Naalakkersuisup MIO-mut akissutaa

MLO foto

Pingasunngorneq ulloq 7. oktober sermitsiaq.ag-mi allaaserisami meeqqanut inuusuttunullu kinguaassiutitigut atornerlunneqarsimasunut suliniuteqarnissamik amigaateqartoqarnera pillugu MIO-p Naalakkersuisunut isornartorsiuinertik oqaatigaat, taavalu taakkununnga tunngatillugu suliniutit nukittorsarniarlugit Naalakkersuisut pilersaarutertik saqqummiutissagaat kissaatigalugu. 

Naalakkersuisup MIO isumaqatigaa meeqqat inuusuttullu kinguaassiutitigut atornerlunneqarsimasut pisaarnerpaamik ikiorneqartariaqartut. Taamaattumik meeqqanut inuusuttunullu kinguaassiutitigut atornerlunneqarsimasunut Naalakkersuisut suliniutertik nukittorsarniarlugu annertuumik suliniuteqarput, tassani ilanngullugu najukkami ikiorneqarsinnaanissaat qulakkeerniarlugu. Taamaasilluni meeraq inuusuttorluunniit atornerlunneqarsimanermi kinguninngua piaartumik ikiorneqarsinnaanissaa qulakkeerniallugu. 

Tarnip pissusaannik ilisimasalinnik psykoterapeutinillu meeqqanik inuusuttunillu kinguaassiutimikkut atornerlunneqarsimasunik katsorsaasinnaasunik amigaateqarnerput ilisimaneqarluarpoq. Taamaattorli meeqqat taakkua ikiorneqarnissaat qulakkeerniarlugu ujartuinissatsinnik unitsitsinngillat. Taamaattumik nuna tamakkerlugu meeqqanut inuusuttunullu kinguaassiutitigut atornerlunneqarsimasunut saaffiginnittarfik Saaffik ukiuni kingullerni nuna tamakkerlugu sumiiffinni sulisut ilinniarsimasut piginnaasaannik qaffassaanikuuvoq, taamaasillutik kinguaassiutitigut atornerluinerit siusinaartumik paasineqartarniassammata iliuuseqarfigineqarlutillu. Ernumassutsimut uuttuut pillugu pikkorissaaneq nuna tamakkingajallugu ingerlanneqarnikuuvoq, Ilulissat, Sisimiut, Nuuk Ittoqqortoorlu minillugit. Pikkorissaanerit taakkua ukiuni tulliuttuni ingerlanneqassapput, malitsigisaanik pikkorissarnertalerlugit taamaasilluni pikkorissarnermi ilisimasat tunniunneqartut atorneqarnissaat qulakkeerniallugu. Pikkorissaanerit kommunit, peqqinnissaqarfiit politiillu suleqatigalugit ingerlanneqarput, taakkualu tamarmik akuersaarlutik nalunaaruteqarnikuullutik. 

Aammattaaq Angalaqatigiittartut – inersimasunik meeraanerminni kinguaassiutitigut atornerlunneqarsimasunik katsorsaanermi suliniutinik ingerlataqarpoq, ilutigalugu sulisunik ilinniarsimasunik kinguaassiutitigut atornerluinerit siusinaartumik naammattoortarnissaat pinaveersaartinnissaallu pillugit pikkorissaallutik.    

Aammattaaq Saaffik pinartoqartillugu angalaqatigiittartoqarpoq, meeqqat inuusuttullu kinguaassiutimikkut atornerlunneqarsimasut pillugit tapersersuinissamut  ikiuinissamullu pisariaqartitsisunut ornillugit illoqarfinnut angalasartunik. Taakkua saniatigut Saaffik meeqqanik inuusuttunillu sullissisunik sulisunik ilinniarsimasunik taavalu meeqqat inuusuttullu kinguaassiutimikkut atornerlunneqarsimasut angajoqqaavinut siunnersuisarpoq aqqutissiuussisarlunilu. 

Meeqqat inuusuuttullu kinguaassiutimikkut atornerlunneqarsimasut pillugit suliniutit annertusarnissaat Naalakkersuisup pingaartittorujussuuaa. Taamaattumik suliniutit annertusarnissaat pillugu sulineq ingerlaannassaaq, taamaasilluni meeqqat inuusuttullu kinguaassiutimikkut atornerlunneqarsimasut ikiorneqarnissaminnik pisariaqartitsinertik pisinnaatitaaffitsillu pisinnaaniassammatigit. 

Qularutigineqassanngilaq meeqqat inuusuttullu kikkuugaluarunik atornerlunneqartussaanngitsut. Taamaattumik meeqqat inuusuttullu taakkua sapinngisamik pitsaanerpaamik inuuneqarnissaat pillugu sulinissaq suleqatigiinnissarlu pingaaruteqarpoq. Taamaattumik aamma meeqqat inuusuttullu tamarmik saaffigisinnaasaanik MIO sms-ikkut siunnersuisarfimmik pilersitsisimanera Naalakkersuisut nuannaarutigisorujussuuaat. Ingammik meeqqanut inuusuttunullu sinerissami najugaqartunut pingaaruteqarpoq ikiorneqarnissamut aqqutissiuunneqarnissamullu saaffissaqarnissaq. Meeqqanut taakkununnga alloriarneq pingaarutilik tassaavoq ikiorneqarniarluni aqqutissiuunneqarniarlunilu saaffissaqarnissaq, taannalu meeqqat inuusuttullu atornerlunneqarsimasut ammasumik oqarsinnaanissaannut pingaaruteqarpoq.  

Inussiarnersumik inuulluaqqusillunga
Martha Lund Olsen
Ilaqutariinnermut, Naligiissitaanermut Isumaginninnermullu Naalakkersuisoq


Paasissutissat allat pissarsiarineqarsinnaapput Martha Lund Olsen-imut attaviginninnikkut, naalakkersuisup allattaa Sina Møller Kristiansen oqarasuaat 53 93 71 aqqutigalugu.