Inuttaasumik ataatsimiititsineq uummarissumik ingerlanneqarpoq

Siusinaartumik pensionisianik utoqqalinersianillu aaqqissuusseqqinneq pillugu Ilulissani innuttaasunik ataatsimiisitsineq uummaarissoq

Ulloq 5. oktober Ilulissani Hotel Icefiordimi siusinaartumik pensionisianik utoqqalinersianillu aaqqissuusseqqinnissamut Naalakkersuisut siunnersuutaat paasisaqarfiginiarlugu innuttaasut alapernaatsut 30-it missaat takkupput.

Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen innuttaasunik ataatsimiisitsinermi peqataavoq siunnersuutillu pingaarnersiorlugit saqqummiullugit kingornatigullu aperinissamut periarfissiilluni.

Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen oqarpoq:

”Pitsaasumik innuttaasunik ataatsimiisitsivugut arlalinnik pitsaasunik apeqqutitalimmik. Inuit ataasiakkaat ulluinnarni inuunerinut sunniutilimmik allannguileraangatta innuttaasut oqaloqatiginissaat pingaaruteqarpoq. Taamaattumik innuttaasut tusaasinnaasariaqarlutigillu naapissinnaasariaqarpavut.”

Nangillunilu, ”Siusinaartumik utoqqalinermilu pensionisiat nutaamik aaqqissuussiffiginerisigut, nunatsinni sanngiinnerpaanut iliuuseqaatigisartakkavut nutarteriffigivagut. Innuttaasut tamarmik sapinngisartik naapertorlugu nunatsinnik kivitseqataaniartussaapput. Pisinnaasut tamarmik peqataatinneqartariaqarput. Kikkut tamaasa pisariaqartippagut. Innuttaasut piginnaasatigut qaffassaavigineqarnissaat isiginiarlugit amerlasuut pilersorneqarnermiit pilersueqataanissamut nuutsikkiartorniarsarissavagut.

Innuttaasunik ataatsimiisitsinermi tamanna paasineqarluarpoq”.

Nutaamik siusinaartumik pensionisianut utoqqalinersianullu siunnersuutit pillugit
Siusinaartumik pensionisianik Naalakkersuisut aaqqissuuteqqinnissaannut siunertaavoq siusinaartumik pensionisiallit sulisinnaasut amerlanerit suliffeqarnermut akuutinnissaat, suliffinni pisortanit tapersersukkani immikkut atugassaqartitaalluni imaluunniit piginnaanngorsaqqinnermut suliniuteqarnikkut suliffinni nalinginnaasuni.
Naak utoqqaat amerliartoraluartut sivisunerusumillu inuusaleraluartut, isumaginninnikkut aningaasaqarniarnikkullu imminut napatissinnaasumik utoqqalinersianik pilersitsinissaq Naalakkersuisut aaqqissuusseqqinnerannut siunertaavoq.
Tunngavik ”Pisinnaatitaaffiit pisussaaffiillu pissakinnerillu sammineqarnerullutik” atorlugit utoqqalinersiallit ilungersunartumik inissisimasut atugaat pitsanngorsarnissaat Naalakkersuisut kissaatigaat.

Taamaattumik Naalakkersuisut pilersaarutigivaat sulilersitseqqinniaasarnernut akunnattunillu suliassaqartitsisarnernut immikkut qanoq iliuuseqarniarnermikkut suli amerlanerusut ulloq ilaannaanniluunniit sulilersinniarnissaat aqqutissiuunniarneqassasoq, tamatumali siusinaartumik pensionisiaqalersinnaanissap tungaanut ingerlaaseqartut immikkut iliuuseqarfigisarnerisigut. pitsaaliuinerit aqqutiginiarneqartarumaartut.

Paasissutissat allat pissarsiarineqarsinnaapput Martha Lund Olsen-imut attaviginninnikkut, naalakkersuisup allattaa Sina Møller Kristiansen oqarasuaat 53 93 71 aqqutigalugu.