Aalisakkat sinnikui tunisassiarineqarsinnaasariaqarput

Karl-Kristian Kruse: Aalisakkat sinnikui tunisassiarineqarsinnaasariaqarput

-Naalakkersuisut soqutigivaat aalisakkat tunisassiatut suliarineqaraangata sinnikuisa aamma tunisassiatut suliarineqartarsinnaannginneri misissussallugu, Aalisarnermut, Piniarnermut Nunalerinermullu Naalakkersuisoq, Karl-Kristian Kruse oqarpoq.

Naalakkersuisuni ilaasortaq Kangaamiuni inuussutissarsiutit pillugit oktobarip pingajuanni aamma sisamaanni peqataassaaq. Nunaqarfiup aqutsisuisa isumaqatigiissitsineq aaqqissuussaraat. Isumasioqatigiinnermi inuit arlallit saqqummiussaqartussaapput. Oqalugiartullu ilagissavaat Karl-Kristian Kruse.

Naalakkersuisuni ilaasortaq, Karl-Kristian Kruse, erseqqissaavoq Naalakkersuisut suleqatigiissitamik maannakkut pilersitsissallutik sulissuteqartut, pineqartumut attuumassuteqartut suleqatigiissitami ilaasortaassallutik, soorlu aamma aalisarnermut attuumassuteqartut ilaasortaassasut. Suleqatigiissittap aalisakkat tunisassiarineqartut sinnikui, tunisassiarineqarneq ajortut, qanoq amerlatigineri qulaajassavai. 

- Aalisakkat sinnikuinik tunisassianik qanoq nutaaliortoqarsinnaanersoq misissuiffigineqassaaq, inatsisitigullu qanoq periarfissiisoqarsinnaanera aamma misissorneqassalluni. Misissuinerup siunertarissavaa inuussutissarsiortut aalisakkat sinnikunik qanoq atorluaatigisinnaanissaat qulaajassallugu, Karl-Kristian Kruse oqarpoq.

Naalakkersuisuni ilaasortap ilaatigut oqaatigaa qeqqussat nerisassanut akuliullugit nerisarineqartarneri nunatsinni nunanilu avannarlerni soqutigineqaleriartuinnartoq.

- Issittup qeqquaasa tunisassiarineqartarnissaasa ineriartortinneqarnissaannut periarfissaqarluarpoq, nunatsinni aalisarnermut piniarnermullu tapertaalluakutsoorsinnaallutik, Karl-Kristian Kruse oqarpoq.

 

 

Attavigineqarsinnaavoq: Aalisarnermut, Piniarnermut Nunalerinermullu Naalakkersuisoqarfimmi pisoqartaq, Jørgen Isak Olsen. Mail: jio@nanoq.gl.