Eqqagassat pillugit paasititsiniaaneq

Erinarsuut Qujanaq Tunumi tusarsaavoq

Julie Berthelsenip ukioq manna aamma erinarsuut ”Qujanaq”, Kalaallit Nunaat tamakkerlugu pinngortitap illoqarfiillu minguinnerulernissaannik oqariartuuteqarfiusoq erinarsussavaa

Pinngortitamut, avatangiisinut inatsisinillu atuutsitsinermut Naalakkersuisoq Mala Høy Kúko sisamanngormat ullaakkut Tasiilap atuarfiani, »Tasiilami Alivarpi«-mmi 7. x-it ilagalugit paasititsiniaaneq, Kalaallit Nunaat tamakkerlugu pinngortitap illoqarfiillu minguinnerulernissaannik kinguneqartussaq nutaamik aallartinneqartoq malunnartinniarlugu portusuumik pissikkami angerlarsimavoq.
Paasititsiniaaneq siorna aallartinneqarpoq, maannalu eqqaavinnik atuinissamut eqqaasinneqaqqittussanngorpugut.

– Inuit amerlanerusut eqqaavinnik atuisalersimasut, aammalu inuit pinngortitamiikkaangamik eqqakkaminnik katersuisalersimasut maluginiarpara. Tamanna pitsaasuuvoq, ineriartornerlu taanna ingerlaqqissaaq, Mala Høy Kúko oqarpoq.
Tasiilami 7. x-it Julie Berthelsenip erinarsugaa »Qujanaq« ilikkarsimavaat, taakkulu isumaat ersarippoq: Pinngortitaq minguitsuutissavarput.

Ukioq manna avatangiisit minguinnerulernissaannut kikkut pitsaanerpaamik isumassarsiaqarnerannik unammisitsinermi 10.000 koruuninik eqquinissaq periarfissaavoq. Unammisitsineq Facebook-ikkut nittartakkami »Qujanaq«-mi ingerlanneqassaaq.
– Ataatsimoorluta nunarput paarissavarput, Mala Høy Kúko oqarpoq.

Annertunerusumik paassisaqarusunnermi saaffigineqarsinnaavoq Mette Skarregaard Pedersen, Toqq: +299 52 98 44, e-email: mesp@nanoq.gl