Pinngitsaaliinermik pinerluuteqarsimasut katsorsartariaqarput

Ulloq 7. september KNR-mi nutaarsiassaqartitsivik internetikkut imatut qulequtalimmik saqqummiussaqarpoq: "Kalaallit Nunaat agguaqatigiissillugu kinguaassiuutitigut pinngitsaaliiffiunerpaavoq".   Qulequtarineqartoq isumaqalersitsivoq Kalaallit Nunaat nunarsuarmi kinguaassiuutitigut pinngitsaaliinerpaaffiusartoq.  Kisitsisit takullugit sakkortupput ernumalersitsillutillu, taamaattorli pissusiviusunik tamakkiisumik takutitsinatik. 

KNR-imi kisitsisit danskit aviisianniit Metroxpress-imit pisuupput, kinguaassiuutitigullu pinngitsaalinerniit nunarsuaq tamakkerlugu assersuutaasuneersuullutik.   Nunanut assigiinngitsunut kisitsisitigut assersuussisarnerit nalorninartoqarsinnaasarput.   Kalaallit Nunaanni unnerluussisarnerit nunanut allanut sanilliullugit amerlanerupput, soorluttaarlu assersuussiniarnermi kisitsisit taartorsuit, nunallu akornanni inatsisitigut isiginneriaatsit isiginiarneqarneq ajorlutik.

Misissuinernik annertuunik ilisimatusarnermik aallaaveqartunik peqarpugut, soorlu "Nunatsinni inuusuttut inuunerat" (2011), tassanilu inuiaqatigiiussutsitsinni kinguaassiuutitigut innarliisarnerit qanoq annertutigineri ittuunerilu tatiginartumik takutinneqarput.   Misissuinermi taakkunani takuneqarsinnaavoq ajornartorsiummik angisuumik unammisassaqartugut, kinguaassiuutitigullu innarliisarnerup akiorniarnissaanut ersarinnerusumik sulinissarput pisariaqartinneqartoq.

Kalaallit arnartaasa kinguaassiuutitigut innarliisarnerit annerusumik naaggaarfigilermatigit, tamakkulu politiinut nalunaarutigisalermatigik ajunngilluinnartutut isigaara.   Arnat annersaanernik kinguaassiuutitigullu innarliinernik unnerluussisalernerat tapersersuinnassallugu pisariaqarpoq. 

Inunnik isumaginninnermut akisussaasutut pingaartutut suliassanut ilaavoq kinguaassiuutitigut annersaasarnerup pinaveersaartinneqarnissaa.  Tamanna ilaatigut innarliisimasunut katsorsartinnissamik neqeroortalernikkut pisinnaavoq, taamaaliornikkut annersaalluni pinerluuteqaqqinnissaq pinaveersaartinneqarsinnaammat.   Aammattaaq suliniummik aallartitsisimavugut, taannalu aqqutigalugu qimarnguiit ilaqutariinnullu sullissiviit ataqatigiinnerulernissaat qulakkeerneqassaaq.   Kinguaassiuutitigut pinngitsaaliisarnerit pinaveersaartinnerulernissaat akerlerinngilara. 

Suliaqarfiit akimorlugit suleqatigiinnissarput pingaaruteqarpoq. Tassunga atatillugu nuannaarutigaara Naalakkersuisuni suleqatigisakka arlallit annerusumik suleqatigiittoqarnissaanik kaammattuimmata.   Tassunga ilaatigut taaneqarsinnaapput imigassap ajortumik sunniuteqarsinnaanera, atornerluisuunermullu katsorsartilluarnissap qanoq pingaaruteqartiginera.  Suliniutit tamarmik Naalakkersuisut aallartissimasaat aqqutigalugit meerartatta inuusuttortattalu inuiaqatigiinni toqqissisimasuni kinguaassiuutitigut innarlerneqarnissamik aarleriffiunngitsumi perornissaat qulakkeerneqassaaq.  

Naggasiutigalugu erseqqissassavara kinguaassiuutitigut pinngitsaaliisarneq pinerluttuliornertut kanngunartuliornertullu Naalakkersuisut isigimmassuk, tamannalu inuiaqatigiinni akueriumannginnatsigu.   Arnat kinguaassiuutitigut pinngitsaalineqarsimasut amerlaqisut misigissutsimikkut innarlerneqarsimapput, soorlu imminut pisuutinneq, kanngusunneq imminullu avoqqaarineq - amerlaqisullu - pingaartumik niviarsissat - isumaqartarput kisimiillutik.   Kisimiinnginnerat pillugu oqariartuuteqarfigissallugit pingaaruteqaqaaq, inuiaqatigiittullu ikiussallugit piareersimagatta oqarfigissallugit aamma pingaaruteqarluni. 

Inussiarnersumik inuulluaqqusillunga.

Martha Lund Olsen

Ilaqutariinnermut, Naligiissitaanermut Isumaginninnermullu Naalakkersuisoq 

 

 

 

Allanik paasisaqartoqarusuppat attavigineqassaaq: Sina Møller Kristiansen, Ministerip allattaa, Oqa. 34 69 49 E-mail: nimk@nanoq.gl