Sap. ak. 41-ip qulequtaa: Tarnikkut innarluutit

Ukioq manna innarluutillit pillugit sapaatip akunnera 41-mi tarnikkut innarluutit qulequtaritinneqassaaq

Sapaatip akunnerani 41-mi “Tarnikkut innarluutit” ukioq manna qulequtarineqassasoq Ilaqutariinnermut, Naligiissitaanermut Isumaginninnermullu Naalakkersuisup aalajangiuppaa, tassani skizofreni immikkut isiginiarneqassasoq.

Innuttaasut amerlasuut tarnimikkut anniaateqarput innuttaasunut taakkununnga ataasiakkaanuinnaq attuinatik aammali avatangiisaannut arlalitsigut attuisunik.

Tarnikkut anniaatit inunnguuserineqarsinnaapput kisiannili aamma tassanngaannartumik takkussinnaallutik. Assersuutigalugu innuttaasut 3 %-ii tikillugit inuunermi ilaanni tarnimikkut perulunnermik eqqorneqassasut naatsorsuutigineqartarpoq.

Tarnikkut perulunnermut peqqutaasartut ilisimaneqanngillat, kingornussinikkulli atukkat aamma sananeqaatitigut sunniutit, assersuutigalugu aanngajaarniutinik atuineq, tassanngaannartumik imaluunniit sivisuumik tarnikkut artorsarneq imaluunniit taakkua akuleriisikkaanni tarnikkut anniaateqalernermik kinguneqarsinnaavoq.

Skizofreni sakkortuumik tarnikkut anniaataavoq eqqarsartaatsimik, misigissutsinik, malugisaatinillu sunniisartoq. Skizofreni atoraanni piviusuunngitsut piviusullu akuleriisinneqarsinnaasarput, - immaqa eqqumalluni sinnattupiluttarnertut assersuunneqarsinnaalluni.

Skizofrenertulli tamarmik arlaatigut katsorsarneqartariaqartarput – soorlu nakorsaatinik oqaloqatiginninnikkullu katsorsaanikkut. Inuit skizofrenimik nappaateqartut siusinaartumik ikiorneqaraangamik pitsaanerusarpoq. Tallimaagaangata ataaseq tikillugu katsortarpoq napparsimaneranillu ersiutaaruttarluni.

Inuit skizofrenertut timiminnik atuisinnaanerat annertuumik apparsinnaasarpoq innarluutillillu pillugit inatsisiliorneq malillugu ikiorneqartariaqarsinnaallutik.

Tarnikkut anniaatit / skizofreni pillugit sammisaqartitsinissanut aaqqissuussinissanullu tapiissutinik qinnuteqarnissamut periarfissaqarpoq.

Tapiissutinik qinnuteqaat nassiunneqassaaq uunga:

IPIS, Ilaqutariinnermut, Naligiissitaanermut Isumaginninnermullu Naalakkersuisoqarfik – kingusinnerpaamik 14. september 2015.  Qinnuteqarnissamut immersuiffissaq immersorneqassaaq, nassiunneqarlunilu mailikkut uunga IPIS@nanoq.gl imaluunniit allakkatigut najukkamut uunga: IPIS, Postboks 970, 3900 Nuuk imaluunniit faxikkut uunga fax nr. 32 42 98.

 

 

Attaveqaatissaq: Jane Justsen, e-mail jaju@nanoq.gl  Oqarasuaat 34 69 52