Kiffartuussinermut isumaqatigiissutit pillugit oqallinnermut oqaaseqaat

Ilaasunik angallassineq pillugu kiffartuussinermut isumaqatigiissutit pillugit ulluni kingullerni oqallinneq, tupinnanngitsumik innuttaasuni tamani initoorujussuusoq malinnaaffigaara. Minnerunngitsumik kiffartuussinermut isumaqatigiissutit maanna atuuttut ukiup naanerani naasussaanerat, taamaalillunilu maannangaaq juullimut angalanissamik aammalu 2016-imi angalanissanik allanik pilersaarusiornissap ajornakusoornera eqqarsaatigalugu.

Aallarniutigalugu erseqqissaatigissavara, kiffartuussinermut isumaqatigiissutit sapinngisamik ajoqutissat annikinnerpaatillugit inissinneqarnissaat, taamaalillunilu angalasussat piaarnerpaamik angalanissaminnik pilersaarusiorsinnaalernissaat pingaartittorujussuugakku.

Amerlanerpaat ilisimasaattut sullissisunut kiffartuussinermut isumaqatigiissutit kingullermik 2014-imi Inatsisartunut qinersinissap nalunaarutigineqarneranut atatillugu sivitsorneqarput. Naalakkersuisunngorama kiffartuussinermut isumaqatigiissuteqariaatsip tamarmiusup eqqarsaatigilluarnissaanut, taamaalillutalu aningaasassarititaasut atorlugit angallannermik annerpaamik angusaqarnissarput, tamatumalu peqatigisaanik akit ilusaasa ersarinnerulernissaannik angallasseriaatsillu ataqatigiinnissaannik angusaqarnissarput atorluarniarlugu ersarissumik anguniagaraara.

Attaveqaqatiinnermut tunngatillugu ataqatigiissitsinissaq qitiulluinnartumik inissisimavoq, amerlanerpaallu ilisimariigaattut siunissami attaveqaqatigiinnermik, nuna tamakkerlugu ataqatigiissitsisumik aammalu piffissamut naleqquttumik, tutsuiginartumillu pilersitsinissaq siunnerfigalugu Naalakkersuisuni sulivugut. Kiffartuussinermut isumaqatigiissutit, taakkulu malitsigisaannik isorliunerusunik sullissineq taamatut ataqatigiissitsilernissamut pingaaruteqarput.

Tamatuma peqatigisaanik kiffartuussinermut isumaqatigiissutit attaveqaqatigiinnermut tamarmiusumut naleqqunnissaat pingaaruteqarpoq. Tamatuma kingunerisaanik isumaqatigiissutini attaveqaqatigiinnermi allannguinissat annertuut, nunatsinni atuutilersussat sapinngisamik eqqarsaatigineqarnissaat pingaaruteqarpoq. Tamanna iluatsissappat, attaveqaatit ineriartornissaannut siunnerfissat ilisimaarinissaat naapertuutissaaq, tamannalu ukiaq manna ataatsimiinnermi Naalakkersuisut silaannakkut angallannermi attaveqaatit pillugit saqqummiussaasa Inatsisartuni suliarineqarnerisigut annertuumik anguneqassaaq.

2015-imut aningaasanut inatsit kingusingaatsiartukkut akuersissutigineqarnermat, tamatumalu kingorna Aningaasaqarnermut Akileraartarnermullu Ataatsimiititaliaq pitsaasumik oqaloqatigineqareermat uannut paasinarsivoq, ukioq manna nunatsinnut pitsaanerpaanik, angusassatut naatsorsuutigisanik annertuunik tamanik isumalluarfiusunillu angusaqarnissaq ajornakusuussasoq. Tamatumunnga pingaartumik isumaqatigiissutit nutaat atulernissaannut piffissap sinneruttup sivikinnera pissutaavoq.

Tamatuma saniatigut sullissisut nutaat arlallit soqutiginnillutik nalunaarsimapput, tamatumanilu pissutsit tamarmik misissoqqissaarneqarnissaat uannut pingaaruteqarpoq, taamaalilluta sullissisinnaasut tamarmik suliassanut neqerooruteqarnissamut kajumissaarsinnaassagatsigit. Takusinnaasara malillugu taamaalilluta ataqatigiinnermik kissaatigineqartumik pilersitsisinnaavugut – immaqa nutaanik periaaseqarluta sullissisut arlallit piginnaaneqarfigisaannik pingaarnernik assigiinngitsunik kattussilluta inuiaqatigiinnut tamatsinnut nuannaarutaasumik iluaqutaasumillu ataqatigiissumik aaqqiinitsigut.

Taamaattumik isumaqatiginninniarnerni pitsaanerpaanik angusaqarniarluta, piffissaalluarallartillugulu angallannermi attaveqaatinut kissaatinik tamanik sullissisut tamarmik neqeroorutaannut ataqatigiissitsiniarluni suliap torersumik ersarissumillu ingerlanneqarnissaa anguniarlugu, Inatsiartut Aningaasaqarnermut Akileraarnermullu Ataatsimiititaliaata akuersissuteqarneratigut kiffartuussinermut isumaqatigiissutit nutaat atuutilernissaasa tungaanut isumaqatigiissutit atuuttut ukioq ataaseq tikillugu sivitsorneqarnissaat Naalakkersuisunit siunnerfigineqarpoq. Kiffartuussinermut isumaqatigiissutit nutaat, ersarissumik ataqatigiissumillu atuutsinneqartussat, tamatumalu peqatigisaanik silaannakkut angallassinermi attaveqaataalersussanut naleqquttut.

Qanittukkut sullissisooreersut sullissilersussallu angallannermi suliassanut neqerooruteqaqqullugit kajumissaarneqareertussaapput. Air Greenland, Disko Line, Arctic Umiaq Line, Aluu Airlines / Bristow Group, Air Iceland kiisalu GreenlandCopters kajumillutik Naalakkersuisoqarfinnut nalunaareerput, taakkulu tamarmik isumaqatiginninniarnissamut qaaqqusissummik nassinneqassapput.

Naggasiutigalugu suleqatigiilluarnermut, maanna sullissisuusunit misigisannut qujarusuppunga, taakku ataatsimoorlutik sivitsuinissamut tunuliaqutaasut aammalu angallannermi attaveqaatissanut kissaatinnut paasinnilluarlutik nalunaaruteqarmata. Isumaqatiginninniarnerit ingerlalluarnissaat qularinngilara, taamatuttaarlu piffissap sivikitsuinnaap ingerlanerani sivitsuinissamut atugassarititaasut ersarissinissaat, taamaalillunilu kikkut tamarmik juullip nalaani angalanissaminnut pilersaarusiorsinnaaleqqinissaat bilitsisinnaalernissaallu qularinngilara.

Inussiarnersumik inuulluaqqusillunga

Knud Kristiansen