Aningaasarsiornikkut siunnersuisoqatigiit siunnersuutit isiginianngilaat

Aningaasarsiornikkut siunnersuisoqatigiit Naalakkersuisut isumaginninnikkut nutarsaanerminni siusinaartumik utoqqalinermilu pensionisiat pillugit allannguiniarnerat qarsupittumik isiginiarpaat.

Nunatsinni Aningaasarsiornikkut Siunnersuisoqatigiit ukiumoortumik nalunaarusiartik saqqummiuteqqammerpaat, tamatumanilu taaneqarsimallutik Naalakkersuisut siusinaartumik utoqqalinermilu pensionisiaqartitsisarnernik aaqqissuusseqqinniarnerat.

Tamatumani uggornaateqanngitsuunngilaq Aningaasaqarnermut Siunnersuisoqatigiit aaqqissuusseqqinnermi isumaginninnikkut allannguutissatut anguniarneqartut isiginiarpallaarsimanngimmassuk, akerlianilli ukiuni qaninnerpaani aningaasatigut kingunerisassai kisiat isiginiarsimallugit.

Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen tamatumunnga tunngatillugu imak oqariartuuteqarpoq: ” Siusinaartumik utoqqalinermilu pensionisiat nutaamik aaqqissuussiffiginerisigut, nunatsinni sanngiinnerpaanut iliuuseqaatigisartakkavut nutarteriffigivagut. Innuttaasut tamarmik sapinngisartik naapertorlugu nunatsinnik kivitseqataaniartussaapput. Pisinnaasut tamarmik peqataatinneqartariaqarput. Kikkut tamaasa pisariaqartippagut. Innuttaasut piginnaasatigut qaffassaavigineqarnissaat isiginiarlugit amerlasuut pilersorneqarnermiit pilersueqataanissamut nuutsikkiartorniarsarissavagut.”

Isumaginninnikkut ajornartorsiutigut aaqqiiviginiarlugit maannakkut iliuuseqaateqarnissarput
Siusinaartumik pensionisiaqartitsisarnermi nutarterinerup siunertarivaa innuttaasut suli amerlanerusut pitsaanerusumik inuuneqalernissaasa aqqutissiuunneqarnissaa. Maannakkut siusinaartumik pensionisiaqartut akornanni ilaannakortumilluunniit sulisinnaassuseqartut sulilernissamut aqqutissiuuttariaqarpagut. Amerlasuummi suliffeqarnermut uteriaallassinnaapput – pisariaqassappat suliffinnut immikkut aaqqissuussanut imaluunniit piginnaanngorsarneqa-reernikkut suliffinnut nalinginnaasunut sulilernissamut aqqutissiuunnerisigut.

Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen oqariartuuteqarpoq: ”Amerlanerit tatigineqarlutik inuiaqatigiit ingerlanneqarneranni kivitseqataanissamut periarfissinneqassagamik allannguinerit inuunerminnut pitsaanerulersitsisutut misigiumaarpaat. Taamaasiornikkut ilaqutariit atugarissaarnikkut qaffariaallatsinneqassapput, tamatumali kingunerisaanik kinguaariit akornanni ajornartorsiutaasartut anigorniarnissaanut periarfissagissaarnerulissallutik. Siusinaartumimmi pensionisiaqalertariaqartarneq amerlasuunut nuannerneq ajorpoq tamatumali kingunerisaanik atornerluisuunermik isumaginninnikkullu atugarliuuteqarnernik kinguneqartitsisarlutik. Innuttaasut amerlasuut taamatut misigisarnerat mumisikkiartuaarneqassaaq. Taamaattumillu isumaginninnikkut aaqqissuusseqqinnissaq piffissamut sivisuumut isiginnilluni nalilersuiffigineqartariaqarpoq, aatsaammi ukiut arlalialuit qaangiuppata isumaginninnikkut aningaasartuutaasartut appariartuaartinneqalersinnaassammata.”

Tamakkorpiaallu Aningaasaqarnermut Isumasioqatigiit nalunaarusiornerminni eqqumaffiginngitsoorpaat.

”Pissutsit pisarnertut ingerlatiinnarsimassagaluarutsigit inuiaqatigiinnut inunnullu ataasiakkaanut isumaginninnikkut ajortumik kinguneqaleriartuinnarsimassagaluarput, inuiaqatigiillu ingerlatsinerminni artukkerneqartutut misigileriartuinnarsimassagaluarlutik.”
Taamaattumik Naalakkersuisut pilersaarutigivaat sulilersitseqqinniaasarnernut akunnattunillu suliassaqartitsisarnernut immikkut qanoq iliuuseqarniarnermikku suli amerlanerusut ulloq ilaannaanniluunniit sulilersinniarnissaat aqqutissiuunniarneqassasoq, tamatumali siusinaartumik pensionisiaqalersinnaanissap tungaanut ingerlaaseqartut immikkut iliuuseqarfigisarnerisigut pitsaaliuinerit aqqutiginiarneqartarumaartut.

Paasissutissat allat pissarsiarineqarsinnaapput Martha Lund Olsen-imut attaviginninnikkut, naalakkersuisup allattaa Sina Møller Kristiansen oqarasuaat 53 93 71 imaluunniit e-mail nimk@nanoq.gl