Inatsiseqarnermi qaffatsitsinissaq

Inatsiseqarneq annertuumik pisariaqartinneqartumillu qaffatsinneqartariaqarpoq. Ullumikkut inatsiseqarnermi suliaqarfiit arlallit piffissamut naleqqutinngillat, taakkununngalu kingornussisarnermut inatsit, qanilleqqusaannginnermut peersinneqartarnermullu inatsit, toqusoqartillugu piginnittut nikinnerannut inatsit, eqqartuussisarnermut inatsit, pinerluttulerinermut inatsit aamma piginnittut aappaasunut nikinnerannut inatsit ilaapput. Inatsiseqarneq suli tiguneqanngilaq, taamaattumillu Pinngortitamut, Avatangiisinut Inatsiseqarnermullu Naalakkersuisup Mala Høy Kúko-p danskit Inatsisinik Atuutsitsinermut Ministereqarfiat suliassaqarfimmi nutartereqqullugu qinnuigaa.

Naalakkersuisoq Mala Høy Kúko oqarpoq: "Inatsisinik Atuutsitsinermut Ministereqarfiup inatsisinik atuutsitsinermi inatsisinik nutarterinissaq pisariaqartoq takusinnaammagu, aammalu immikkoortortamik, nunanik Imarpiup avannaaniittunik suliaqartussamik pilersitsisimammat nuannaarutigaara. Naalakkersuisut Inatsisinik Atuutsitsinermut Ministereqarfik suleqatigilluarpaat, aammalu danskit Inatsisinik atuutsitsinermut Ministeriat Søren Pind uangalu inatsiseqarneq naleqqussarniarlugu innuttaasullu inatsisitigut isumannaassusiat pitsanngortinniarlugu suliassamik pingaarutilimmik taassuminnga suleqatigiilluta suliaqarnissatsinnut qilanaarpunga."