Ukiuni amerlanerusuni atuartarnerup nassataanik pujortartut ikinnerusarput

Ilinniarluarsimasut inunnit ukiualunnguani atuarsimasunit malunnartumik pujortannginnerusarput, ukiullu qulikkuutaat marluk kingulliit ingerlaneranni inooriaatsip assigiinngissusaa annertusisimalluni. Innuttaasunik misissuinerup kingulliup tamanna takutippaa.

Inuit inooriaasiat taamalu peqqissusaat ilinniagaqarsimanermut atugarissaartuunermullu attuumassuteqarluinnarput. Tamanna erseqqilluinnartumik takuneqarsinnaavoq innuttaasut pillugit misissuisimanermi Peqqissutsimut Naalakkersuisoqarfimmit ullumi saqqummiunneqartumi. Pujortarnermut tunngatillugu tamanna erseqqarinnerpaavoq, aammali imigassamik hashimillu atornerluineq innuttaasuni atugarliornerpaani malunnartumik annertuneruvoq.

-”Pitsaaliuilluni peqqissutsimillu siuarsaalluni suliaqarnermut tunngatillugit pingaaruteqarpoq pitsaaliuilluni peqqissutsimillu siuarsaalluni suliniutit innuttaasunut pujortarnermik ikiaroortarnermillu ajornartorsiuteqarnerpaasunut sammitinneqarnissaat”, oqarpoq Peqqissutsimut Naalakkersuisoq Doris Jakobsen nangillunilu:

”Tamanna ilutigalugu erseqqippoq peqqinnissatigut naligiikkunnaariartortoqarnera annikillisarniarlugu susassaqartut tamarmik suleqatigiittariaqarnerat. Tassani innuttaasut inuuniarnikkut atugaat isigisariaqarpavut: inissianik peqqinnartunik pissarsisoqarsinnaa¬va? Innuttaasut ilinniagaqarnissamut periarfissaat tunngavissaallu qanoq ippat? Suliffissaqarpa? Naatsumik oqaatigalugu, innuttaasut peqqissumik pitsaasumillu inuuneqarnissaannut pisariaqartinneqartut pigineqarpat?”

Pujortarnermi inuuniarnikkut naligiinngissuseq
Peqqissutsikkut kingunerusartut kisiisa isigisaanni pujortarneq assersuunneqarsinnaan-ngitsumik Kalaallit Nunaanni innuttaasut peqqissusaannut ajornartorsiutaanerpaavoq. Pujortarneq nappaaterpassuarnut, toqujaartarnermut pitsaasumillu inuuneqarnissamik annaasaqartarnermut pissutaasarpoq.

Inuit ilinniagaqanngitsut 67 %-ii pujortartuupput. Inuit akunnattumik sivisussusilimmik imaluunniit sivisuumik ilinniagallit akornanni tamanna allatut isikkoqarpoq, taakkunannga angutit 44 %-ii arnallu 47 %-ii pujortarput.

Tassa qaffasissumik ilinniagallit pujortarnerat malunnartumik annikilliartorpoq, ukiullu 20-t kingulliit ingerlaneranni pujortarnermi ileqqut assigiinngissusaat annertusiartorsimalluni. 1993-imi ilinniarluarsimasut akornanni pujortartut amerlanerungaatsiarsimapput. Ullumikkut taakku pujortarunnaarsimapput, inuilli ilinniagaqanngitsut suli pujortarlutik.

Peqqissutsimut Naalakkersuisoqarfik pujortarnerup pitsaaliorneqarnissaanut iliuusissatut pilersaarusiorpoq, taanna 2015-ip naanerani naammassillugu suliarineqassasoq naatsorsuutigineqarpoq.

Paasissutissanik allanik pissarsiniaruit attavigiuk Peqqissutsimut Naalakkersuisoq Doris Jakobsen allattaa Rosa Thorsen aqqutigalugu, oqarasuaat +299 55 33 03 sianerfigalugu imaluunniit e-mail rosat@nanoq.gl allaffigalugu

Takussutissiaq.