Nunalerisut ikiorneqartut

Nunatta kujataani immikkut savanut nerukkaatissarsiniarnissamut qinnuteqaat akuersissutigineqarpoq

Ulloq 18. september 2015 Inatsisartut Aningaasaqarnermut Akileraartarnermullu Ataatsimiititaliaata Naalakkersuisut immikkut nerukkaatissanik pisinniarnissamut aningaasaliinissamut qinnuteqataat akuersissutigaa.
Inatsisartut Aningaasaqarnermut Ataatsimiititaliaata makkua akuersissutigai:
- Nunalerinermut Siunnersorteqarfimmiit pinaveersaartitsineq sulissutigineqassasoq, ilaatigut imerterineq qaqugukkut aallartinneqarnissaa pillugu siunnersuineq kiisalu savaateqarfiit narsaatinik imerterinissamut imerterutinik pissarsinissamut periarfissarsiuunneqarnissaat sulissutaassasoq.

- Aalisarnermut, Piniarnermut Nunalerinermullu Naalakkersuisoqarfik (APNN) piginnaatinneqassasoq, nunalerinermik inuussutissarsiutillit panernersuarmik eqqugaanerannit immikkut ittumik, Inatsisartut inatsisaat nr. 6, 2. december 2009-imeersumi, pisariaqartillugu pinngitsoortitsinissaq siunertaralugu § 17 malillugu nunalerisunut ingerlatsinermut ikiorsiisoqassasoq.

- APNN inatsimmi pineqartumi § 18, imm. 4 malillugu, piginnaatinneqassasoq, aningaasaliissutissat nalingisa 75 %-ianik taarsersugassaanngitsunik tapiissutigineqarnissaannut, kiisalu aningaasaliissutissanut sinneruttut 25%-tii ernialinnik, ukiullu pingasut akilersugassatut taarsigassarsiissutiginissaannut, 2016-imiillu aatsaat akilersorneqalertussatut.

Inuussutissarsiornerup siuarsarneqarnissaanut taarsigassarsianik qinnuteqartup uumasuutigineqartunik ikilisaannginnissamik piumasaqarfigineqarpoq. Nammineerluni 10%-imik aningaasaliissuteqarnissaq pillugu piumasaqaatip atuutinneqannginnissaa panernersuaqarnermi immikkut ittumi tunngaveqarpoq.

APNN Nunalerinermut Siunnersorteqarfik isumasiorneratigut allaffissornikkut suliassartai suliarissallugit piareerpoq.

APNN augustip 20-iani 2015-mi nunalerinermut panernersuarmit eqqugaasumut ajornartoornermi ikiorneqarnissaq pillugu Kommune Kujallermi borgmesterimiit ammasumik allakkamik tiguneqartut innersuutigineqarput. Nunalerineq pillugu Siunnersuisoqatigiinni ulluinnarni aqutsisut saaffiginnissutigineqartoq pillugu augustip 21-iani 2015-mi ataatsimiipput tassanilu piaartumik iliuuseqarfiginissaa inassutigineqarluni kiisalu aningaasaliissutit pisariaqartinneqartut Naalakkersuisuniit aamma Aningaasaqarnermut Ataatsimiititaliamiit tunniunneqarnissaat inassutigineqarluni ajornartoorneq taamaalillugu minnerpaatinniarlugu.
Nunalerineq pillugu Siunnersuisoqatigiit panernersuaq ajornartoornertut ilungersunartutut isigineqarpoq taamaattumillu Naalakkersuisut aamma Inatsisartut qinnuigalugit pisoq ajornartoorluinnartutut isigeqqullugu.


Paasissutissat annertunerusut pissarsiarineqarsinnaapput ukununnga saaffiginninnikkut:
Amalie Jessen imal. Pollas Lyberth
Immikkoortortami pisortaq Immikkoortortami pisortaq
amalie@nanoq.gl, tlf. 345304 poly@nanoq.gl tlf. 345302