiut soraarninngorfissat 65-iniit 66-imut 2017-imi qaffanneqassaaq, 67-inullu 2021-imi. Innuttaasunulli minnerpaamik ukiuni 35-ini timikkut tarnikkullu assoroornartumik sulisimasunut ukiut soraarninngorfissat 2021-imi 6-inut qaffanneqassapput 2025-imilu 67-inut.

Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen oqarpoq, ”Utoqqalinersiat pillugit aaqqissuusseqqinnerput arlalinnik pitsanngoriaatinik imaqarpoq, soorluli innuttaasut sulillutik nungullarsimasut aamma eqqarsaatigineqartut. Innuttaasut amerlasuut timikkut assoroornartumik sivisuumik sulisimallutik nungullarsimapput, soorlu aalisartut piniartullu, tunisassiorfinni sulisut, eqqiaasut il.il.. Nungullarsimasunut ikaarsaariarnermi aaqqiissutinik immikkut ittunik sananikuugatta, taakkua 65-inik ukioqalerunik utoqqalinersiaqalernissaminnut suli periarfissinneqassapput. Ajoraluartumik tamanna KNR-ip ilanngussaani ilaatinneqanngilaq.” ilassutigalugulu oqarluni, ”Utoqqalinersiat pillugit aaqqissuusseqqinnermi soraarninngornissamut ukioritinneqartut nalinginnaasumik qaffakkiartornera innuttaasunut aarlerinanngitsumik periarfissanik malitseqassaaq, innuttaasut sivisuumik sulereerlutik nungullarsimasut ikiorniarlugit”.

Utoqqalinersiallit inuuneqqortusiartornerat utoqqaallu amerliartortillugit utoqqalinersianik aaqqissuusseqqinneq pisariaqartinneqarpoq, soorlu ilaat suli ukiualunni suliffeqarfimmiissallutik taavalu ileqqaagaqartarnissaq pikkoriffiginerulertariaqarluni.

”Nuannerpoq inuuneqqortusiartornerput tamannali aamma isumaqarpoq, timikkut tarnikkulluunniit nungullarsimanngikkaanni, suli ukiualunni sulinissarput qaffanneqartariaqartoq.”, Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen naggasiivoq.

Utoqqalinersiat nutaat pillugit Naalakkersuisut siunnersuutaat sisamanngorneq 8. oktober siullermeerneqassaaq.