Killiffinnut nalunaarusiaq siulleq saqqummerpoq

Saammaateqatigiinnissamut Isumalioqatigiissitap 2017 ilanngullugu sulisussaasup ukiumoortumik killiffinnut nalunaarusiani siulleq suliaraa, tassani isumalioqatigiissitami aalajangiinerit suliaqarnerlu takussutissiorneqarlutik.

Killiffinnut nalunaarusiami 2014-imi juulimi pilersitsereernermiit 2015-imi juulip tungaanut isumalioqatigiissitap suliai pingaarnerit takussutissiorneqarput. Nalunaarusiaq isumalioqatigiissitap pilersaarutaannut periusissaannullu kiisalu sammisaannut killiffinnut nassuiaammik imaqarpoq.

”Isumalioqatigiissitaq suliakkiissutit allassimaffiini killissaliussat iluanni atituumik periarfissaqartinneqarpoq, taamaalillunilu suliap ingerlaneranut ingerlavissanik nassuiaanissamut annertuunik periarfissaqartinneqarluni. Killiffinnut nalunaarusiami suliniutit suut aallartissimanerivut, aammalu ukiuni aggersuni suliaqarnerup ingerlaqqinnissaanut qanoq pilersaaruteqarnersugut, takussutissiorpavut.

Suliaqarnermi pingaaruteqartunut ilaasoq tassaavoq Kalaallit Nunaanni Saammaateqatigiinnissamut isumalioqatigiissitaq Kalaallit Nunaanni innuttaasunut tunngasunik suliaqartoq, aammalu saammaateqatigiinnissamut suliaqarnermut akuutitsinermi, innuttaasut suliap ingerlaneranik paasinnitsinnissaat piginneqataatilernissaallu siunertarineqarpoq. Taamaattumik innuttaasut pissutsinut assigiinngitsunut isiginnittaasiat pingaarnertigut paasisimalerniarlugu, isumalioqatigiissitap oqaluttuanik katersineq aammalu innuttaasut oqaloqatiginissaat aallartilluarpaat.

Inuiaqatigiinni innuttaasut assigiinngitsuneersut, kinguaariit akornanniinnerat, illoqarfinniinnerat nunaqarfinniinnerallu, suiaassutsit, oqaaseqaqatigiiaat assigiinngitsut akornanniittuunerat il.il. apeqqutaatinnagu tamarmik tusaaniarneqarnissaat, aammalu oqallinnerni paarlaasseqatigiinnernilu sapinngisamik akuutinneqarnissaat, pingaaruteqarpoq.  Taamaalilluni ilisimasani isumalioqatigiissitamit katersorneqartuni  innuttaasut namminneerlutik misilittagaat, eqqaamasaat aammalu maannakkut misigisartagaat aallaavigineqassapput, tamatumunnga ingiaqatigitillugu suliatigut oqaluttuarisaanikkut aamma inuiaqatigiilerinikkut misissuinerit suliarineqassallutik,” isumalioqatigiissitaq sinnerlugu oqarpoq Jens Henrich.

Nalunaarusiaq oqaatsit marluusut atorlugit suliarineqartoq isumalioqatigiissitap nittartagaani nassaarineqarsinnaavoq: saammaatta.gl.

 

Attaveqarfissaq:
Saammaateqatigiinnissamut isumalioqatigiissitamut allattoqarfik
Mari Kleist
marh@nanoq.gl
+299 53 78 28