Kalaallit Nunaanni naartuersittartut amerlavallaarput

2009-miit 2013-ip tungaanut ukiumut naartuersittartut 800 missaanniittarput. Kisitsit qaffasippallaarpoq, taama isumaqarpoq Peqqissutsimut Naalakkersuisoq Doris Jakobsen.

-Kalaallit Nunaanni napparsimavinni naartuersittartut ullumikkut amerlavallaarput. Tamatta naartuersittarnerujussuup akiorneqarnissaa sulissutigisariaqarparput.

Naalakkersuisunit pinaveersaartitsineq annertuumik pingaartinneqarluni isiginiarneqarpoq. Peqqissutsimut Naalakkersuisoqarfiup ukiuni kingullerni Peqqissutsimut Pitsaaliuinermullu Aqutsisoqarfik aqqutigalugu ”Inuusamik paarsaqartarnermik suliniuteqarneq ” ingerlassimavaa atuarfiit suleqatigalugit taamaalillutik inuusuttuaqqat meerartaajaartarneup kinguneri pillugit paasisaqarnerulersinneqartarlutik tamatumunngulu peqatigitillugu naartunaveersaarnissamut periarfissanik paasissutissinneqartarlutik.  

Tamatuma saniatigut peqqissaasut ernisussiortullu Kalaallit Nunaani tamani kissaatiginagu naartulersinnaanerup pitsaaliorneqarnissaa pillugu paasissutissiinermik suliaqartarput.

Naalakkersuisup aamma paasissutissiissutigaa ulluni makkunani atuarfinnik suleqateqalernissaq suliniutigineqarmat. Isumannaatsumik atoqateqarneq  atuartitsinermi pingaartillugu isiginiarneqarluni ingerlanneqalernissaa siunertaralugu atuartitsissutit iluarsaateqqinneqarnissaat anguniarlugu.

Peqqissutsimut Naalakkersuisoqarfiup  Peqqissutsimullu Aqutsisoqarfiup maannakorpiaq peqqissumik kinguaasiutitigut inuuneqarneq pillugu paasissutissiinissaq suliarileruttorpaa.

 

Sukumiinerusumik paasisaqarasuttut uunga attaveqarsinnaapput: Naalakkersuisumut allatsi Rosa Thorsen +299553303