Ilisarnaat Qussuk pillugu paasititsiniaajartortoq

Nunani avannarlerni tunisassiatta amerlanersaat piujuaannartitsinissamik siunertaqarluni  avatangiisinillu mianerinnilluni suliaasut  ilisarnaateqarput. Ilisarnaat taanna ateqarpoq Qussuk (Svanemærket). Tunisassiat Qussummik ilisarnaatillit niuertarfinni amerlanerni nassaassaapput. Tunisassianut ilisarnaatip taassuma nunani avannarlerni atugaanerulernissaanut Islandimiut aamma suleqataapput.Suliffeqarfiup ilisarnaammik ingerlatsisup Islandimi immikkoortortaqarfianeersoq Anna Sigurveig Ragnarsdóttir, sapaatip akunnerata matuma siuliani Nuummut tikeraarpoq ilisarnaat pillugu paasisitsiniaajartorluni.

Anna Sigurveig Ragnarsdóttir: - Maannarpugut Qussummik ilisarnaatip sumiiffinni inukittuni atugaanera pillugu paasitsiniaajartorluta. Kalaallit Nunaata saniatigut Savalimmiut aamma Åland paasititsiniaaffigaavut. Atuisut, pisisartut aammali suliffeqarfiit tuniniaasullu ilisarnaat pillugu aammali tunisassiat avatangiisinut sunniutigisartagaat avatangiisinillu mianerinninnissaq pillugit paasisitsiniaaffigaavut.

Ilisarnaatip paasisitsiniutiginissaa sooq pisariaqarpa?

Anna Sigurveig Ragnarsdóttir: - Iliuutsigut tamarmik avatangiisitsinnut pinngortitamullu sunniuteqartarput. Nunarsuarmi tamarmi tunisassianik atuineq avatangiisinut sunniuteqartupilussuuvoq. Tunisassiat eqqortut toqqarutsigit mingutsitsinermut annikillisaaqataassaagut. Taamaattumik inuit periarfissamik tamatuminnga ilisimatittuarnissaat pingaaruteqarpoq. Tunisassiarpassuaqarpoq avatangiisinut mianerinnilluni suliaasunik taakkualu assigiinngitsunik ilisarnaateqarput. Ilisarnaat Qussuk nuani aavannarlerni atugaasoq  avatangiisinut mianerinninnissamut piumasaqaatinik naammassinnissimasutut akuerisaavoq taassuminngalu atuisut suliffeqarfiit avatangiisinik mianerinninnissamut malinnittutut aamma  ilisarnaaserneqartarput. Tunisassiat suliffeqarfiillu Qussummik ilisarnaasigassat misissorneqaqqaartarput, tunisassiaasa sullissinerisalu avatangiisinik mianerinninnissamut piumasaqaatinik malinnittuunerat qulakkeerniarlugu. Tunisassiassat suliarineqalinnginnerminni  kiisalu suliarineqarnerisa nalaanni akuutissanik navianarsinnaasunik akoqassusiat misissorneqartarpoq, ilisarnaaserneqassagunik killilimmik akuneqarnissaat piumasaqaataammat. Tunisassiat ilisarnaasigassat tunisassianut allanut naleqqiullutik pitsaassusaat aamma nalilersorneqartarpoq. Ilisarnaatip Qussuup tunisassiallu sorliit Qussummik ilisarnaatillit ilisimaneqarnerulernissaat uagut suliassaraarput, pingaartumillu tunisassiat akuisa navianartut atuisunut sunniutigisinnaasaannik ilisimatitsinissaq. Tunisassiat akuutissanik akoqarpallaat inuit sapingaqalernerannik kinguneqarsinnaasarput, aamma akuutissat ilaat hormoninut sunniuteqartarput. Tamakkua tamarmik annertuumik sunniuteqaleraangamik peqqissutsimut eqquisinnaasarput. Taamaammat tunisassiat Qussummik ilisarnaatillit atorutsigit akuutissanik navianartunik aniatitsinermut millisaaqataassaagut.

Tunisassiat suut Qussummik ilisarnaateqarpat? Nunani avannarlerni tunisassiaannaanngitsut immaqa?

Anna Sigurveig Ragnarsdóttir: - Tunisassiat amerlanersaat Qussummik ilisarnaatillit nunani avannarlerni tunisassiaapput suliaallutillu. Allaffeqarfigut nunani avannarlerniimmata ilisarnaat ilisimaneqartorujussuanngornikuuvoq. Tunisassiat nunani allani suliaasut ilaat Qussummik aamma ilisarnaasigaanikuupput. Tunisassiat sullissinerillu assigiinngitsut katillutik 60-it missaanniittut Qussummik ilisarnaateqalernikuupput. Timinut tarngutit uffaatit, eqqiaanermi qaqorsaatit, pequtit, allaffinni pequtit atortullu, hotelit, unnuisarfiit allallu Qussummik ilisarnaaserneqarsinnaapput.

Maani Nuummiinnerni ilisarnaatip Qussuup atugaanera kiisalu avatangiisinik mianerinninnerput qanoq malugisaqarfigaagit?

Anna Sigurveig Ragnarsdóttir: - Ullut marluk matuma siornagut ataatsimeeqateqarpugut, ataatsimiinnermut niuertarfiit marluk peqataapput. Tunisassiat sorliit Qussummik ilisarnaatilllit tuniniarneritik niuertarfinneersut takutippaat. Soorlu meeraaqqat nangii, iffiornermi pappiaqqat allequtaasartut il.il. Nuuk tunisassianik Qussummik ilisarnaatilinnik ulikkaartoq takuarput. Taamaattorli Nuummi sulifffeqarfeqarpoq sullissinermik aallutaqartunik sulilu Qussumik ilisarnaasigaasimanngitsunik. Suliffeqarfiit taakkua attavigerusuttorujussuuagut neriuppugullu aamma namminneq soqutiginnillutik attaviumaaraatigut.

Suliffeqarfiitsorliit uani pineqarpat?

Anna Sigurveig Ragnarsdóttir: - Soorlu hotelit ilaat, eqqiaanermik suliaqartut ilaat kiisalu errorsisarfiit ilaat Qussummik ilisarnaateqalernissaat sulissutigineqarsinnaagaluarpoq.

Tusagassiivimmit Else Olsvig, Anna Sigurveig Ragnardottírimik apersuisuuvoq.

Ilisarnaatip Qussuup nittartagaa.