Nanortalimmi Food Festivalimik ammaasut

Nanortalimmi Food Festivalimik Vittus Qujaukitsoq aamma Ole Mølgaard-Motzfeldt ammaasut

Inuussutissarsiornermut, Suliffeqarnermut, Niuernermut Nunanullu Allanut Naalakkersuisup Vittus Qujaukitsup aamma kommunalbestyrelsimi ilaasortap Ole Mølgaard-Motzfeldtip Kujataani Nanortalimmi ”IGASA” Food Festival Sapaammi 6. september 2015-imi ammarpaat.

Igasa Food Festival ukiumoortumik maanna pisartoq, ukiut tulleriit sisamassaannik ingerlanneqartoq pillugu Vittus Qujaukitsoq pilluaqqussuteqarpoq. Ilaatigut ima oqaaluni: Kujataa Kalaallit Nunaanni pequusivittut taaneqarajuttuuvoq – ullunilu taakkunani Kujataani suliassarpassuit pisussanngortitat qimerlooraani arlaannaataluunniit tamanna qularutigisinnaanngilaa.

Nerisassialerinermik ilinniarfiup INUILI’p aaqqissuussarilluagaanik Kujataani uumasunik nunalerinermiillu pissarsiarineqarsinnaasunik tunngaveqartunik nerisassiat pissanganartorpassuarnut Nanortallup katersortarfia saqqummiussinermut ooqattaagassanillu tamulugassaqartitsinermut sinaakkusiivoq. Najukkami igasut nerisassiarpassuit pissanganartut piareersarsimavaat, eqaluit, kapisillit, puisit, arferit allarpassuillu naatsitanik nunatsinneersunit, soorlulusooq nunat tamalaaneersunit akulerussuunneqarlutik. Nunat tamalaanit misilitassat takornarianit Spaniameersunit marlunnit sassaalliutigineqarputt, taakku Atlantikup Avannaanit saarulliit tarajortikkat atorlugit Spaniamiut nerisannaavata ”Bacalao”p qanoq suliarineqartarnera takutimmassuk. Tamanna Nanortalimmut assut pingaartuuvoq, Spaniamummi aalisakkanik tarajortikkanik tonsinik tusintilikkaanik Nanortalimmi aalisakkanik tunisassiorfik tunisassiortarmat.

Vittus Qujaukitsoq nangilluni oqarpoq: ”Nunatsinnit nerisassat atornissaat assut pingaartippara. Naalakkersuisoqatigiinnissamik isumaqatigiissummi ilungersuussassat ilaattut inissinneqareerpoq – ilaatigut uumasut nakorsaqarfimmik suliassaqarfiup tigunissaa, nunalerinermut siunnersuisoqatigiit nukittorsarnissaat, aamma nunalerinerup takornariartitsinerullu ataqatigiissillugit periarfissanik ineriartortitsinissaq anguniagaallutik.”

Ilaatigut Neqilu kiffartuussinissamik isumaqatigiissut, kiisalu IGASA Food Festivalimut tapiissuteqarnerit aqqutigaluguit nerisassialerinermik suliaqarfiup ineriartortinnissaa pillugu Kommune Kujalliup aamma Naalakkersuisut akornanni suleqatigiinneq pitsaasoq Ole Mølgaard-Motzfeldtip oqalugiaammini oqaatigaa.

Ullormut Nanortalimmi pisussani katersortarfimmi kalaallit nerisassiaat immikkut sanaannaat tunineqarneri ilaapput. Unammillertitsisoqarpoq qulequtsikkamik ”puisiutit ilisimaviuk?”, puisip neqaanik uulliat assigiinngitsut eqqoriaqattaarneqarlutik. Ilaavortaaq naamasaqarniarluni unammisitsineq, assersuutigalugit tupaarnat, kuannit pilutaat, qeqqussat panertitat, kigutaarnat pilutaat aamma qajaasat eqqoriarneqassallutik.

Suliarititani allaniipput unamminerit assigiinngitsut, ilaatigut puisimik ilisimasaqarnerpaanissaq, kikkullu naamasaqallaqqinnersaallutik nunatta naasuinik atorneqarsinnaasunik eqqoriaasinnaanerit unammissutaallutik.

Erseqqinnerusumik paasisaqarniaruit attavigikkit naalakkersuisoqarfiup pisortaa Jørn Skov Nielsen, oqarasuaat angallattagaq 556188, imaluunniit Kommune Kujallermi Inuussutissarsiornermut pisortaq Kenneth Høegh, oqarasuaat angallattagaq 565604.