Nannut pillugit ilisimatooq nersornaasigaavoq

Erik Bornimik assiliisuuvoq Fernando Ugarte.

Ilisimatooq, Dr. Filos Erik W. Born, ukiorpassuarni Kalaallit Nunaanni nannut pillugit ilisimatusarsimasoq Nunat nanoqarfiit tallimassaanik Ilulissani ataatsimiinneranni nersornaatisitinneqarpoq.

Nunat nanoqarfiit Rusland, USA, Canada, Norge aamma Kalaallit Nunaat tallimassaannik ataatsimiinnerannut atatillugu ataatsimiittut siuuttuisa nannut pillugit nungusaataanngitsumik iluaquteqarnissamut ilisimatusarnermillu sulilluarsimasoq nersorniagaq siullerpaaq toqqarpaat. Piukkunneqartuni pingasuusuni Erik W. Born, Pinngortitaleriffimmi ilisimatooq ukiorpassuarni tunniusimalluni malunnaatilimmik nannut issittumi ilisimatusarfigineqarnerat nersorneqaatigaa.

Erik W. Born siullersaalluni makku tunngavigalugit nersorniarneqarpoq:

-   Oslo-konvention 1973-imi isumaqatigiissutaasoq issittut nunaanni nannunik piujuartitsinissamik ilisimatusarnissamillu imaqartup ataani ukiorpassuarni ilisimatuutut,

-   Namminersornerullutik Oqartussaasimasunut aamma Namminersorlutik Oqartussanut nannut pillugit siunnersuisartutut

-   Nannut pillugit inuusuttunik ilisimatuunngorniartunut ilinniartitsisoq paasissutissanillu siammaasartoq,

-   Kalaallit Nunaat sinnerlugu nannut pillugit ambassadøritut kiisalu

-   Issittumi pinngortitap imminut attuumassuteqarneranik siammaanermut sinniisoq (advokat).

Suliat aalajangersimasut pingasut erseqqissaatiginiarneqarput:

-   IUCN’-imi Nannut pillugit Ilisimatuut Suleqatigiissitaani siulittaasimasutut 1983-1988 aamma 2009-2011,

-   Nannut pillugit Kalaallit Nunaata Canadallu akornanni ilisimatusarnermut ataatsimoorussamik Suleqatigiissitami siulittaasuuffiginera, kiisalu

-   Ileqqutoqqat piniartullu nannut pillugit Kalaallit Nunaata Kitaani ilisimasaannik katersuisimasutut, taassumalu ataani aaqqissuutaasumik sulinikkut ilisimatusarnikkullu kiisalu ileqqutoqqat pinngortitamilu nerisaqaqatigiinneq pillugit ilisimatusarfigineranik kiisalu nannut pillugit ilisimatusarnermiit takussutissarpassuarnik saqqummersitsisimasutut.

Tunuliaqut

Nannut piujuartinneqarnissaat pillugu Kalaallit Nunaat nunat tamat akornanni suleqataavoq. Tamanna ilaatigut pivoq ”Nannut uumaffigisaasalu piujuarnissaat pillugu Isumaqatigiissut”-ip ataani, Kalaallit Nunaat sinnerlugu Qallunaat Nunaata atsiugaa, Canada, Norge, Rusland aamma USA-p maj 1976-imi atsiugaa (isumaqatigiissullu atsioqataasunit 1978-imi atortussanngortinneqarpoq 1981-imi uppernarsaqqinneqarluni. Kalaallit Nunaat nannut pillugit isumaqatigiissutip atuuttorsanngortinneqarnissaa pillugu akisussaasunngorpoq 1985-imiit.

Nunat tamat akornanni suleqatigiinnissaq pisariaqarpoq nannut nunat nanoqarfiusut killeqarfii akimorlugit ingerlaartarmata, aammalu nunat pineqartut akornanni nannunik ilisimatusarnerup ataqatigiissaarisoqarnissaanik pisariaqartitsisoqarmat.

Kalaallit Nunaata Canada / Nunavummi nanoqatigiit immikkut pingasuusunik Kalaallit Nunaata avannarpasissuani Kane Basin-imi, Baffinip Kangerliumarngani kiisalu Davis Stræde-mi Kujataaniittumi avitseqatigiiffeqarpoq.

Suleqatigiinneq aqutseriaatsinik aamma ilisimatusarnermiit inernerusunik nutaanerpaanik misilittakkanik paarlaasseqatigiinissamut ilaqarpoq.

 

Paasissutissat annerusut uunga paasiniaanermut pissarsiarineqarsinnaapput amalie@nanoq.gl