Nukissamut akitsuutip qaffannera uuliap akiisa appartussat akilerpaat

Uuliamut akitsuutit qaffatsinnissaannut Naalakkersuisut siunnersuutaata atuisartunut suliffeqarfiillu aningaasaqarnerannut qanoq sunniuteqarnissaa pillugu annertuumik oqallittoqarsimavoq. Tassunga atatillugu oqallinnermi pingaartitatut taamaassorisaq suujunnaarsikkusuppara – tassalu akitsuutissatut siunnersuut innuttaasunut suliffeqarfinnullu annertuumik nammagassiissutaanissaa.

Akitsuutit qaffatsinnissaannut Naalakkersuisut anguniagaat tassaasimavoq innuttaasunorpiaq suliffeqarfinnorpiarlu akitsuutip annikillisinnissaa. Nunatta karsia koruunit 60 millionit eqqaannik ilassuteqarfiginissaa – aammalu innuttaasut suliffeqarfiillu annertunerusumik imaluunniit annikinnerusumik eqqortinneqannginnissaat qanoq imminnut attaveqatigiippat?

Nassuiaat tassaavoq kingullermik Polaroil uuliamik pisiaqarmat uuliamut nappartamut ataatsimut akigititaq qaffasissuuvoq. Polaroil tulliani uuliamik pisiaqassaaq 2016-imi upernaap ingerlanerani. Tamatumuuna uuliap akiata annertuumik appartissimanissaat Naalakkersuisut naatsorsuutigaat, ukiut kingulliit marlussuit iluini uuliamut nappartamut ataatsimut akigititaq malunnartumik appartinneqarsimanera pissutigalugu. 2014-imi septembarimit 2015-imi septembariinnarmi uuliamut nappartamut ataatsimut akigititaq 91,5 $-init 44,5 $-inut appariarsimavoq.

Naalakkersuisut siunnersuutaanni paasisassaq tassaavoq Polaroil tulliani uuliamik pisiaqarpat naatsorsuutigisatut iluanaarutissaq takkutissasoq. Taamaalillutik atuisartut aamma suliffeqarfiit – aallaaviatigut – ullumikkumut naleqqiullutik annertunermik akiliissanngillat.

Tamanna pissutigerpiarlugu ullormi Polaroilip isumaqatigiissummik atsiugaqarfiani nalunaarut aqqutigalugu siunnersuut aatsaat atuutsinneqalissaaq, taamaalillutik atuisartut suliffeqarfiillu akitsuutit qaffatsinnerannik malugisaqassanngimmata.

Upernaamili, Polaroil uuliamik pisiaqarnialerpat uuliamut nappartamut ataatsimut inaarutitut akigititassamik Naalakkersuisut ilisimasaqannginnerat erseqqissassavara. Taamaattorli uulialerinerup iluani immikkut ilisimasaqartutut misissueqqissaarisartut tamarmik tupaallassapput uuliamut nappartamut ataatsimut akigititaq kingullermik Polaroilip uuliamik pisiaqarneratulli assinganik annertussuseqassappat. Taamaattumik uuliamut nappartamut ataatsimut akit appariarnerujussuannit uuliamut akitsuut qaffatsinnerata annertunerusumik imaluunniit annikinnerusumik oqimaaqatigiissuseqarnissaa Naalakkersuisut naatsorsuutigaat.

Tamatuma saniatigut inatsisissatut siunnersuut Naalakkersuisut avatangiisini aamma silap pissusaani suliassaqarfimmi anguniagaannik tapersersuivoq, maannakkut uuliamut nappartamut ataatsimut akigititaq attatiinnassagutsigu innuttaasut suliffeqarfiillu eqqarsaatigilluakkamik uuliamik atuinissamik qiimmassartuarnissaat isumannaarneqassammat. Paarlattuanik uuliap akia appassappat nukissamik annikinnerusumik atuerusussuseq millissaaq.

Akitsuutit qaffatsinnissaat pillugit siunnersuutip akerliuffiginera ajunngilaq, isornartorsiuisulli nunatta karsianut aningaasat amigaatigisat qanoq pissarsiarinissaannut qinigassanik allanik siunnersuutinik minnerpaamik saqqummiussisariaqarput. Oqallinnermi saqqummiussimassatut qinigassatut allatut siunnersuutit ajornartorsiummik qanoq iluarsiiviginnissinnaanerat takujuminaatsippara. Koruuninilli 60 millionit annertussusaannik qanoq isertitassanik nutaanik nassaarisaqarnissatsinnut isornartorsiuisut piviusorpalaartunik siunnersuuteqassappata Naalakkersuisut tusarusussavaat. Allatulluunniit: Aningaasanik assingusunik piliaqarsinnaasunik oqaatigisatut annertussusilinnik pisortat atuineranni ilassutitut sipaarutissanik nassaaritsi. Tassunga atatillugu allattoqarfimmi sipaaruteqarnissamut maannangaat pilersaaruteqalereernerput ilisimatitsissutigisinnaavara – sipaarutaalluartullu piffissaqarluartumik pilersaarusiortariaqarput.

 

Allattoq Andreas Uldum, Aningaasaqarnermut Naalakkersuisoq