Inatsisartut inatsisaannik nutarterinissamik isumaqatigiissut

Radiomik TV-millu ingerlatsineq pillugu Inatsisartut inatsisaannik nutarterinissamik isumaqatigiissut

Naalakkersuisut aamma Siumut, Atassut Demokraatillu ”Tusagassiutit nukittuut aamma inuuiaqatigiit nukittuut” pillugit 2015-imut Aningaasanut inatsimmi isumaqatigiissummut ilaassutissatut isumaqatigiissuteqarput.

2016-imut isumaqatigiissut timitalerniarlugu Naalakkersuisut, KNR-ip pilerisaarutinik aallakaatitsisinnaanermut periarfissaanut tunngasumik inatsisinut allannguutissatut siunnersuusiorsimapput.

Tusarniaanerup ersersissimavaa KNR-imit pilerisaarutit peerneqarneri siunertaanngitsunik sunniuteqassasoq, soorlu suliffeqarfiit innuttaasunut siunissami qanoq ilillutik attaveqartarnissaannut tunngasutigut. Naalakkersuisut taamaammat isumaqatigiissummut peqataasut saaffigisimavaat ilassutaasumillu isumaqatigiissut una isumaqatigiissutigisimallugu. Ilassutaasumik isumaqatigiissummiippoq Naalakkersuisut inatsimmut allannguutissamik nutaamik, susassaqartut naapertuutinngitsutut tikkuarsimasaat tapullugit siunnersuusiussasut.

Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq oqarpoq:

”Tusagassiornermik suliaqartut tusarniaanermut akissutaannut peqqissaartumik suliarineqarsimasunut qutsavigaakka nuannaarutigaaralu Radiomik aamma TV-mik ingerlatsineq pillugu Inatsisartut inatsisaat nangillugu suliarisinnaagatsigu taamaalillutalu allannguutissatut siunnersuutissap suliarilluarnissaanut periarfissaqalerluta, inatsiseqalerniassagatta tamatta piginnittutut misigiffigisatsinnik naammagisimaakkatsinnillu.”

Annertunerusumik paasisaqarusukkaanni Naalakkersuisoqarfimmi pisortaaneq, Mikael Kristensen, e-mail: mkri@nanoq.gl, saaffigineqarsinnaavoq.