Kommuneqarfik Sermersooq-mi silaannakkut angallassinerup ineriartortinneqarnissaanut allorissaaqatigiittoqarpoq

Kommuneqarfik Sermersooq-mi Borgmesteri, Asii Chemnitz Narup aammalu Ineqarnermut, Sanaartornermut Attaveqaqatigiinnermullu Naalakkersuisoq, Knud Kristiansen ippassaq ataasinngornermi 5. oktober 2015 pitsaasumik siunnerfeqarluartumillu ataatsimeeqatigiipput Kommuneqarfik Sermersooq-mi silaannakkut angallassinerup ineriartirtinneqarnissaa pillugu.

Ataatsimeeqatigiinnermi Borgmesterip ilisimatitsissutigaa 2016-mut ukiunullu missingersorfiusunut tulliuttunut Kommuneqarfik Sermersooq-p missingersuutaa, tassani erseqqissarpaa Kommunemut pingaaruteqartorujussuusoq ilisimassallugu ilumut attaveqaqatigiinnermut tunngatillugu pilersaarutit annertoorujussuit piviusunngortinneqarumaarnersut, matumani pingaartumik Nuummi mittarfiup tallilerneqarnissaanut pilersaarutit tamatumalu saniatigut Tunup avannaarsuani mittarfiup Ittoqqortoormiinut qaninnerusumut nuunneqarnissaa aammalu Tasiilap qanittuani mittarfiliornissamik pilersaaruteqarneq eqqarsaatigalugit.

Tamatuma kingorna Ineqarnermut, Sanaartornermut Attaveqaqatigiinnermullu Naalakkersuisoq silaannakkut attaveqaqatigiinnerup ineriartortinneqarnissaanut pilersaarutit, poortatut Inatsisartunut saqqummiussani pillugit killiffimmik nassuiaateqarpoq, nammineq isummani malillugu pingaaruteqartorujussuunerarpaa Nuup aammalu Ilulissat mittarfiisa tallilerneqarnissaat piaartumik aallartinneqarnissaat, taakku mittarfiit naammassiaarneqarpata qularnanngimmat silaannakkut angallannermi attaveqaqatigiinnermik ineriartortinniarneqartut sinneri iluaqutissinneqartussaammata, matumani aamma sanaartugassanut angisoorsuarnut aningaasalersuineq eqqarsaatigalugu. Knud Kristiansen-ip naqissuserlugu erseqqissaatigaa Inatsisartut aalajangersaanissaannut nammineq isumalluartorujussuunerarluni, aammalu naatsorsuutigalugu Naalakkersuisut pilersaarutaat Inatsisartunit ilalerneqarumaartut.

Borgmesterip Naalakkersuisunilu ilaasortap naammagisimaarluarpaat, Naalakkersuisut pilersaarutaat tunngavigalugit, atorfilittat akornanni eqaatsumik siunnerfeqarluartumillu suleqatigiittoqarmat, ataatsimoorlutillu matumani tusagassiuutitigut nalunaaruteqaqatigiinnerminni Inatsisartunut nalunaallisikkusuppaat Naalakkersuisut Kommunelu Kommuneqarfik Sermersooq-mi silaannakkut angallannerup ineriartortinneqarnissaa pillugu suleqatigiilluartoqarmat allorissaaqatigiilluartoqarmallu, aammalu neriuutigivaat Inatsisartut allorissaaqatigiinnermi peqataalluassasut, tamannalu pisinnaasoq pilersaarutip poortukkatut ilusilikkap ingerlanneqarnissaannut Inatsisartut Naalakkersuisunut periarfissiinerisigut, taamaalillutillu suliassap taassuma inuiaqatigiinnut pingaaruteqaqisup, tassalu attaveqaqatigiinnerup ineriartortinneqarnissaanut pisinnaatitsissummik Inatsisartut tunniussinerisigut.

Naalakkersuisut aalajangiiffigisassatut siunnersuutaat Inatsisartut siullermeerlugu oqaluuserissavaat sisamanngornermi 12. november 2015 tamatumalu kingorna pilersaarutaasutut suna tamarmi ingerlassappat inaarutaasumik suliarissavaat pingasunngornermi 2. december 2015.

Nalunaarummut matumunnga itisiliisitserusuttoqassappat attavigineqarsinnaapput:
Kommuneqarfik Sermersooq-mi attaveqaqatigiinnermut siunnersorti Lars Damkjær +299 367511 / +299 563120
Naalakkersuisup allattaa Jensine Berthelsen +299345450 / +299562303