Atsioqatigiinnermi Qujaukitsup oqalugiaataa

Qaqortorsuarmi Anorthositimik piiaanissamut akuersissummik IBA-millu isumaqatigiissuteqarnermik atsioqatigiinnermi Inuussutissarsiornermut, Sulisoqarnermut, Niuernermut Nunanullu Allanut Naalakkersuisup Vittus Qujaukitsup oqalugiaataa

Qaqortorsuarmi Anorthositemik suliniut pillugu ’Imapact Benefit Agreement’-mik pisortatigoortumik atsiornermut matumunnga siullermik tamassi tikilluaqqussavassi. Qeqqata kommunianut aamma the licensee Hudson Resources-imit aallartitanut, Sisimiuni IBA-mik atsiortussanut aamma tikilluaqqusissaanga.

Atortussiassat aammalu saviminissat arlalippassuit niuernermi akiisa ukiuni kingullerni appariartorneri pissutigalugu aatsitassanik piaanermik ingerlatsinerit iluanni suliat appariartoraluartut, taamaattoq suli qaamasoqarpoq – aamma Kalaallit Nunatsinni.

Qeqertarsuatsiaani rubininik piiaaffissap aallartinnissaanut Naalakkersuisut siorna akuersissuteqarput. Piiaaffimmik ingerlatsineq suliniummi tassani qanittumi aallartissinnaassasoq naatsorsuutigaarput.

Ullumikkut IBA-mik atsioqatigiinnermi kalaallit aatsitassanik piiaaffiisa nutaarnissaasa aappassaattut Hudson qaninnerulerpoq. Tamanna killiffiuvoq pingaarluinnartoq, Hudson-iinnaanngitsumut, kisianni aamma Kalaallit Nunatsinnut. Ulapiffiusussap tamatta utaqqigaatigut oqaatigisinnaallugu nuannaarutigaara.

IBA tassaavoq aatsitassanik piiaaffinni kalaallit sulisorisinnaanerinut piukkunnarsarnerini sivisuumik suliniuteqarnermi pingaarutilimmik tunngaviusut ilaat sakkussaalluartorlu, taamaaliornikkut Kalaallit Nunatsinni aatsitassanik piiaaffinnik suliniutinut aggersunut sumiuussuseq sunniuteqaqataatillugu.

 

Atsioqatigiinneq nunarsuarmi tamani aatsitassanik piiaanermi suliffissuarnut allamik sakkortuumik oqariartuuteqarpoq; Kalaallit Nunaanni aatsitassanik piiaaffinnik ingerlatsineq aallartippoq unitsitassaajunnaarluni, tamannalu nammanneqarsinnaasumik periuseqarfiulluni.

IBA-mut ilanngullugu Hudson Kalaallit Nunaanni kommuninik, suliffissaqarnermi susassaqatigiinnik ilinniarfinnillu qanimut suleqateqartussaavoq. Uanga nammineq isumaqarpunga tamanna pingaaruteqarluinnartuusoq suliniumullu nammanneqarsinnaasumik ineriartorsinnaasumut pinngitsoorneqarsinnaanngitsoq.

Suliniummi uani suliffimmik misiliiffissat ilinniartuuffissallu arlaqartut atuuttussatut ilanngussorneqarput, inissisimaffinni assigiinngitsuni sulisunik nutaanik sungiusarnermik ilinniartitaanermillu aaqqissuussinerit ilanngullugit.

Piiaaffimmut nioqqutissanik sullississutinillu ukiumoortumik pisisarnerit sumiiffimmut tunngaveqassapput. Sanaartornermi aamma tunisassiornermi killiffiit iluini suliffiit aalajangersimasut, soorlu assartuinermi, isumannaallisaanermi, nerisassanik ikummatissanillu pilersuinermi IBA-mi ilisarnaaserneqareerput kalaallit suliffeqafiinut tuttussatut.

Soorlu takusinnaagissi piiaaffimmik suliniut Kalaallit Nunatsinnut periarfissarpassuarnik ammaasuussaaq. Suliniut iluatsilluassappat susassaqartunut tamanut soorunami pilerinartuussaaq, aamma Hudson-imut. Isumaqarpunga susassaqartut tarmarmiullutik – IBA-mik isumaqatigiissutit uku atsiornerisigut – aqqutisarsisut tamanut iluaqutaaussamik.

IBA-mi susassaqartut tamaasa oqaloqatigiinnerit siuarsaqatiiffiusut pillugit qutsavigerusuppakka. Kalaallit Nunatsinni aatsitassanik piiaanermik suliffeqarfinngoriartornermini Hudson inuussutissarsiornerpalaartumik suliniuteqarpoq, anguniakkallu taama qanitsigilernera tulluusimaarutigaara. Suliniutip inuppassuarnut iluaqutaalernissaa, Qeqqata Kommuniani innuttaasut ilanngullugit, neriuutigaara.

Qujanaq.

 

Atsioqatigiinnermit tusagassiorfinnut nalunaarut uani atuaruk.