Naalakkersuisoq Doris Jakobsen Suleqatigiinnermut ministeri Carl Holstilu

Naalakkersuisoq Doris Jakobsen pingasunngormat Isumaginninnermut Peqqissutsimullu ministerit Københavnimi Nunani Avannarlerni Ministerit Siunnersuisooqatigiivisa ataatsimiinneranni peqataavoq. Taassuma aamma Københavnimiinnini iluatsillugu tallimanngormat Nunani Avannarlerni Ministerit Siunnersuisooqatigiivini suleqatini danskeq – Suleqatigiinnermut Ministeri Carl Holst ilassivaa.

Peqqissutsimut aammalu Nunanik Avannarlernik Suleqateqarnermut Naalakkersuisup Doris Jakobsen-ip tallimanngormat 11. september nunani avannarlerni suleqatigiinnermi suleqatitaani danskit suleqatigiinnermut ministeriat Carl Holst ataatsimeeqatigaa.

Naalakkersuisoq Doris Jakobsen pingasunngormat Isumaginninnermut Peqqissutsimullu Ministerit Københavnimi Nunani Avannarlerni Ministerit Siunnersuisooqatigiivisa ataatsimiinneranni peqataavoq. Taassuma aamma Københavnimiinnini iluatsillugu tallimanngormat Nunani Avannarlerni Ministerit Siunnersuisooqatigiivini suleqatini danskeq – Suleqatigiinnermut Ministeri Carl Holst ilassivaa.

Danmark ukioq manna Nunani Avannarlerni Ministerit Siunersuisooqatigiivini siulittaasuutitaqarpoq, Naalakkersuisullu ukioq naallugu susassaqarfimmi tamatumani danskinik suleqateqamminnik angusaqarluartumik suleqateqarsimapput. Tamanna tunngavigalugu martsip qaammataani Ilulissani Suleqatigiinnermut Ministerit ataatsimiipput aammalu Inatsiseqarnermut Ministerit aamma tassani septembarip naalernerani ataa-tsimiissallutik.

Nunat avannarliit pillugit nassuiaammi Inatsisartut ukiaanerani ataatsimiinnissaannut tunniunneqarsimasumi atuarneqarsinnaavoq, Nunat Avannarliit Siunnersuisooqatigiivisa ukioq kingulleq katersuunnerisa kingorna nunat avannarliit suleqatigiinneranni angusarineqartut pillugit.

”Danskit siulittaasuutitaqarnerat, nunat avannarliit suleqatigiinnerisa iluanni, suliniutinik kalaallinut soqutiginaateqartunik periarfissiisimavoq. Pinngortitaleriffiup immami Kalaallit Nunaata Kangiani uumassusillit assigiinngisitaarneri pillugit paasiniaanermut suliniut pisortaaffigaa. Matumunnga ilanngunneqassaaq, suliniummik ingerlataqarnissamut periarfissinneqarsimagatta, taamaalilluta pinngortitaq aammalu uumasut ulluinnarni inuuniutivut pillugit aalisartut piniartullu ilisimasaannik katersinissamut periutsinik ineriartortitsinissamut tunngavissiisussanik” Doris Jakobsen oqarpoq.

”Uannut pingaaruteqarpoq – maanna Københavmini tikeraarninni – Danmarkimi suleqatinnik ilassinninnissara, tassami ungasinngitsukkut septembarip 23-anni suleqatigiinnermut ministerit siunnersuisooqatigiivini ataatsimiittussaagatta. Maannangaaq paasinarsereerpoq, Carl Holst-ip siulianik pitsaasumik suleqateqarsimanerput piffissami aggersumi nangikkumaaripput”, Doris Jakobsen naggasiivoq.

 

Paasisaqarnerorusuttut attavigisinnaavaat Naalakkersuisoq Doris Jakobsen, oqarasuaat +299 539400.