Japanimiut aallartitaat tikeraartoq

Japanip aallartitaa ataqqinartoq Mr. Seishi Suei-mit aammalu Tokyomi National Institute of Polar Research-imi (NIPR) aallartitat tikeraarlersut

Sisamanngorneq 17. sep. marlunngorneq 22. sep. tungaanut Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq Nivi Olsen Københavnimi Japanip aallartitaa ataqqinartoq Mr. Seishi Suei-mit aammalu Tokyomi National Institute of Polar Research-imi (NIPR) aallartitanit tikeraarneqassaaq.

Japanimiit aallartitat Pinngortitaleriffiup NIPR-illu akornanni suleqatigiinnissamik atsioqatigiinnerup saniatigut Nunatta Katersugaasivia, Ilisimatusarfik, Pinngortitaleriffik aamma ASIAQ takusassarsiorfigissavaat, Nunatsinni ilisimatusarnerup qanoq ingerlanneqarnera paasisassarsiorfigalugu.

Tikeraarnermi nunat marluk akornanni suleqatigiiffiusinnaasut periarfissarsiussavaat.

NIPR issittumi ilisimasassarsiornermik ingerlatsisuuvoq, tassani pineqarlutik Qalasersuaq Kujalleq aammalu Avannaani nunat issittut, ilaatigut Qaanaap ungasinngisaani sermersuaq ilisimatusarfigineqarluni.

Nuummeereernerup kingorna Ambassadør-i arfininngornikkkut København-mut utissaaq, NIPR-imilu sulisut Ilulissanut Kangerlussuarmullu ingerlaqqissapput, ilaatigut Kangerlussuarmi silaannarsuatta killinganut ilisimatusarfeqarfiusoq pulaassallugu.

Tikeraartoqarnissaq pillugu Japanip aallartitaa ataqqinartoq Mr. Seishi Suei oqarpoq:

“Ataqqinaatitut isigaara Japan-ip Naalakkersuisui sinnerlugit peqataasinnaagama, Kalaallit ikinngutivut peqatigalugit, takusinnaallugu Kalaallit Nunaata Japanimiullu akornanni suleqatigiinnerit annertuumik siuariaateqarsimanerat”.

aamma Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq Nivi Olsen oqarpoq:

“Ilisimatusarnermut Naalakkersuisutut pingaartillugu tapersersorpara, issittoq pillugu ilisimatusarnikkut nunat tamalaat iluaqutissarsiffigisaminnik suleqatigiinnerunissaat. Tulluusimaarutigaara Pinngortitaleriffik aamma National Institute of Polar Research suleqatigiinnissamik atsioqatigiittussanngormata. Tamanna tunngavigalugu tikeraartuvut tikilluaqquakka, tikeraarnerallu pissarsiffiulluassasoq neriuutigalugu”.

Paasissutissanik pissarsiniaraani allatsi Jens Frederik Nielsen, jfni@nanoq.gl oqa.: +299 345702 attaveqarfigineqarsinnaavoq