Kangaamiuni inuussutissarsiutinut seminareqarneq

Kangaamiuni inuussutissarsiutinut seminareqarnermi Vittus Qujaukitsoq aamma Karl-Kristian Kruse peqataapput

Kangaamiuni inuussutissarsiutit pillugit pissanganartumik sapaatit akunnerata naanerani oktoberip 3.aamma 4.ni seminarertoqarmat Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq Vittus Qujaukitsoq aammma Aalisarnermut, Piniarnermut Nunalerinermullu Naalakkersuisoq Karl-Kristian Kruse peqataapput. Nunaqarfimmi aqutsisut soqutigisaqaqatigiinnik assigiinngitsunik seminarertitsinermi nunaqarfimmi inuussutissarsiornikkut pitsanngorsaatissanik nutaanik oqallitsitsipput.

Kangaamiut nunaqarfittut allatuulli angallannikkut attaveqaqatigiinnikkullu ajornartorsiuteqarpoq, nassiussiniarnikkut angallassinikkullu naammanginanngitsunik atugassaqarlutik. Naak tunitsivimmi annertunernik tunisassiorsinnaangaluartut nunaqarfimmilu suliffissanik amerlanernik pilersitsisinnaangaluartut, tunitsiviup qerititsiviat tamaviaartillugu atorpaat.

Aalisarnerup saniatigut nunaqarfimmiut takornariaqarnikkut sullissinissaminnut pilersaarusiorsinnaanikkut pitsaasumik inissisimapput. Kangerlussuatsiamut qanittumiipput, taamaasillutillu takornarianut pissanganartunik takornariartitsisinnaapput tunisassaqarsinnaallutillu, soorlu sisorarlutik takornarianut, umiarsuanut takornariartaatinut ilaasunut Kangaamiunullu tikeraarlutik takornariartunut.

Inuussutissarsiorneq pillugu seminarertitsinermi peqataasut suleqatigiinnut sisamanut eqimattanngortinneqarput uku qulequtaralugit: aalisarneq, takornariaqarneq, nunami suliffissat aamma inuussutissarsiutit nutaat.

Eqimattaniillu ukua tikkuartorneqarput:

Takornariaqarneq pillugu eqimattamit kissaatigineqarpoq, Visit Greenland suleqatigalugu umiarsuit takornariartaatit pillugit seminarertitsisoqassasoq, nunaqarfimmiut tikinneqarneranni kaaviiaartitat amerlisinneqarsinnaaniassammata, aamma nunaqarfimmiut takornariaqarnikkut ineriartortitseqataaniassappata sullissinermik paasisimasaqarnerulernissaat anguniarlugu pikkorissaasoqassasoq.

Aalisarnermut eqimattamit tikkuarneqarpoq annikippallaamik qerititsiveqarniarneq aamma nassiussiniarnikkut periarfissalunneq Kangaamiuni aalisarnikkut ineriartortitsiniarneq tulattarfiullu pitsanngorsarneqarnissaanut aporfeqartut. Suleqatigiissitaliortoqarpoq kommunalbestyrelsemullu inuussutissarsiutitigut ineriartortitserusunneq pillugu saaffiginissuteqassapput

Nunami suliffissat pillugit eqimattamit sammineqarput, suliniutit nutaat nukissiuutinik atuinerulernissamik kinguneqartussat. Suliniutini ikitsuinnarni nukissiuutit nutaat sammineqartarsimapput, taamaattumik nukissiuutinik nutaanik misileraalluni suliniutissanut aningaasaliissutissanik immikkoortitsisoqarnissaa pingaaruteqarpoq. Suliniutit nutaat ineriartortinniarneqarneranni suliffeqarfiit pilersuisut suleqatigigalugit ingerlanneqartariaqarput.

Inuussutissarsiutit nutaat aamma oqallisigineqarput. Takornarianut unnuisarfiit pioreersut atorluarneqarnissaannut periarfissat aamma eqqartorneqarput, soorlu takornariat tikittarfiisa avataatigut suliffissaaleqisut pikkorissarneqarnerannut atorneqartarsinnaasut. Eqimattamit kissatigineqarpoq nunaqarfimmiut akornanni suleqatigiinnissaq aamma nunani allamiunik suleqateqarnissaq pisariaqartoq.
Nunaqarfimmiunit aamma soqutigineqarpoq pisanik Kangerlussuarmi Hudson Resourcesip piiaavianut toqqaannartumik tunisaqartarnissaq.

Naalakkersuisunut ilaasortaq Karl Kristian Kruse oqarpoq: ”Seminareqartitsinissamut aaqqissuussineq nuannaarutigaara. Malugilluarsinnaavaralu Kangaamiormiut ineriartortitsinissaq pillugu eqqarsaatersuuteqarluarsimasut. Maluginiagassaavorlu pitsaasumik suliniartoqartoq, nunaqarfimmiullu unammillernartunik atugassaqartitaammata tapersersuinissaq pisariaqarpoq.”

Naalakkersuisunut ilaasortaq Vittus Qujaukitsoq nangilluni ima oqarpoq: ” seminarertitsinermi isumassarsiat pitsaasut piviusunngortinnissaat pillugit Naalakkersuisut aamma Qeqqata Kommuniata akornnanni suleqatigiilluarnissaq erinigaara. Kangaamiuni aningaasarsiornikkut suliffissaqartitsiniarnikkullu ineriartortitsiniarnermut siunnersuutigineqartunut iluaqutaasinnaasunik Inuussutissarsiutinik ineriartortitsinissamut aningaasaliissutaasunik atuinissinnaanissaq misissuataassuarput. Aamma ilanngullugu oqaatigaa: ”Nunaqarfinni ineriartortisiniarnermi periarfissat imaluunniit periarfissaqannginneq eqqarsaatiglugu INI, Nukissiorfiit, KNI og RAL tunngaviatigut pingaaruteqarput. Sulinitsinnilu pingaaruteqarpoq suliffeqarfissuit aamma kommunit nunaqarfinnilu aqutsisut ineriartortsiniarneq pillugu peqataatissallugit.”

Annerusumik paasisaqarniaraanni attavissat: Naalakkersuisoqarfimmi pisortaq: Jørn Skov Nielsen mobil 556188 imaluunnnit Naalakkersuisoqarfimmi pisortaq Jørgen Isak Olsen mobil 483135.