Isaassigit inuunermillu annaassillutit

Isaassigit inuunermillu annaassillutit taama qulequtaqarpoq imminut toquttarnermut nunarsuaq tamakkerlugu pitsaaliuinermut ukioq manna 10. september 2015 pisussaq. Kalaallit Nunaanni assigiinngitsunik sammisaqartitsinernik sumiiffinni tamani ulloq malunnartinniarneqarpoq.

-”Kalaallit Nunaanni imminut toquttartut amerlavallaarput. Tamanna pinngitsoortinniassavarput taamaattumillu imminut toquttarnermut pitsaaliuiniarluta politikkikkut salliutipparput. Imminut toquttarneq sammissallugu ilungersunartuuvoq paquminarluni eqqartoruminaattartoq. Taamaattumillu nuannaarutigaara ulloq malunnartinniarlugu tapiissutinik qinnuteqartut amerlammata, taamaasillunilu imminut toquttarnerup pitsaaliornissaanik aaqqissuussisoqarsinnaalerluni”, taama oqarpoq Peqqissutsimut Naalakkersuisoq, Doris Jakobsen nangillunilu:

-”Pingaaruteqarpoq eqqaamassallugu, tamatta periarfissaqaratta inuk artorsartoq ikiorsinnaagatsigu. Ilaatigut tassaasinnaavoq saaffiginninneq, aperisinnaaneq najuunneq tusarnaarsinnaanerlu.”

Ukioq manna aamma Peqqissutsimut Naalakkersuisoqarfimmut imminut toquttarnermut nunarsuaq tamakkerlugu ullorititaanut malunnartitsiniarnermut tapiissutinik qinnuteqartoqarsinnaasimavoq. Peqqissutsimut Naalakkersuisoqarfik illoqarfinni nunaqarfinnillu 19-iusuni aaqqissuussiniarnernut katillugit 28.000 koruuninik tapiivoq.

Paasissutissanik allanik piniaruit Peqqissutsimut Naalakkersuisumut ilaasortap allataa Rosa Thorsen oqarasuaat +299 55 33 03 imaluunniit e-mail rosat@nanoq.gl aqqutigalugu attavigineqarsinnaavoq.