Nuummi Paamiunilu saattuartassat ilaneqarput

Krabber 1 Naturinstitut

Assiliisoq: Pinngortitaleriffik.

Saattuartassat aqutsiveqarfimmi Nuuk-Paamiut ilaneqarput

Saattuarniarneq novembarip aallaqqaataanit aallarteqqinneqassaaq

Naalakkersuisut ippassaq septembarip pingajuanni aalajangerput aqutsiveqarfimmi Nuuk-Paamiut saattuartassat sinerissap qanittuani pisassiissutit 950 tonsinit 1.200 tonsinut ilaneqassasut.

Saattuartassiissutaasimasut 950 tonsit tamakkerlugit aalisarneqarsimalermata, tamaani saattuarniarneq unitsinneqarpoq.

Naalakkersuisut aalajangerput saattuarniarneq novembarip aallaqqaataanit aallartinneqaqqissinnaassasoq, sinneruttut aalisarneqarsinnaassallutik.

Aalisariuteqarpoq saattuarniartunik saarullinniartunillu. Sinerissap qanittuani ukioq manna saarullittassiissutit 61 procentii maannamut aalisarneqalereersimapput, taamaalilluni sinerissap qanittuani saarullittassiissutit ukiup sinneranut 9.750 tonsit sinnerullutik.

Aalisariutit piffissap ilaani saarullinniaannarnissartik qinersinnaavaat imaaluunniit sumiiffiit ilaanni suli saattuanik pisassalimmi saattuarniarsinnaassallutik.

Naalakkersuisut saattuartassanik ilassuteqarnerminni aamma uku aalajangersaaffigivaat:

  • Saattuartassiissutit saattuarniartunut ilassutigineqartut 250 tonsit pinngitsooratik killeqarfiup 3 sømilip avataani aalisarneqartussaatitaassasut
  • Aqutsiveqarfimmi Nuuk-Paamiut saattuarniarnissamut nutaanik akuersissutinik tunniussisoqassanngitsoq, tamaani killilimmik saattuarniartoqassammat
  • Saattuartassatut ilassutigineqartut aalisariutinit taamaallaat aqutsiveqarfimmi Nuuk-Paamiut aalisartartunit aalisarneqassasut

 

 

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi allaffimmi pisortaq, Jóhanna Lava Køtlum. Mail: jool@nanoq.gl