Qujaukitsoq takornariaqarnermik saqqummersitsinermi

Nunat Avannarliit Killerni angalaneq pillugu saqqummersitsinermi 2015-imi Vittus Qujaukitsoq peqataavoq

Inuussutissarsiornermut, Suliffissaqarnermutt, Niuernermut Nunanullu Allanut Naalakkersuisoq Vittus Qujaukitsoq ulluni makkunani Tórshavn-imi Nunani Avannarlerni Killerni  angalaneq pillugu saqqummersitsinermi peqataavoq. Kalaallit Nunaata, Savalimmiut aamma Islandip takornariaqarnerup pilerisaarutigisarnera pillugu suleqatigiinnerat ukioq manna ukiunik 30-nngortorsiorpoq.

Saqqummersitsinermi Kalaallit Nunaat peqataatitaqarluarpoq – nunatsinnilu takornariartitsisartut aasaanerani ulapissimanertik sumiiffinni arlaqartuni siuariarfiusumik nalunaaruteqarput.

”Takornariaqarluarnerani siuariarneq pillugu nalunaaruterpassuit soorunami nuannaarutigaakka – kisianni aamma unamminartorpassuit kalaallit takornariartitsisartut saassimasaat maluginiarpakka,” – Vittus Qujaukitsoq oqarpoq, nangillunilu:

”Pingaartumik angallannermut kiffartuussinermik isumaqatigiissutit amigaataaneri pissutigalugu aappaagumut angallannermut pilersaarutit ilisimannginnerini Kalaallit Nunaata pilerisaarutiginissaani unamminartut tusartuarpakka. Nunalunaarutaasoq angerlaatissavara tassunalu tunngasut qitiutinneqarnerunissaat qulakkeerlugu.”

Takornarianik angalatitsisartunut oqalugiarnermini Vittus Qujaukitsup ilaatigut oqaatigaa:

”Takornariaqarnermut nuna tamakkerlugu periusissanik nutaanik suliat Naalakkersuisut aallartereerpaat, 2016-imit 2020-mut atuuttussat, taakkulu ukiamut tusarsiutigineqassapput.

Umiarsuarnut takornariutinut tunngatillugu Kalaallit Nunaat 2010-miilli tikeraanik 67 %-inik appariaateqarpoq. Peqqutaasut ilagaat ilaasunut akitsuuti qaffasissut, Island-imit 17-eriaammik qaffasinnerusut. Taamaattumik akitsuutit Island assigilerlugu appartinnissaat Naalakkersuisut upernaaq akuersissutigaat.

Umiarsuarnut takornariutinut tulaassisinnaanermut atortulersuutit pitsanngorsaaffiginissaannut Nalakkersuisut ukiuni marlussunni aggersuni aningaasaliissuteqarniarput, umiarsualivinni toqqarneqartuni tikeraanik tulaassisinnaaneq ajornannginnerulersillugu, sukkanerulersillugu nuannernerulersillugulu.”

Vittus Qujaukitsoq nangilluni oqarpoq: ”Tikikkuminartuunerup pitsanngorsaaviginissaa Naalakkersuisut takuaat tassaasoq takornarialerisut sullitallu piumasarisaat, taamaattumik mittarfeqarfiit aaqqissugaanerinik misissueqqissaartitsivunga, takornariaqarneq qitiutillugu inissisimaffiusinnaasut qitiutillugit.

Misissueqqissaarnerup takutippaa assersuutigalugu Ilulissani Nuummilu mittarfiit allisinneri Københavnimit bilitsinik 30 % angullugit akikilliliinissamik periarfissiissasoq.

Takornariaqarnerup ineriartornera taperserniarlugu takornarissanik suliffeqarfinnut akuersissutinut tunngatillugu inatsisiliorneq Naalakkersuisut upernaaq manna naammassivaat. Tammajuitsussanik aallaaniarnermut eqalunniarnermullu akuersissutit piffissami aggersumi qinnuteqarfigineqarsinnaalissasut naatsorsuutigineqarpoq, taakku namminersorlutik takornarialerisunik tikeraartiminnut nuannernerusunik misigisassaqartitsinissaminnut aningaasaliissuteqarnissamut pilerisulersitseqataasussanik pisariaqartumillu isumannaatsuutitsisussanik. Tamanna aamma imminnut inuiaqatigiinnullu kalaaliusunut kaaviaartitanik annerulersitsissaaq.

Ilulissani UNESCO-p Nunarsuarmioqatigiit kingornutassaanni Isfjordscenterip pilersinnissaa pillugu RealDania-p, Qaasuitsup Kommuniata aammalu Namminersorlutik Oqartussat suleqatigiinnissamik isumaqatigiissutaat nittarsaatigisinnaagakku aamma nuannaarutigaara.

Taanna Kalaallit Nunaanni tikeraanut orniguuttarfiit siullersarissavaat. Orniguuttarfiup UNESCO-p nunarsuarmioqatigiinnut kingornutassamik, aamma silaannap pissusiata allanngoriartorneranik oqaluuserinnittarfiunerup saniatigut nerisassatigut misigisassanik tammajuitsussanillu nioqquteqarnermik neqerooruteqassaaq. Taanna tikeraartunut immikkuullarissunik misigisaqarfiussaaq, sumiiffimmini suliffissanik kaaviaartitsinermillu periarfissanik pilersitsisunik. Sanaartorneq aappaagu aallartissangatinneqarpoq katillugit 108 mio. koruunit missaat missingersuutigalugit, orniguuttarfillu naammassiguni 2018-ip ingerlanerani tikeraanut ammarnissaa naatsorsuutigineqarpoq.

Isfjordscenteri Kalaallit Nunaanni tikeraat siunissami orniguuttarfissaannut allanut maligassiuisuussaaq. Sumiiffinni periarfissaasut eqeersimaartumik atorluarsinnaaneri iluaqutigalugit nunap immikkoortuini misigisaqarfiusinnaasut annertusarnissaat pingaaruteqartuuvoq.”

 

Naalakkersuisoq Vittus Qujaukitsoq Torshavnimi borgmesterilu Heðin Mortensenilu.

Itinerusumik paasisaqarusukkuit Inuussutissarsiornermu, Suliffissaqarnermut Niuernermullu naalakkersuisoqarfiup pisortaa Jørn Skov Nielsen atassuteqarfigiuk, e-mail jsn@nanoq.gl imlt. mobili: 55 61 88.