Suleqatigiinnissamik isumaqatigiissuteqaqqinneq

Peqqissutsimut Naalakkersuisoqarfik aamma CSR Greenland suleqatigiinnissamik isumaqatigiissuteqaqqipput.

Peqqinnissaq pillugu maannamut suleqatigiinnertik pitsaasup ingerlaannarnissaa Peqqissutsimut Naalakkersuisoqarfiup aamma CSR Greenlandip qularnaarusuppaat. Taamaammat suleqatigiinnissamik isumaqatigiissutip 2012-imeersup nutarternissaa illuatungeriit aalajangerpaat.

Suleqatigiinnissamik isumaqatigiissuteqarnikkut Peqqissutsimut Naalakkersuisoqarfik aamma CSR Greenland suliffinni peqqinnissamik siuarsaalluni suliniuteqarnerup siaruarternissaanut ataqatigiissaarinerup suleqatigiissutiginissaanik imminnut pisussaaffilerput. Illuatungeriit isumaqatigiissutigaat peqqinnissamik suliniuteqarneq ataqatigiissarluarlugu aallartinneqaruni sunniuteqarluarnerussasoq, taamaalillutik siaruarterinerminni imminnut ikorfartoqatigiissagamik.

-”Inuit ullut tamaasa nalunaaquttap akunnerpassuini suliffimminniittarput. Taamaattumik sulisorisamik piffissami sulineranni peqqissuunissaat suliffeqarfiit suliffiillu akisussaaffigaat. Taamaattumik CSR Greenlandip suleqatigiinnarnissaa isumaqatigiissutigeqqikkatsigu nuannaarutigaara taamaalilluni peqqinnissamik siuarsaanermi suliat suliffeqarfinnut taakkualu sulisuinut sammisut suleqatigiissutiginissaannik ataqatigiissinnissaannillu qularnaarinninnissaq ingerlaannassammat”, Peqqissutsimut Naalakkersuisoq, Doris Jakobsen oqarpoq.

Brian Buus Pedersen, CSR Greenlandimi Siulersuisuni siulittaasoq ilassuteqarluni ima oqarpoq:
-”Suliffinni peqqissuunissap suliniutigineqarnissaa CSR Greenlandip ilaasortaasa pissusissamisoortutut isigaat, kalaallillu suliffeqarfiutaat maannangaaq assersuutigalugu nerisaqarnermut politikkeqareerput taamatullu timigissarnissamut assigisaannillu periarfissaqartitsereerlutik. Sulisorisat peqqissut napparsimanertik pissutigalugu sulinngitsuukulaannginnerupput ulluinnarnilu nukissaqarnerusarlutik, tamannalu sulisunut ataasiakkaanut, suliffeqarfinnut inuiaqatigiinnullu iluaqutaavoq. Taamaattumik qanimut suleqatigiinneq aamma peqqissumik inooriaaseqarnissap sammineqarnissaa pillugu pisortanik suleqateqarluarnissaq isumalerujussuuvoq.”

Peqqissutsimut Naalakkersuisoqarfiup aamma CSR Greenlandip Kalaallit Nunaanni suliffeqarfinni pujortarunnaarnissamik siunnersortitut ilinniartitsineq, suliffeqarfinnut peqqinnissamut isumassarsiorfissaq, suliniut "Take a Stand" issiaannarluni sulinermut tunngasoq kiisalu sulliffimmi peqqissuunissaq pillugu Chris MacDonald-imik oqalugiartitsinermik siusinnerusukkut suleqatigiissutigisimavaat.

Annertunerusunik paasissutissarserusuttut attaveqarfigisinnaavaat:
Peqqissutsimut Naalakkersuisoq Doris Jakobsen Naalakkersuisup allataa Rosa Thorsen aqqutigalugu oqarasuaatikkut +299 55 33 03 imaluunniit e-mail rosat@nanoq.gl
Imaluunniit
CSR Greenlandip siulersuisuini siulittaasoq Brian Buus Pedersen CSR Greenlandimi Suliniuteqarnermi suleqataasoq Pia C. Bang aqqutigalugu oqarasuaatikkut +299 36 37 16 imaluunniit e-mail pia.c.bang@csr.gl