EU-p inerteqqussutaa suli naammassinngilaq

Puisit amiinit tunisassiat

Tunisassiat puisineersut pillugit EU-p inerteqqussutaa suli naammassinngilaq

Europa Parlament-i 8. september 2015 amerlanerussuteqarluartumik tunisassiat puisineersut EU-mut eqqussinissamut inerteqqussutaa sukaterneqarnissaa akuersissutigaa tamannalu pivoq niuernermut kattuffissuup WTO-p EU avoqqaarliutigeermagu. Taamatut taasinerup kinguneraa EU-mi tunisassianik eqqussinissamut inerteqqussut suli sakkortunerulermat.

Inerteqqussummik sukaterineq atuutilertinnagu EU-mi inaarutaasumik 18. oktober 2015 nallertinnagu taasisoqartussaavoq, taannaammat WTO-p 2014-imi WTO-mi eqqartuussinikkut aalajangigaanik malitseqartitsinissamut piffissarititaa.

Siullertut sukaterineq isumaqarpoq maanna atuuttoq inuit immikkut pineqarnissaat erseqqissaavigineqassammat, taamaasilluni inuit inuiaqatigiit taamaallaat tunisassianik puisineersunik niueruteqarsinnaassapput, puisinniarneq uumasunut naalliutsitsinnginnissamik piumasaqaatinik naammassinnippat aammalu puisinniarneq ileqqutoqqanik aallaaveqarpat.

Tusarniaanermi Naalakkersuisut akissuteqaamminni oqaaseqarnikuupput inuit immikkut pineqarnerat siunertamisut sunniuteqarsimanngitsoq. Naalakkersuisut tikkuarsimavaat, tunisassianik puisineersunik avammut niueruteqarneq annertuumik appariarsimasoq inerteqqussutip 2009-imi eqqunneqareernerata kingorna. Europami atuisartut paasissutissiinerlunnerit paasinnikkumannginnerillu pissutigalugit ilaatigut tatiginninnerat innarlerneqarsimammat. EU-llu inerteqquteqarnerup sukaterneqarnissaa toqqarsimavaa kingunissaanik misissueqqaarnani.

Aappaattut tunisassiat puisineersut EU-p iluani niuerutigineqarnissaat inerteqqutaalissaaq aalisagartassanik illersuiniarneq siunertaralugu puisinniartoqarsimappat. Ilutigalugu aalajangerneqarpoq puisit taakkunani pisat igiinnarneqartassasut aammalu iluaqutigineqassanatik. Taamatut ineriartorneq ernumanartoqarpoq.

Kalaallit Nunaat aamma Danmark aallaqqaataanniilli tunisassianik puisineersunik niueruteqarnermik inerteqqussummut akerliusimavoq 2009-imili eqqunneqarmat ilaatigut nungukkiartuutaanngitsumik atuinissamut tunngaveqarneq innersuussutigalugu.

Taasinermi Europa Parlamentip Kalaallit Nunaat naaperiarpaa akuersissutigalugulu EU Kommissioni inuit ileqqoralugu puisinniartarnerisa pitsaanngitsumik isigineqartarnerat akiorniarlugu EU-mi innuttaasunut qaammarsaalluni paasititsiniaasoqassasoq.

Paasissutissat sukumiinerusut pissarsiarineqarsinnaapput uunga saaffiginninnikkut; Immikkoortumi pisortaq Amalie Jessen, amalie@nanoq.gl – tlf. nr. 345304