Siggummi umimmaat qimaannakkat

Piniarnermi Nakkutilliisup Upernavimmeersup aqutsiveqarfimmi sulinermini Siggummi umimmaat qimaannakkat arlallit naammattoorsimavai. Umimmaat pineqartut aallaaneqarsimapput piffimmilu qimaannarneqarsimallutik. Pisoq Piniarnermut Naalakkersuisumiit ilungersunartutut isigineqarpoq taamatullu piniarnermi pissusilersorneq akuerineqarsinnaanngivissoq. APNN-imiit nalunaarutigineqarpoq uani pisumi umimmaat illersugaanerat piniagaanerallu pillugit Namminersorlutik Oqartussat nalunaarutaat 27. juni-meersoq 2013-mi malillugu aalajangersakkat ukua unioqqutinneqartut:

  • Piffimmi pineqartumi umimmaat aallaaneqarsimasut piffimmilu qimaannarneqarsimasut arlallit nassaarineqarput taamaattumillu nalunaarummi pineqartumi § 12 unioqqutinneqarsimavoq tassanilu allaqqalluni umimmaap pisarineqartup neqaa tamaat pisaqarfimmiit nassarneqassasoq.
  • Aqutsiveqarfimmi pineqartumi umimmanniarnissamut akuersissutit makitsinikkut agguaanneqarput taamaattumillu akuersissummut ataatsimut umimmak ataasiinnaq pisarineqaqqusaalluni. Umimmaat pisarineqartut piniartuniit umimmanniarnermi peqataasuniit amerlanerummata § 6 aamma unioqqutinneqarsimavoq tassanilu allaqqalluni akuersissutillit piniarnermullu atuuttumik allagartallit kisimik umimmanniaqqusaasut. Paragraafimi tassani immikkoortortami aamma allaqqalluni akuersissut inummut atiatigut taasamut taamaallaat atuuttoq allanullu tunniunneqarani tunineqarsinnaanngitsoq.
  • Nalunaarummi pineqartumi § 20 malillugu akuersissutip tunuaniittoq pisanik nalunaaruteqarnikkut immersorneqassaaq kommunimullu utertinneqassalluni soorluttaaq § 21 malillugu umimmaat pisarineqartut PINIARNEQ-mi ukiumoortumik immersuiffissiaq atorlugu APNN-imut nalunaarutigineqassasut.

Nalunaarummi pineqartumi aalajangersakkanik unioqqutitsinerit akiliisitsinermik kinguneqarsinnaapput sunngiffimmilu imaluunniit inuussutissarsiutigalugu piniarnermut allagartagaqarsinnaaneq arsaarinnissutaasinnaalluni taamaattullu umimmanniarsinnaanermut akuersissuteqarsinnaaneq. APNN-imiit aammattaaq nalunaarutigineqarpoq pisoq pineqartoq pissusissamissoortumik Politiinut tunniunneqassasoq.

Paasissutissat sukumiinerusut immikkoortortaqarfimmi pisortaagallartumut Nuka Møller Lund-imut tlf. nr. +299 34 53 45, numl@nanoq.gl, saaffiginninnikkut pissarsiarineqarsinnaapput.